ନୂଆଦିଲ୍ଲୀ: ଏସିଆନ ବକ୍ସିଂ ଚମ୍ପିଆନସିପରେ ଭାରତୀୟ ମହିଳା ବକ୍ସରଙ୍କ ଦମଦାର ପ୍ରଦର୍ଶନ । 6 ଥରର ବିଶ୍ବ ଚମ୍ପିଆନ ଏମସି ମେରୀ କମ୍ଙ୍କ ସମେତ 5ଜଣ ଭାରତୀୟ ମହିଳା ବକ୍ସର ସ୍ବର୍ଣ୍ଣ ପଦକ ରାଉଣ୍ଡରେ ପ୍ରବେଶ କରିଛନ୍ତି । ଜାତୀୟ ଟିମ 5ଟି ବ୍ରୋଞ୍ଚ ପଦକ ଜିତିସାରିଛି ।
ମହିଳା 64 କିଲୋଗ୍ରାମ ବର୍ଗରେ ଲାଲବୁଆଟସାହି କୁଏତର ନୋଉରା ଅଲମୁତଇରିଙ୍କୁ ହରାଇଛନ୍ତି । ସେହିପରି ପୂଜା ରାନୀ ମହିଳା 75 କିଲୋଗ୍ରାମ ବର୍ଗରେ ଓ ଅନୂପମା ଉଜବେକିସ୍ତାନର ମୋଖିରା ଅବଦୁଲାଭାଙ୍କୁ 4-1ରେ ହରାଇ 81 କିଲୋଗ୍ରାମରୁ ଅଧିକ ବର୍ଗରେ ଫାଇନାଲରେ ପ୍ରବେଶ କରିଛନ୍ତି ।
ପୂର୍ବରୁ ମେରୀକମ ମଙ୍ଗୋଲିଆର ଲାଟସାଇଖନ ଅଲଟାଣ୍ଟସେଗଙ୍କୁ 4-1ରେ ହରାଇ ଭାରତ ପାଇଁ ଦମଦାର ଆରମ୍ଭ କରିଥିଲେ । ମେରୀ ଫାଇନାଲରେ କାଜାଖସ୍ତାନର ନାଜମ କେଜାଇବେଙ୍କୁ ଭେଟିବେ । ଦୁଇ ଥରର ବିଶ୍ବ ଚମ୍ପିଆନ ନାଜମ ସେମିଫାଇନାଲରେ ଶ୍ରୀଲଙ୍କାର ନାଦୀକା ପୁଷ୍ପାକୁମାରୀଙ୍କୁ ହରାଇ ଫାଇନାଲରେ ପହଞ୍ଚିଛନ୍ତି ।
ଅନ୍ୟପଟେ ଦୁଇ ଥରର ବିଶ୍ବ ୟୁଥ ଚମ୍ପିଆନ ସାକ୍ଷୀ ମଧ୍ୟ କାଜାଖସ୍ତାନର ଦିନା ଜଲମନଙ୍କୁ 3-2ରେ ହରାଇ ଫାଇନାଲରେ ସ୍ଥାନ ପକ୍କା କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
