ବଲାଙ୍ଗୀର: କଥାରେ ଅଛି ଝିମିଟି ଖେଳରୁ ମହାଭାରତ । ସେହିପରି ଛୋଟ ଛୁଆଙ୍କ କଳିରୁ ଯୁବକଙ୍କୁ ହତ୍ୟା ଅଭିଯୋଗ । ଘଟଣାସ୍ଥଳରେ ପୋଲିସର ତଦନ୍ତ ଜାରି । ବଲାଙ୍ଗୀରରେ ସାମାନ୍ୟ ଛୁଆଙ୍କ କଳିରୁ ଗଣ୍ଡଗୋଳ ଘଟି ଜଣଙ୍କୁ ହତ୍ୟା କରା ଯାଇଥିବାର ଅଭିଯୋଗ ହୋଇଛି ।
ବଲାଙ୍ଗୀର ଖପ୍ରାଖୋଲ ବ୍ଲକ ଅନ୍ତର୍ଗତ ଲାରମ୍ଭା ଥାନା ଲୁହାସୀଙ୍ଗା ଗ୍ରାମରେ ଏହି ଘଟଣା ଘଟିଛି । ଏହି ଗ୍ରାମରେ ରହୁଥିବା ମୁକେଶ ସୁନା ଓ ଆଲୋକ ରାଜହଂସଙ୍କ ପିଲା ମାନଙ୍କ ମଧ୍ୟରେ କୌଣସି କାରଣରୁ ଝଗଡା ହୋଇଥିଲା । ଯାହାକୁ ନେଇ ଆଲୋକ ରାଜହଂସ ମୁକେଶ ସୁନାର ଶିଶୁ ମାନଙ୍କୁ ଗାଳି କରିଥିଲେ ।
ତେବେ ଏଥିରେ କ୍ରୋଧିତ ହୋଇ ମୁକେଶ ସୁନା ଏକ ଧାରୁଆ ଅସ୍ତ୍ରରେ ଆଲୋକଙ୍କୁ ଆକ୍ରମଣ କରିଥିଲା । ଆଲୋକ ଗୁରୁତର ଆହତ ହୋଇଥିବା ବେଳେ ତାଙ୍କୁ ଡାକ୍ତରଖାନା ନିଆଯାଇଥିଲା । ହସ୍ପିଟାଲରେ ପହଁଚିବା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ ଲରମ୍ଭା ଥାନାରେ ଏକ ହତ୍ୟା ମାମଲା ରୁଜୁ ହୋଇ ଅଧିକ ତଦନ୍ତ ଜାରି ରଖିଛି ପୁଲିସ । ଅଭିଯୁକ୍ତ ମୁକେଶକୁ ଅଟକ ରଖି ପଚରା ଉଚରା ଜାରି ରଖିଛି ।
ବଲାଙ୍ଗୀରରୁ ସେଖ୍ ମହମ୍ମଦ ଓ୍ବାହିଦ, ଇଟିଭି ଭାରତ
