ବାଲେଶ୍ବର: ଗୁଜୁରାଟର ସୁରଟ ସହରରେ ଥିବା ଏକ କୋଚିଂ ସେଣ୍ଟରରେ ଅଗ୍ନିକାଣ୍ଡ ଘଟଣା ପୁରା ଦେଶକୁ ଦୋହଲାଇ ଦେଇଥିବାବେଳେ ଏବେ ସବୁ ମହଲର ଦାୟିତ୍ବକୁ ବଢାଇ ଦେଇଛି । ବିଶେଷ ଭାବେ ଅଗ୍ନି ନିରାପତ୍ତା ବ୍ୟବସ୍ଥା ଠିକ ନଥିବାରୁ ଅନେକ ଜୀବନ ଅକାଳରେ ଚାଲି ଯାଇଥିଲା । ଯାହାକୁ ନେଇ ଏବେ ଓଡିଶା ଅଗ୍ନିଶମ ବିଭାଗ ବିଭିନ୍ନ କୋଚିଂ ସେଣ୍ଟର ଉପରେ ପର୍ଯ୍ୟାୟ କ୍ରମେ ଚଢ଼ାଉ କରିବା ସହ ସଚେତନ କରାଉଥିବା ଦେଖିବାକୁ ମିଳିଛି ।
ଏହି କ୍ରମରେ ଆଜି ବାଲେଶ୍ବର ସହରରେ ଥିବା ବିଭିନ୍ନ କୋଚିଂ ସେଣ୍ଟର ଉପରେ ଅଗ୍ନିଶମ ବିଭାଗ ଚଢ଼ାଉ କରିଥିବା ଦେଖିବାକୁ ମିଳିଥିଲା । 10ଟି ପ୍ରମୁଖ କୋଚିଂ ସେଣ୍ଟରରେ 10ଟି ଟିମ ଦ୍ବାରା ଚଢ଼ାଉ କରାଯାଇ ଅଗ୍ନି ନିରାପତ୍ତା ଯାଞ୍ଚ କରାଯାଇଥିଲା । ଏହାସହ କୋଚିଂ ସେଣ୍ଟରରେ ଥିବା ଛାତ୍ରଛାତ୍ରୀଙ୍କୁ ଅଗ୍ନିକାଣ୍ଡରେ କେମିତି ସୁରକ୍ଷିତ ଭାବେ ନିଜ ଜୀବନକୁ ବଞ୍ଚାଇପାରିବେ ସେନେଇ ସଚେତନ କରାଇଥିଲେ ।
କୋଚିଂ ସେଣ୍ଟର ଗୁଡିକରେ ନିର୍ଦ୍ଧାରିତ ସମୟ ସୀମା ଭିତରେ ଅଗ୍ନି ନିରାପତ୍ତା ବ୍ୟବସ୍ଥା କରିବା ପାଇଁ ନିର୍ଦ୍ଦେଶ ଦିଆଯାଇଥିବା ଜଣାପଡିଛି । ଏହି ନିର୍ଦ୍ଦେଶକୁ ବେଖାତିର କଲେ ସମ୍ପୃକ୍ତ କୋଚିଂ ସେଣ୍ଟର ଉପରେ ଆଇନଗତ କାର୍ଯ୍ୟାନୁଷ୍ଠାନ ସହ କୋଚିଂ ସେଣ୍ଟର ବନ୍ଦ ଭଳି କାର୍ଯ୍ୟାନୁଷ୍ଠାନ ନିଆଯିବ ବୋଲି ଅଗ୍ନିଶମ ଅଧିକାରୀ କହିଛନ୍ତି । ପ୍ରକାଶ ଥାଉକି, ବାଲେଶ୍ବର ସହରରେ ହୋଇଥିବା ଚଢ଼ାଉରେ କୌଣସି କୋଚିଂ ସେଣ୍ଟରରେ ଅଗ୍ନି ନିରାପତ୍ତା ବ୍ୟବସ୍ଥା ନଥିବା ତଦନ୍ତକାରୀ ଟିମ ପ୍ରକାଶ କରିଛନ୍ତି ।
ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ
