ଅନୁଗୋଳ: ସହର ଦେଇ ଯାଇଥିବା ୫୫ନମ୍ବର ଜାତୀୟ ରାଜପଥ ଏକ ମୃତ୍ୟୁର ପଥ ପାଲଟିଛି । ପଞ୍ଚମହଲା ଠାରୁ ବଅଁରପାଳ ପର୍ଯ୍ୟନ୍ତ ୧୨କିମି ରାସ୍ତା ଯିବାକୁ ଦୁଇ ଘଣ୍ଟାରୁ ଅଧିକ ସମୟ ଲାଗୁଛି। ଏନେଇ ବାରମ୍ବାର ପ୍ରଶାସନକୁ ଅଭିଯୋଗ କଲେ ମଧ୍ୟ କୌଣସି ସୁଫଳ ମିଳୁନାହିଁ । ଏହାର ପ୍ରତିବାଦରେ ଅନୁଗୁଳ ଜିଲ୍ଲା ଜନ ଜୀବନ ସୁରକ୍ଷା କମିଟି ତୁରନ୍ତ ଏହି ରାସ୍ତାର ମରାମତି ଦାବି କରିଛି । ଦାବି ପୂରଣ ନହେଲେ ଆଗାମୀ ଦିନରେ ଅନୁଗୋଳ ବନ୍ଦ ଡାକରା ଦେବାକୁ ଚେତାବନୀ ଦେଇଛନ୍ତି ।
ଏନେଇ କମିଟିର ଏକ ଗୁରୁତ୍ୱପୂର୍ଣ୍ଣ ସମାଗମ ହୋଇଥିଲା। ଏଥିରେ ଜିଲ୍ଲାର ବିଭିନ୍ନ ବର୍ଗର ଶତାଧିକ ବ୍ୟକ୍ତି ଯୋଗ ଦେଇଥିଲେ। କମିଟି ତରଫରୁ ଜିଲ୍ଲାପାଳଙ୍କୁ ସାତ ଦିନିଆ ନୋଟିସ ଦିଆଯିବା ନେଇ କୁହାଯାଇଛି । ସେହି ସମୟସୀମା ମଧ୍ୟରେ ତୁରନ୍ତ କାର୍ଯ୍ୟ ଆରମ୍ଭ କରାନଗଲେ ଆସନ୍ତା ୩୦ତାରିଖ ଠାରୁ ଜୋରଦାର ଆନ୍ଦୋଳନ କରାଯିବ । ଆବଶ୍ୟକ ପଡ଼ିଲେ ଜିଲ୍ଲା ବନ୍ଦ ଡାକରା ଦିଆଯିବ ବୋଲି ସମ୍ମିଳନୀରେ ନିଷ୍ପତ୍ତି ନିଆଯାଇଛି ।
ଏହାଛଡା ବିଦ୍ୟୁତ ଉପଭୋକ୍ତାଙ୍କ ଠାରୁ ଟାଟା କମ୍ପାନୀ ମନଇଚ୍ଛା ବିଲ ଆଦାୟ କରୁଥିବାରୁ ଏଥିପାଇଁ ମଧ୍ୟ କମିଟି ଆନ୍ଦୋଳନ କରିବ ବୋଲି ଚେତାବନୀ ଦେଇଛନ୍ତି । ଏହି ସମ୍ମିଳନୀରେ ଅଧ୍ୟାପକ, ଓକିଲ, ଶିକ୍ଷକ, ଡାକ୍ତର, ସ୍ବେଚ୍ଛାସେବୀ ଓ ଛାତ୍ରଛାତ୍ରୀ ଯୋଗ ଦେଇଥିଲେ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
