ବରଗଡ: ଟ୍ରେନରେ କଟି ଚାଲିଗଲା ୮୨ ବର୍ଷୀୟ ବୃଦ୍ଧଙ୍କ ଜୀବନ । ବରଗଡ ଜିଲ୍ଲା ବରପାଲି ରେଳ ଫାଟକ ପାର୍ କରୁଥିବା ବେଳେ ଗତକାଲି(ବୁଧବାର) ଟ୍ରେନରେ କଟି ଜଣେ ବୃଦ୍ଧଙ୍କ ମୃତ୍ୟୁ ହୋଇଛି(Old Man Died In Train Accident) । ମୃତକଙ୍କ ଘର ବରପାଲିରେ ହୋଇଥିବା ଜଣାପଡିଛି । ପୋଲିସ ବୃଦ୍ଧଙ୍କ ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛି ।
ସୂଚନା ଅନୁଯାୟୀ, ବରପାଲି ରେଳୱେ କ୍ରସିଂରେ ଗେଟ୍ ପଡ଼ିଥିଲା ଓ ଲୋକେ ଟ୍ରେନ ଯିବାର ଅପେକ୍ଷା କରିଥିଲେ । ଗୋଟେ ଟ୍ରେନ ଗଲାପରେ ଅନ୍ୟ ଏକ ଟ୍ରେନ ଆସିବାର ଥିବାରୁ ଗେଟ୍ ଖୋଲାଯାଇ ନଥିଲା । ମାତ୍ର ବୃଦ୍ଧ ଜଣକ ଗେଟ ପାର କରି ଅନ୍ୟପଟକୁ ଯିବାକୁ ଚେଷ୍ଟା କରିଥିଲେ । ହେଲେ ଦୁର୍ଭାଗ୍ୟ ବଶତଃ ଏତିକି ବେଳେ ଟ୍ରେନଟି ବୃଦ୍ଧଙ୍କ ଉପରେ ମାଡି ଯାଇଥିଲା । ତେବେ ବୃଦ୍ଧଙ୍କ ମୃତଦେହ ବ୍ୟବଚ୍ଛେଦ ପରେ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା ସୂଚନା ମିଳିଛି ।
ଇଟିଭି ଭାରତ, ବରଗଡ
