ବାଲେଶ୍ବର: ଅକ୍ଟୋବର ୩୧ ତାରିଖ ଠାରୁ ଓଡିଶାରେ ଆରମ୍ଭ ହେବ ଭାରତ ଯୋଡ଼ ପଦ ଯାତ୍ରା (Bharat Jodo Yatra in Odisha) । ଭୁବନେଶ୍ବର ଇନ୍ଦିରା ଗାନ୍ଧୀ ପାର୍କ (IG Park)ରୁ ଯାତ୍ରା ଆରମ୍ଭ ହେବ ବୋଲି ସୂଚନା ରହିଛି । ଏହି କ୍ରମରେ ନଭେମ୍ବର ଦ୍ଵିତୀୟ ସପ୍ତାହରେ ଉତ୍ତର ବାଲେଶ୍ଵରରେ ଏହି ଯାତ୍ରା ହେବ । ଏନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ପୂର୍ବତନ ମନ୍ତ୍ରୀ ଗଣେଶ୍ୱର ବେହେରା ।
ଏହା ମଧ୍ୟ ପଢନ୍ତୁ: Bharat Jodo Yatra: ଓଡିଶା ଆସିବେ ନାହିଁ ରାହୁଲ, କାରଣ କହିଲେ ପିସିସି ସଭାପତି
ଏହିଯାତ୍ରା ଜାନୁୟାରୀ ୩୦ରେ ସରିବ । ଏଥିରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଦୋଷ ଦୁର୍ବଳତା କହିବା ସହ ଲୋକଙ୍କ ସମର୍ଥନ ଲୋଡିବ କଂଗ୍ରେସ । ଓଡ଼ିଶାରେ କିଛି ନିର୍ଦ୍ଦିଷ୍ଟ ପ୍ରସଙ୍ଗ, ଆଞ୍ଚଳିକ ବୈଷମ୍ୟ ତାକୁ ନେଇ କଂଗ୍ରେସ ବଡ ଧରଣର ଜନ ଆନ୍ଦୋଳନ କରିବ । ଓଡ଼ିଶାରେ ସମ ଭିତ୍ତିକ ବିକାଶ ହେଉ ନାହିଁ । ଉତ୍ତର ଓଡ଼ିଶାରେ ସେହିପରି ଅନେକ ସମସ୍ୟା ରହିଛି । ସୁବର୍ଣ୍ଣରେଖା ନଦୀରେ ସବୁବେଳେ ବନ୍ୟା ଆସୁଛି । ସୁବର୍ଣ୍ଣରେଖା ସଂସ୍କାରକୁ ଅଣଦେଖା କରାଯାଉଛି । ଶିଳ୍ପ ଧୀରେ ଧୀରେ ବନ୍ଦ ହେବାକୁ ବସିଲାଣି । ଅନେକ ଶିଳ୍ପ ଭୂତ କୋଠି ପାଲଟିବା ସହ ଲୋକଙ୍କ ନିଯୁକ୍ତି କମିବାରେ ଲାଗିଛି । ଏପରିକି ଲୋକଙ୍କ ମୁଣ୍ଡପିଛା ଆୟ ମଧ୍ୟ କମିଛି । ବାଲେଶ୍ଵରରେ ଏସବୁ ସମସ୍ୟାକୁ ନେଇ କଂଗ୍ରେସ ଭାରତ ଯୋଡ଼ ଯାତ୍ରାକୁ ସଫଳ କରିବା ନେଇ ଆଶାବାଦୀ ରହିଛି ।
ପୂର୍ବତନ ମନ୍ତ୍ରୀ ଗଣେଶ୍ୱର ବେହେରା କହିଛନ୍ତି ଯେ, "ଅକ୍ଟୋବର ୩୧ ତାରିଖ ଠାରୁ ଓଡିଶାରେ ଆରମ୍ଭ ହେବ ଭାରତ ଯୋଡ଼ ପଦ ଯାତ୍ରା (Bharat Jodo Yatra in Odisha) ।ନଭେମ୍ବର ଦ୍ଵିତୀୟ ସପ୍ତାହରେ ଉତ୍ତର ବାଲେଶ୍ଵରରେ ଏହି ଯାତ୍ରା ହେବ । ଆମେ ଯାହା ଦେଖୁିଛୁ ଏହା ଏକ ଅବହେଳିତ ଅଞ୍ଚଳ । ୨୨ ବର୍ଷ ଶାସନରେ ଏହି ଅଞ୍ଚଳକୁ ଦୃଷ୍ଟି ଦେଉନାହାନ୍ତି ସରକାର । ଜିଲ୍ଲାରେ ଗୋଟିଏ ପରେ ଗୋଟିଏ ଶିଳ୍ପ ବନ୍ଦ ହେବାକୁ ବସିଛି । ଫଳରେ ଚାଷୀ ସହ ଦାଦନ ଶ୍ରମିକଙ୍କ ସଂଖ୍ୟା ବଢୁଛି । ଏହି ପରିସ୍ଥିତିରେ ସରକାରଙ୍କ ନିଦ ଭାଙ୍ଗିବା ଦରକାର । ଅବହେଳାର ଅନ୍ତ ଘଟୁ, ଆଞ୍ଚଳିକ ବୈଷମ୍ଯ ଦୂର ହେଉ, ଆମର ସମ ଭିତ୍ତିକ ବିକାଶ ସହ ଅସମତା ଦୂର ହେଉ ଏହି ସବୁ ପ୍ରସଙ୍ଗକୁ ଆଧରକରି ଏହି ଯାତ୍ରା ପରିକଳ୍ପନା କରାଯାଇଛି ।"
ଇଟିଭି ଭାରତ, ବାଲେଶ୍ବର
