ବଲାଙ୍ଗୀର: ବୁଧବାର ସମଗ୍ର ପଶ୍ଚିମ ଓଡିଶା ବନ୍ଦ ଡାକରା ଦିଆଯାଇଛି । ଓଡିଶା ବାର କାଉନ୍ସିଲ ପଶ୍ଚିମ ଓଡିଶାର ସବୁ ଓକିଲ ସଂଘ ବିରୋଧରେ ଆକ୍ରୋଶ ମୂଳକ ପଦକ୍ଷେପ ନେଇ ଓକିଲଙ୍କ ଲାଇସେନ୍ସ ରଦ୍ଦ ଭଳି ପଦକ୍ଷେପ ନେବାର ନୋଟିସକୁ ବିରୋଧ କରି ସମଗ୍ର ପଶ୍ଚିମ ଓଡିଶା ବନ୍ଦ ଡାକରା ଦିଆଯାଇଥିବାବେଳେ ବଲାଙ୍ଗୀର ଜିଲ୍ଲା ମଧ୍ୟ ସମ୍ପୂର୍ଣ୍ଣ ବନ୍ଦ ରହିଛି ।
ବଲାଙ୍ଗୀର ଓକିଲ ସଂଘ, ଜିଲ୍ଲା କଂଗ୍ରେସ ଦଳ, କୋଶଳ ସମନ୍ବୟ ସଂଗଠନ, ବଲାଙ୍ଗୀର କ୍ରିୟାନୁଷ୍ଠାନ କମିଟି ଭଳି ସଂଗଠନ ମାନେ ମିଳିତ ଭାବରେ ଏହି ବନ୍ଦ ଡାକରା ଦେଇଛନ୍ତି । ଯାହାକୁ ସବୁ ଓକିଲ ସଂଘ ଓ ବିଭିନ୍ନ ଅନୁଷ୍ଠାନ ସମର୍ଥନ କରିଥିବା ବେଳେ ବଲାଙ୍ଗୀରରେ ଗାଡି ଚଳାଚଳ, ଦୋକାନ ବଜାର ଓ ସରକାରୀ ବେସରକାରୀ ଅନୁଷ୍ଠାନ ସମ୍ପୂର୍ଣ୍ଣ ବନ୍ଦ ରହିଛି ।
ସେପଟେ ସମସ୍ତେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି । ତେବେ ପୂର୍ବ ଓଡ଼ିଶାର ଓକିଲମାନେ ଏଠାରେ ହାଇକୋର୍ଟ ବେଞ୍ଚ ସ୍ଥାପନକୁ ବିରୋଧ କରି ଏହି ପଦକ୍ଷେପ ନେଇଛନ୍ତି ବୋଲି ଆନ୍ଦୋଳନକାରୀ ଅଭିଯୋଗ କରିଥିବା ବେଳେ ସାମ୍ବିଧାନିକ ଦାବିକୁ ଚାପି ଦେବାର ଉଦ୍ୟମ କରି ଏହିଭଳି ପଦକ୍ଷେପ ଓଡିଶା ବାର କାଉନ୍ସିଲ ନେଉଛି ବୋଲି ଏମାନେ ଅଭିଯୋଗ କରିଛନ୍ତି ।
ତେବେ ଆଗାମୀ ଦିନରେ ପରିସ୍ଥିତି ଏହିଭଳି ରହିଲେ ଏମାନେ ସମସ୍ତେ ଅଲଗା ରାଜ୍ୟ ଦାବି କରିବୁ ଓ ଓକିଲମାନେ ସମୂହ ଭାବରେ ଲାଇସେନ୍ସ ଫେରାଇବେ ବୋଲି କହିଛନ୍ତି ।
ବଲାଙ୍ଗୀରରୁ ଶେଖ୍ ମହମ୍ମଦ ୱାହିଦ୍, ଇଟିଭି ଭାରତ
