ବରଗଡ଼: 60ତମ ସାହାଣୀ ଫୁଟବଲ କପ ଚଳିତବର୍ଷ ଡିସେମ୍ବର 3 ତାରିଖରୁ ବରଗଡ଼ରେ ଆରମ୍ଭ ହୋଇଯାଇଛି । ସାହାଣୀ କପର ଏହି ଆନ୍ତଃଜିଲ୍ଲା ଫୁଟବଲ ଚାମ୍ପିଆନସିପରେ ଭୁବନେଶ୍ବର, ରାଉରକେଲା, ଢେଙ୍କାନାଳ, ସୁନ୍ଦରଗଡ ସହିତ ରାଜ୍ୟର 60ଟି ଫୁଟବଲ ଟିମ ଅଂଶଗ୍ରହଣ କରିଛନ୍ତି । ସାହାଣୀ କପ ଆନ୍ତଃଜିଲ୍ଲା ଫୁଟବଲ ଚାମ୍ପିଆନସିପର ସେମିଫାଇନାଲ ପ୍ରତିଯୋଗିତା ବୁଧବାର ବରଗଡ଼ ଲେଙ୍ଗୁ ମିଶ୍ର ଷ୍ଟାଡିୟମ ଠାରେ ବରଗଡ଼ ଓ ସୁନ୍ଦରଗଡ ମଧ୍ୟରେ ହୋଇଥିଲା ଏବଂ ଏହି ମ୍ୟାଚରେ ସୁନ୍ଦରଗଡ ଟିମ ବରଗଡ଼ ଟିମକୁ 4-0 ଗୋଲରେ ପରାଜିତ କରିଛି ।
ଚଳିତ ବର୍ଷ ସାହାଣୀ କପ ଫୁଟବଲ ଚାମ୍ପିଆନସିପରେ ବରଗଡ଼ ଜିଲ୍ଲାର 3ଟି ଜୋନରେ ଚାଲିଥିବା ବେଳେ ଢେଙ୍କାନାଳର ଗୋଟିଏ ଜୋନରେ ମଧ୍ୟ ଏହି ପ୍ରତିଯୋଗିତା ହେଉଛି । ତେବେ ବୁଧବାର ସେମିଫାଇନାଲରେ ବରଗଡ଼କୁ ପରାଜିତ କରି ସୁନ୍ଦରଗଡ଼ ଟିମ ବିଜୟୀ ହୋଇଥିବା ବେଳେ ଢେଙ୍କାନାଳ ଜୋନରୁ ରାଉରକେଲା ଟିମ ବିଜୟୀ ହୋଇଛି । ଉଭୟ ଟିମ ଆସନ୍ତା 13 ତାରିଖରେ ହେବାକୁ ଥିବା ଫାଇନାଲ ମ୍ୟାଚରେ ପରସ୍ପରଙ୍କୁ ବରଗଡ ଲେଙ୍ଗୁ ମିଶ୍ର ଷ୍ଟାଡିୟମରେ ଭେଟିବେ ।ବରଗଡ ଜିଲ୍ଲା ଆଥେଲେଟିକ ଆସୋସିଏସନ ପକ୍ଷରୁ ପରିଚାଳନା କରାଯାଉଥିବା ଏହି ସାହାଣୀ ଫୁଟବଲ ଟୁରନାମେଣ୍ଟ ଦେଖିବା ପାଇଁ ବହୁ ସଂଖ୍ୟାରେ ଫୁଟବଲ ପ୍ରେମୀଙ୍କ ଭିଡ ଲାଗିଥିଲା ପଡିଆରେ । ତେବେ ଆସନ୍ତା 13 ତାରିଖରେ ହେବାକୁ ଥିବା ଫାଇନାଲ ମ୍ୟାଚରେ ଦର୍ଶକଙ୍କ ପ୍ରଚୁର ଭିଡ ହେବାର ସମ୍ଭାବନା ରହିଥିବା କହିଛନ୍ତି ଜିଲ୍ଲା କ୍ରିଡା ସଂସଦର ସାଧାରଣ ସମ୍ପାଦକ କିଶୋର ମିଶ୍ର ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
