ଭଦ୍ରକ: ନିଆରା ଅନଶନ । ସ୍ତ୍ରୀର ମାନ୍ୟତା ପାଇଁ ପ୍ରେମିକ ଦୁଆରେ ପ୍ରେମିକାର ଅନଶନ । ଶୀତ କାକରକୁ ଖାତିରି ନକରି ନ୍ୟାର୍ଯ୍ୟ ଦାବିରେ ପ୍ରେମିକା ଅନଶନରେ ବସିଥିବା ବେଳେ ଦେଖଣାହାରି ଗ୍ରାମବାସୀଙ୍କ ଭିଡ ଜମିଥିଲା । ଶେଷରେ ପୋଲିସି ଘଟଣା ସ୍ଥଳରେ ପହଞ୍ଚି ପ୍ରେମିକାକୁ ସାନ୍ତନା ଦେବା ସହିତ ପ୍ରେମିକ ପରିବାରକୁ ଥାନାକୁ ଡକାଇଛି । ଅନ୍ୟପଟେ ଏଭଳି ଅସ୍ୱାଭାବିକ ପରିସ୍ଥିତିର ମୁକବିଲା କରିବାରେ ବିଫଳ ହୋଇ ପ୍ରେମିକ ଘରୁ ଫେରାର୍ ହୋଇଥିବା ସଂପ୍ରତି ଚର୍ଚ୍ଚାର ବିଷୟ ସାଜିଛି । ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ବାଂଶଡା ଥାନାଧିନ ଚଡଦିଆ ଗ୍ରାମରେ ।
ସୂଚନା ମୁତାବକ, ଏହି ଥାନାଧିନ ନଳଗୋହିରା ପଞ୍ଚାୟତ ପୋଖରୀସାହି ଗାଁର ନଟବର ଜେନାଙ୍କ ଝିଅ ସବିତା ଜେନା (ପ୍ରେମିକା) ସ୍ଥାନୀୟ ଚଡଦିଆ ଗ୍ରାମର ଧନି ମହାଳିକଙ୍କ ପୁଅ ଶଙ୍କର ମହାଳିକଙ୍କୁ (ପ୍ରେମିକ) ଗତ ବର୍ଷେ ତଳେ ପ୍ରେମ ବିବାହ କରିଥିଲେ । ପ୍ରେମ ପରେ ବିବାହ ଏବଂ ପରେ ପରସ୍ପର ମଧ୍ୟରେ ଅନାବିଳ ସମ୍ପର୍କ ସ୍ଥାପନ ହୋଇଥିଲେ ମଧ୍ୟ କେତେକ କାରଣରୁ ସବିତାଙ୍କୁ ସ୍ତ୍ରୀର ମାନ୍ୟତା ଦେଇ ମଧ୍ୟ ଶଙ୍କର ନିଜ ଘରକୁ ନେଇନଥିଲେ । ରୋଜଗାର କରିବା ପାଇଁ ସବିତାଙ୍କୁ ତାଙ୍କ ବାପ ଘରେ ଛାଡି ଶଙ୍କର ବାହାରକୁ ଚାଲିଯାଇଥିଲେ । ପରବର୍ତୀ ସମୟରେ ସବିତାଙ୍କୁ ତାଙ୍କ ଶ୍ବଶୁର ଘର ଲୋକେ ବୋହୁ ବୋଲି ଗ୍ରହଣ ମଧ୍ୟ କରୁନଥିଲେ । ବିବାହ କରି ମଥାରେ ସିନ୍ଦୁର ପିନ୍ଧି ଶଙ୍କରଙ୍କୁ ସ୍ବାମୀ ଭାବେ ଗ୍ରହଣ କରିବା ପରେ ସବିତା ନିଜ ବାପଘରେ ଆଉ ରହିବାକୁ ଚାହିଁଲେ ନାହିଁ ।
ସ୍ବାମୀ ଶଙ୍କର ବିଦେଶରୁ ଫେରିବା ପରେ ସବିତାଙ୍କୁ ସାଙ୍ଗରେ ଧରି ନିଜ ଘରକୁ ଆସିଥିଲେ । ସବିତାକୁ ବାହାରେ ଛିଡା କରାଇ ଶଙ୍କର ଘର ଭିତରକୁ ଯାଇ ଭିତରପଟୁ ବନ୍ଦ କରି ଦେଇଥିଲେ । ଏବଂ କିଛି ସମୟ ମଧ୍ୟରେ ଗାଁ ଛାଡି କୁଆଡେ ପଳେଇ ଯାଇଥିଲେ । ଇତିମଧ୍ୟରେ ଶ୍ୱଶୁର ଘରଲୋକେ ସବିତାକୁ ଘରକୁ ପୁରେଇ ଦେଇନଥିଲେ । ବରଂ ବିଚ୍ ରାସ୍ତାରେ ସବିତାଙ୍କୁ ମାଡ ମାରିବା ସହିତ ଜୀବନରୁ ମାରି ଦେବାକୁ ଉଦ୍ୟମ କରାଯାଇଥିବା ଅଭିଯୋଗ କରିଛନ୍ତି । ଶେଷରେ ନିରୁପାଇ ହୋଇ ସବିତା ପ୍ରେମିକ ଶଙ୍କରଙ୍କ ଦୁଆରେ ସ୍ତ୍ରୀର ମାନ୍ୟତା ଦାବିରେ ଅନଶନରେ ବସିଥିଲେ । କୌଣସି ସୂତ୍ରରୁ ଖବର ପାଇ ପୁଲିସି ସବିତାଙ୍କୁ ଭେଟି ଅନଶନରୁ ନିବୃତ ହୋଇ ଥାନାରେ ଏତଲା ଦେବାକୁ ପରାମର୍ଶ ଦେଇଥିଲେ । ତଦନୁଯାଇ ସବିତା ବିବାହର ପ୍ରମାଣ ପତ୍ର ସହିତ ଥାନାରେ ଏତଲା ଦେଇଥିବା ଜଣାଯାଇଛି । ଅନ୍ୟପଟେ ଶଙ୍କରଙ୍କ ମାଆଙ୍କ ପକ୍ଷରୁ ଥାନାରେ ଅନ୍ୟ ଏକ ଏତଲା ମଧ୍ୟ ହୋଇଛି । ଉଭୟ ପକ୍ଷରୁ ଥାନାକୁ ଡକାଯାଇଛି । ତଦନ୍ତ ପରେ ବିହିତ ପଦକ୍ଷେପ ନିଆଯିବ ବୋଲି ଥାନାଧିକାରୀ ସୂଚନା ଦେଇଛନ୍ତି । ଅନ୍ୟପଟେ ପରିସ୍ଥିତିକୁ ମୁକାବିଲା କରିବାରେ ବିଫଳ ହୋଇ ଶଙ୍କର ଫେରାର୍ ହୋଇଥିବା ସୂଚନା ମିଳିଛି ।
ଭଦ୍ରକରୁ ଦେବାଶିଷ ମହାପାତ୍ର,ଇଟିଭି ଭାରତ
