ଅନୁଗୋଳ: ତାଳଚେର କୋଇଲା ଖଣିରେ ଅଚଳାବସ୍ଥା । ବନ୍ଦ ହୋଇପଡିଛି ଏମସିଏଲ ଅଧିନରେ ଥିବା 8ଟି କୋଇଲା ଖଣି । ଖଣିରେ ଅଖଚକ ସବୁ ବନ୍ଦ । ଖଣ୍ଡଟିଏ ବି କୋଇଲା ଖୋଳା ହେଉନାହିଁ କି କେଉଁଠାକୁ ପଠାଯାଉନାହିଁ । ଭରତପୁର କୋଇଲା ଖଣି ଦୁର୍ଘଟଣା ପରେ ଲାଗି ରହିଛି ଏପରି ସ୍ଥିତି । କ୍ଷତିପୂରଣ ଓ ଶ୍ରମିକ ସୁରକ୍ଷା ଦାବିରେ ମୃତ ଶ୍ରମିକଙ୍କ ପରିବାର ଓ ଗାଁ ଲୋକଙ୍କ ଖଣି ବନ୍ଦ ଆନ୍ଦୋଳନ ଯୋଗୁଁ 15 ଦିନ ହେବ ସବୁ ଅଚଳ ହୋଇପଡିଛି । ଫଳରେ 234.72 କୋଟି ଟଙ୍କାର କ୍ଷତି ସହିଲାଣି ଏମସିଏଲ । ଦେଶରେ 3772.31 ମିଲିୟନ ୟୁନିଟ ବିଜୁଳି ଉତ୍ପାଦନ ହୋଇପାରିନାହିଁ । ଏପଟେ ସ୍ଥିତିରେ ସୁଧାର ଲାଗି ଦାବି ହେଲାଣି ।
ସେପଟେ ୧୫ ଦିନରେ ରାଜ୍ୟ ଓ କେନ୍ଦ୍ର ସରକାର ୧୫୨.୦୬ କୋଟି ଟଙ୍କାର ରାଜସ୍ବ ହରାଇଲେଣି । ଖଣି ବନ୍ଦ ଆନ୍ଦୋଳନ ଯୋଗୁଁ ପ୍ରାୟ ୩୦ ହଜାର ଶ୍ରମିକ ଏବେ ଜୀବିକା ହରାଇଛନ୍ତି । ପରୋକ୍ଷରେ ଖଣି ଉପରେ ନିର୍ଭର କରୁଥିବା ୫୦ ହଜାରରୁ ଅଧିକ ଲୋକ ପ୍ରଭାବିତ ହେଲେଣି । କୋଇଲା ଅଭାବରୁ ତାପଜ ବିଦ୍ୟୁତ କେନ୍ଦ୍ର NTPCର ଚାରୋଟି ୟୁନିଟ ବନ୍ଦ ହୋଇଛି । ଅନ୍ୟତମ ବୃହତ ଶିଳ୍ପ ନାଲକୋ ଓ TTPSରେ ମଧ୍ୟ ସମାନ ସ୍ଥିତି । ସେହିଭଳି ଅନ୍ୟ ଘରୋଇ ତାପଜ ବିଦ୍ୟୁତ କେନ୍ଦ୍ରକୁ ମଧ୍ୟ ପହଞ୍ଚି ପାରୁନାହିଁ କୋଇଲା । କେବଳ ରାଜ୍ୟ ନୁହେଁ ଦେଶର ଆନ୍ଧ୍ରପ୍ରଦେଶର ଜେନକୋ, ପିଡିସିଏଲ, ତାମିଲନାଡ଼ୁର ଜେଡକୋ, ଏନଟିଇଏଲ ଓ କର୍ଣ୍ଣାଟକର କେପିସିଏଲ ତାପଜ ବିଦ୍ୟୁତ କେନ୍ଦ୍ରରୁ ବିଦ୍ୟୁତ ଉତ୍ପାଦନ ଆଶାତୀତ ଭାବେ କମିଯାଇଛି । ସ୍ଥିତିରେ ସୁଧାର ପାଇଁ ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଉଛି ।
ତେବେ ଏଭଳି ସ୍ଥିତି ଲାଗି ରହିଲେ କୋଇଲା ଭିତ୍ତିକ ଶିଳ୍ପ ସଂସ୍ଥା ପ୍ରଭାବିତ ହେବା ସହ ବିଜୁଳି ଉତ୍ପାଦନ ଠପ୍ ହୋଇଯିବ । ଯାହାର ପରିଣାମ ସମସ୍ତେ ଭୋଗିବେ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
