ଭଦ୍ରକ: ଚାନ୍ଦବାଲି ନିର୍ବାଚନ ମଣ୍ଡଳୀର ଯୁବ ବିଧାୟକ ବ୍ୟୋମକେଶ ରାୟଙ୍କ ପତ୍ନୀ ନୀଳିମା ରାୟଙ୍କ ବିୟୋଗ ହୋଇଛି । ରବିବାର ଭୁବନେଶ୍ଵର ସ୍ଥିତ ଏକ ଘରୋଇ ହସ୍ପିଟାଲରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । ଖବର ଅନୁଯାୟୀ କିଛି ଦିନ ତଳେ ନୀଳିମାଙ୍କ ଏକ ଅସ୍ତ୍ରୋପଚାର କରାଯାଇଥିଲା ।
ଏହାପରେ ସେ ସୁସ୍ଥ ଥିଲେ। ହେଲେ ହଠାତ ପୁଣିଥରେ ଅସୁସ୍ଥତା ଅନୁଭବ କରିବାରୁ ତୁରନ୍ତ ତାଙ୍କୁ ଭୁବନେଶ୍ଵର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ହେଲେ ଚିକିତ୍ସାଧିନ ଅବସ୍ଥାରେ ତାଙ୍କ ସ୍ଵାସ୍ଥ୍ୟାବସ୍ଥାରେ ଅବନତି ଘଟି ସଙ୍କଟାପନ୍ନ ହୋଇଯାଇଥିଲେ । ଡାକ୍ତରଙ୍କ ସମସ୍ତ ପ୍ରଚେଷ୍ଟା ସତ୍ତ୍ବେ ନିଳିମାଙ୍କ ସ୍ବାସ୍ଥ୍ୟାବସ୍ଥା ସୁଧୁରିନଥିଲା । ରବିବାର ତାଙ୍କର ମୃତ୍ୟୁ ଘଟିଛି ।
ସୂଚନାଯୋଗ୍ୟ 2014 ମସିହାରେ ବ୍ୟୋମକେଶ ରାୟ ପ୍ରଥମ ଥର ଚାନ୍ଦବାଲି ବିଧାନସଭା ନିର୍ବାଚନମଣ୍ଡଳୀ ରୁ ବିଧାୟକ ଭାବେ ନିର୍ବାଚିତ ହେବାର କିଛି ମାସ ପୂର୍ବରୁ ନୀଳିମାଙ୍କ ସହ ବିବାହ କରଥିଲେ । ରବିବାର ଏହି ଦୁଃଖଦ ଖବର ଜଣାପଡିବା ପରେ ଚାନ୍ଦବାଲି ସମେତ ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
