ଅନୁଗୋଳ: ପାଖାପାଖି 25 ଦିନ ହେବ ବନ୍ଦ ରହିଛି କୋଇଲା ଖଣି । କୋଇଲା ଲୋଡିଂ ବିବାଦକୁ ନେଇ ଏମସିଏଲର ବଳରାମ କୋଇଲା ଖଣିରେ ଏକ ରକମର ଅଚଳାବସ୍ଥା । ସେପଟେ କାମ ଧନ୍ଦା ନ ପାଇ ଆନ୍ଦୋଳନରେ ଗାଁ ଲୋକେ । ଜିଲ୍ଲାପାଳଙ୍କ ଅଫିସ ସମ୍ମୁଖରେ 5 ଦିନ ହେବ ଗଣଧାରଣା ଦେବା ସହ ଆଜି 5ଟି ଗାଁର ଲୋକେ ପ୍ରତିବାଦ ଓ ବିକ୍ଷୋଭ କରିଛନ୍ତି ।
ଅନୁଗୋଳ ଜିଲ୍ଲା ତାଳଚେର ଅଞ୍ଚଳରେ ଥିବା ଏମସିଏଲର କୋଇଲା ଖଣି ଅଞ୍ଚଳରେ ତୁଟୁନି ଅଡ଼ୁଆ । କୋଇଲା ଲୋଡିଂକୁ ନେଇ ଦୁଇ ଗାଁ ସୋଲଡା ଓ ଡଅଁରା ମଧ୍ୟରେ ଛକାପଞ୍ଝା ଭିତରେ 25 ଦିନ ହେବ ବନ୍ଦ ରହିଛି ବଳରାମ କୋଇଲା ଖଣି । ଫଳରେ ଜୀବିକା ହରାଇ ରାଜରାସ୍ତାରେ ପାଞ୍ଚୋଟି ଗାଁ ଲୋକେ । ପାଞ୍ଚ ଦିନ ହେବ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଧାରଣା ଦେବା ପରେ ଏବେ ଖଣି ସଂପୂର୍ଣ୍ଣ କାର୍ଯ୍ୟକ୍ଷମ କରାଇବା ପାଇଁ ସୋଲଡା ଗାଁ ସମେତ ସତ୍ୟବାଦୀପୁର, ନାଥଗାଁ, ତେଲିପୁର ଓ ଖୁରିଙ୍ଗାର ଗ୍ରାମବାସୀ ଦାବି କରି ଧାରଣାରେ ବସିଛନ୍ତି ।
ବଳରାମ କୋଇଲା ଖଣିରୁ ଲୋଡିଂ ନେଇ ଦୁଇ ଗାଁ ମଧ୍ୟରେ ବିବାଦ ବହୁ ପୁରୁଣା । ପୂର୍ବରୁ ଡଅଁରା ଗାଁ ପଟ ଖଣିରୁ ଖନନ ଚାଲିଥିବାରୁ ଏକଚାଟିଆ ଭାବେ ଡଅଁରା ଲୋକେ ହିଁ ଲୋଡିଂ କରୁଥିଲେ । ତେବେ ଏବେ ସୋଲଡା ଗାଁ ପଟ ଖଣି ଖନନ ହେଉଥିବାବେଳେ ଡଅଁରା ଗ୍ରାମବାସୀ ଏଠାରୁ ମଧ୍ୟ କୋଇଲା ଲୋଡିଂ କରିବାକୁ ଜିଦ ଧରିବା ସହ ଖଣି ବନ୍ଦ କରିଥିବା ଅଭିଯୋଗ ହୋଇଛି । ତେବେ ଏହାର ସମାଧାନ ଖୁବଶୀଘ୍ର କରାଯିବ ବୋଲି ଜିଲ୍ଲାପାଳ କହିଛନ୍ତି ।
ଏହାର ତୁରନ୍ତ ସମାଧାନ ନହେଲେ ଖଣିକୁ ଜମି ଦେଇ ଲୋଡିଂ ଉପରେ ନିର୍ଭର କରି ଚଳୁଥିବା ଏହି ଲୋକମାନଙ୍କର ଆର୍ଥିକ ମେରୁଦଣ୍ଡ ଦୋହଲିଯିବ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
