ଅନୁଗୋଳ: ଆଜିଠାରୁ ମାର୍ଚ୍ଚ 29 ପର୍ଯ୍ୟନ୍ତ ଅନୁଗୋଳ ଜିଲ୍ଲାକୁ ଲକ୍ଡାଉନ୍ ଘୋଷଣା କରିଛନ୍ତି ସରକାର । ଗତକାଲି ଜନତା କର୍ଫ୍ୟୁ ପରେ ଆଜି ଲକ୍ଡାଉନକୁ କଡାକଡି ଭାବେ କାର୍ଯ୍ୟକାରୀ କରିବାକୁ ପୋଲିସ ପକ୍ଷରୁ ପଦକ୍ଷେପ ନିଆଯାଇଛି।
ବ୍ୟାପକ ପୋଲିସ ଫୋର୍ସ ସହର ସାରା ବୁଲି ଯେଉଁ ଦୋକାନଗୁଡିକରେ ପ୍ରବଳ ଭିଡ ହୋଇଥିଲା ସେଠାରୁ ଭିଡ ହଟାଇଛନ୍ତି। ଗୋଟିଏ ଜାଗାରେ 7ଜଣରୁ ଅଧିକ ନରହିବା ପାଇଁ ଡାକବାଜି ଯନ୍ତ୍ର ଦ୍ବାରା ପ୍ରଚାର କରୁଛନ୍ତି। ଲୋକେ ମଧ୍ୟ ସ୍ବତପ୍ରବୃତ ଭାବେ ଏହାକୁ ସମର୍ଥନ କରୁଥିବା ଦେଖିବାକୁ ମିଳିଛି ।
ସମସ୍ତ ଦୋକାନ ବନ୍ଦ ରହିଛି। କେବଳ ଔଷଧ, ଫଳ, ପନିପରିବା ଓ କ୍ଷୀର ଦୋକାନ ଖୋଲା ରହିଛି। ଯେଉଁ ଦୋକାନ ଗୁଡିକ ଖୋଲା ଅଛି ସେହି ସବୁ ଦୋକାନ ଗୁଡିକରେ ମଧ୍ୟ ଧାଡି କରି ଲୋକେ ଜିନିଷ କିଣିବାକୁ କୁହାଯାଉଛି। ଚାରିଆଡେ କେବଳ ନୀରବତା ବିଛେଇ ହୋଇଯାଇଛି। ଯଦିଓ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି କିନ୍ତୁ ଏହି ପଦକ୍ଷେପକୁ ପୂର୍ଣ ସମର୍ଥନ କରୁଛନ୍ତି।
ସେପଟେ ଅଧିକାଂଶ ଲୋକ ଘରୁ ବାହାରକୁ ବାହାରୁ ନାହାନ୍ତି। ତେଣୁ ରାସ୍ତା ଘାଟ ସବୁ ଖାଁ ଖାଁ ଲାଗୁଛି। ବେଶି ଲୋକ ନଥିବାରୁ ଉଭୟ ଘରୋଇ ଓ ସରକାରୀ ବସ ଚଳାଚଳ ସମ୍ପୂର୍ଣ ବନ୍ଦ ରହିଛି। ଏପରିକି ଛୋଟ ଗାଡି ଚଳାଚଳ ମଧ୍ୟ ବନ୍ଦ ରହିଛି।
ଅନୁଗୋଳରୁ ସଂଗ୍ରାମ ରଞ୍ଜନ ନାଥ, ଇଟିଭି ଭାରତ
