ଭଦ୍ରକ: ଅଭିନବ ଉପାୟରେ ସୁନା ଗହଣା ଲୁଟ । 4 ଜଣ ଥାନାରେ ଅଟକ। ଏଭଳି ଘଟଣା ଘଟିଛି ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ବିଦେଇପୁରଠାରେ । କିଛି ମହିଳା ଓ ପୁରୁଷ ମିଶି ଗାଁ ଗାଁ ବୁଲି ସାପ ଖେଳ ଦେଖାଇବା ବାହାନାରେ ମହିଳାଙ୍କ ସୁନା ଗହଣା ଲୁଟ କରୁଥିବା ଅଭିଯୋଗ ହୋଇଛି ।
ସୂଚନା ଅନୁଯାୟୀ ସାପ ଖେଳ ଦେଖାଇବାକୁ ଆସିଥିବା 4 ରୁ 5 ଜଣ ଲୋକ ପାଖରେ ରଖିଥିବା କିଛି ସୁନା ବଲ୍କୁ କମ ଦରରେ ବିକିବା ଲାଗି ବିଦେଇପୁରର କିଛି ଯୁବକଙ୍କୁ କହିଥିଲେ । ଏଥିରେ ଗାଁ ଲୋକଙ୍କ ସନ୍ଦେହ ହେବାରୁ ତା ନିକଟରେ ଥିବା ସମସ୍ତ ସୁନାକୁ ଖୋଲିବା ପରେ ବହୁ ପରିମାଣରେ ନକଲି ସୁନା ବଲ୍ ଥିବା ଦେଖି 4 ଜଣଙ୍କୁ ଅଟକ କରି ନିକଟସ୍ଥ ନାୟକାନୀଡିହି ଥାନାକୁ ଖବର ଦେଇଥିଲେ ।
ଘଟଣାସ୍ଥଳରେ ପୋଲିସ ପହଞ୍ଚି 4 ଜଣଙ୍କୁ ଥାନାକୁ ଆଣି ଅଟକ ରଖି ଘଟଣାର ତଦନ୍ତ ଚଳାଇଛି । ପାଖାପାଖି 10 ରୁ 11 ଜଣ ଲୋକ କିଛି ଦିନ ଧରି ବିଦେଇପୁର ବାତ୍ୟା ଆଶ୍ରୟସ୍ଥଳୀରେ ରହି ଗାଁ ଗାଁ ବୁଲି ସାପ ଖେଳ ଦେଖାଉଛନ୍ତି । ଏମାନେ ସାପ ଖେଳ ବାହାନାରେ ମହିଳାଙ୍କ ନିକଟରୁ ସୁନା ଗହଣା ଲୁଟୁଥିବା ସ୍ଥାନୀୟ ଲୋକ ଅଭିଯୋଗ କରିଥିବା ଜଣାପଡିଛି।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
