ଅନୁଗୋଳ: ଜିଲ୍ଲା ଖଣିଜ ପାଣ୍ଠି ପରିଚାଳନା କମିଟିର ବୈଠକ ଅନୁଷ୍ଠିତ ହୋଇଯାଇଛି । ଅନୁଗୋଳକୁ ଖଣିଜ ପାଣ୍ଠି ବାବଦରେ 1519.22 କୋଟି ଟଙ୍କାର ଅନୁଦାନ ମିଳିଛି । ଯାହାର ବିନିଯୋଗ ଓ ସୁପରିଚାଳନା ନେଇ ଆଲୋଚନା ହୋଇଛି । ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ସମ୍ମିଳନୀ କକ୍ଷରେ ଏହି ବୈଠକ ହୋଇଥିବା ବେଳେ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ଏଥିରେ ଅଧ୍ୟକ୍ଷତା କରିଛନ୍ତି ।
ତେବେ ଜିଲ୍ଲାକୁ ମିଳିଥିବା ପାଣ୍ଠିରେ 2,330 ପ୍ରକଳ୍ପ କାମ ଶେଷ ହୋଇଥିବା ବେଳେ 490ଟି ପ୍ରକଳ୍ପର କାର୍ଯ୍ୟ ଆଜି ଯାଏଁ ଆରମ୍ଭ ହୋଇ ନଥିବାରୁ ଏହାକୁ ନେଇ ବୋର୍ଡ ସଦସ୍ୟମାନେ ଅସନ୍ତୋଷ ଜାହିର କରିଛନ୍ତି । ଏହି ଖଣିଜ ପାଣ୍ଠି ପରିଚାଳନା କମିଟି ବୈଠକରେ ଢେଙ୍କାନାଳ ସାଂସଦ ମହେଶ ସାହୁଙ୍କ ସମେତ ଅନୁଗୋଳ ଜିଲ୍ଲାର ସମସ୍ତ ବିଧାୟକମାନେ ଯୋଗ ଦେଇଥିଲେ ।
ଜିଲ୍ଲାରେ ସ୍ବାସ୍ଥ୍ୟକ୍ଷେତ୍ରରେ ଅଧିକ ଅର୍ଥ ବିନିଯୋଗ କରି କିଭଳି ଲୋକଙ୍କୁ ଉତ୍ତମ ସେବା ଯୋଗାଇ ହେବ ସେନେଇ ବୈଠକରେ ଆଲୋଚନା ହୋଇଛି । ଏହାବ୍ୟତୀତ ଛତିଶଗଡ ଢାଞ୍ଚାରେ ହାଇବ୍ରିଡ଼ ଶିକ୍ଷା ଦିଆଯିବାକୁ ମଧ୍ୟ ନିଷ୍ପତ୍ତି ହୋଇଥିବା ଜିଲ୍ଲା ପ୍ରଶାସନ ପକ୍ଷରୁ ଜାରି ଏକ ପ୍ରେସ ବିବୃତ୍ତିରେ ସୂଚନା ଦିଆଯାଇଛି ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
