ଅନୁଗୋଳ: ମାଦକଦ୍ରବ୍ୟ ତଥା ହାଣ୍ଡିଆ ଉପରେ ଡେଙ୍କାନାଳ ସାଂସଦ ମହେଶ ସାହୁ ଲୋକଙ୍କୁ ଦେଉଛନ୍ତି ଜ୍ଞାନ । ଚାଉଳ ନଷ୍ଟ ପରିବର୍ତ୍ତେ ଏହାକୁ ହାଣ୍ଡିଆ କରି ଖାଇବାକୁ ସାଂସଦ ଦେଉଛନ୍ତି ପରାମର୍ଶ । ତେବେ ସାଂସଦଙ୍କ ଏପରି ଭିଡିଓ ଏବେ ବେଶ ଭାଇରାଲ ହେବାରେ ଲାଗିଛି ।
ସାଂସଦ ମହେ ସାହୁ ଅନୁଗୋଳର ପାଲଲହଡା ଅଞ୍ଚଳରେ କିଛି ଗରିବ ପରିବାରକୁ ଶୁଖିଲା ଖାଦ୍ୟ ପୁଡ଼ିଆ ବାଣ୍ଟିଥିଲେ । ଯେଉଁଥିରେ ଦିଆଯାଇଥିବା ଚାଉଳ କାଳେ ଫିମ୍ପି କିମ୍ବା ପୋକରା ହୋଇଥିବ ତେଣୁ ତାକୁ ଖରାରେ ଶୁଖାଇବାକୁ ସେ ଲୋକଙ୍କୁ ବୁଝାଇଥିଲେ ।
ଖାଦ୍ୟ ପୁଡ଼ିଆ ତିନିମାସ ତଳୁ ପ୍ୟାକିଂ ହୋଇଥିବାରୁ କାଳେ ପୋକ ଲାଗିଥିବ ଏନେଇ ସନ୍ଦେହ କରି ସାଂସଦ ଲୋକଙ୍କୁ ବୁଝାଉଥିଲେ । ଏହା ମଧ୍ୟ ସେ କହିଥିଲେ ଯେ ଓଡ଼ିଆ ଲୋକ ଯେଭଳି କାଞ୍ଜି କରି ଖାଆନ୍ତି ସେଇଭଳି ଆଧିବାସୀମାନେ ଏହାକୁ ହାଣ୍ଡିଆ କରି ଖାଆନ୍ତି । ତେଣୁ ଯଦି ଚାଉଳ ଖରାପ ହୋଇଥାଏ, ତାହେଲେ ତାକୁ ହାଣ୍ଡିଆ କରି ଖାଇବାକୁ କହିଥିଲେ ସାଂସଦ ମହେଶ ସାହୁ ।
ସାଂସଦଙ୍କ ମଦ ଉପାଖ୍ୟାନ ଭିଡିଓଟି ଏବେ ଭାଇରାଲ ହେଉଛି । ସାଂସଦ ଲୋକଙ୍କୁ ହାଣ୍ଡିଆ ଖାଇବାକୁ କହୁଥିବା ଏହି ଭାଇରାଲ ଭିଡିଓରେ ଦର୍ଶା ଯାଇଛି । ତେବେ ଏନେଇ ମହେଶଙ୍କ ପ୍ରତିକ୍ରିୟା ମିଳିନାହିଁ ।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
