ବରଗଡ: ମତଦାନ ପୂର୍ବରୁ ବିଜେପୁର ନିର୍ବାଚନମଣ୍ଡଳୀରେ ଦେଖିବାକୁ ମିଳିଛି ପ୍ରାକ୍ ନିର୍ବାଚନୀ ହିଂସା । ଏଠାକାର ବିଜେପି ପ୍ରାର୍ଥୀ ସନଥ ଗଡ଼ତିଆଙ୍କ ଉପରେ ବିଜେଡ଼ି ଦଳର କିଛି କର୍ମୀ ଆକ୍ରମଣ କରିଥିବା ଘଟଣା ଏବେ ସାମ୍ନାକୁ ଆସିଛି ।
ବିଜେପୁର ବ୍ଲକର କନ୍ଧରା ଗ୍ରାମରେ ବିଜେପି ପ୍ରାର୍ଥୀ ସନତ ଗଡ଼ତିଆ ଗାଡ଼ିରେ ଯାଉଥିବା ବେଳେ ତାଙ୍କ ଉପରକୁ ଇଟା ଓ ପଥର ଫିଙ୍ଗି ଆକ୍ରମଣ କରିଥିବା ନେଇ ଅଭିଯୋଗ ହୋଇଛି । ଏ ନେଇ ସେ ବିଜେପୁର ଥାନାରେ ଲିଖିତ ଅଭିଯୋଗ କରିଛନ୍ତି । ଏପରି ଆକ୍ରମଣକୁ ଗ୍ରାମବାସୀ ନିନ୍ଦା କରିଥିବା ବେଳେ ଏହାକୁ ନେଇ ଗ୍ରାମରେ ଉତ୍ତେଜନା ଦେଖାଦେଇଛି ।
ଏହି ଆକ୍ରମଣରେ ସନତଙ୍କ ଗାଡିର ଆଗପଟ କାଚ ଭାଙ୍ଗି ଯାଇଥିବା ବେଳେ ସେ ଅଳ୍ପକେ ବର୍ତ୍ତିଯାଇଛନ୍ତି । ନିର୍ବାଚନ ପୂର୍ବରୁ ବିଜେଡ଼ିର ଏପରି ଆକ୍ରମଣ ଦଳୀୟ ସମର୍ଥକଙ୍କୁ ଭୟଭୀତ କରିବା ପାଇଁ କରାଯାଇଥିବା ସନ୍ଦେହ କରୁଛି ବିଜେପି । ମୁଖ୍ୟମନ୍ତ୍ରୀଙ୍କ ଲୋକେ ଏପରି କାର୍ଯ୍ୟ କରିବା ଦୁଃଖର ବିଷୟ । ଆଜିଠାରୁ ଯଦି ଏପରି ହେଲାଣି ତେବେ ଆଗକୁ କଣ ନ ହେବ ବୋଲି ଲୋକେ ଆଲୋଚନା କରିବା ଆରମ୍ଭ କରି ଦେଲେଣି ।
ବରଗଡରୁ ରାଜେଶ ସରାପ, ଇଟିଭି ଭାରତ
