ମୁମ୍ବାଇ: ଇଣ୍ଡିଆନ ପ୍ରିମିୟର ଲିଗର ଅନୁଷ୍ଠିତ ଷଷ୍ଠ ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବାଙ୍ଗଲୋର ବିଜୟ ହାସଲ କରି ନେଇଛି । କୋଲକାତାକୁ ୩ ୱିକେଟର ପରାସ୍ତ କରିଛି ବାଙ୍ଗାଲୋର । କାର୍ତ୍ତିକଙ୍କ କମାଲ ପାଇଁ ଆରସିବି ଚଳିତ ସିଜିନରେ ପ୍ରଥମ ବିଜୟ ହାସଲ କରିଛି ।
ଟସ ଜିତି ଆରସିବି ଅଧିନାୟକ ଡୁ ପ୍ଲେସି ଫିଲ୍ଡିଂ ନିଷ୍ପତ୍ତି ନେଇଥିଲେ । ପ୍ରଥମେ ବ୍ୟାଟିଂ କରି କେକେଆର ୧୮. ୫ ଓଭରରେ ୧୨୮ ରନ କରି ଆଲଆଉଟ ହୋଇଥିଲା । ପ୍ରଥମ ମ୍ୟାଚ ଜିତିଥିବା କେକେଆର ବିପର୍ଯ୍ୟୟର ସମ୍ମୁଖୀନ ହୋଇଥିଲା । ମାତ୍ର ୬୭ରେ ଦଳର ୬ଟି ୱିକେଟ ପତନ ହୋଇ ସାରିଥିଲା । ଆନ୍ଦ୍ରେ ରସେଲ ସର୍ବାଧିକ ୨୫ ରନ କରିଥିଲେ । ଅଧିନାୟକ ଶ୍ରେୟସ ଆୟାର ୧୩ ରନ ରାହାଣେ ୯ ରନ ଓ ସୁନୀଲ ନାରାୟଣ ୧୨ ରନ କରି ଆଉଟ ହୋଇଥିଲେ । କେକେଆରର ରନ ଗାଡି ଧିମା ପଡିଯାଇଥିଲା । ମାତ୍ର ୧୨୮ ରନ କରିବାରେ ସକ୍ଷମ ହୋଇଥିଲା ଦଳ । ଆରସିବି ବୋଲର ଫୁଲ ଜୋସରେ ଥିଲେ । ୱିନିନ୍ଦୁ ହସରଙ୍ଗା ୨୦ ରନ ଦେଇ ସର୍ବାଧିକ ୪ଟି ୱିକେଟ ନେଇଥିଲେ । ହର୍ଶଲ ପଟେଲ ୪ ଓଭରରେ ୨ଟି ମେଡେନ ନେଇ ମାତ୍ର ୧୧ ରନ ଦେଇ ୨ଟି ୱିକେଟ ନେଇଥିଲେ ।
ମ୍ୟାଚରେ ରନ କମ ଥିବା କିନ୍ତୁ ରୋମାଞ୍ଚକର ହୋଇଥିଲା । ୧୨୯ ରନର ବିଜୟ ଲକ୍ଷ୍ୟ ନେଇ ପଡିଆକୁ ଓହ୍ଲାଇଥିଲା ଆରସିବି । ଆରମ୍ଭରୁ ଆରସିବିର ଅବସ୍ଥା ଖରାପ ହୋଇଯାଇଥିଲା । ୧୭ ରନ ବେଳକୁ ଦଳ ୩ଟି ୱିକେଟ ହରାଇଥିଲା । ରଥରଫୋର୍ଡ ସର୍ବାଧିକ ୧୮ ରନ କରିଥିଲେ । ଶେଷ ୩ ଓଭରରେ ମ୍ୟାଚ ଏକଦମ ଫସିଯାଇଥିଲା । ତଥାପି ହାରିଲା କେକେଆର । ଦୀନେଶ କାର୍ତ୍ତିକ କମାଲ କରିଥିଲେ । ୭ ବଲରେ ୧୪ ରନ କରି ଅପରାଜିତ ରହି ଦଳକୁ ବିଜୟ ଭେଟି ଦେଇଥିଲେ । କୋଲକାତା ବିପକ୍ଷରେ ରୋମାଞ୍ଚକର ବିଜୟ ସହ ବାଙ୍ଗଲୋର ପଏଣ୍ଟ ଖାତା ଖୋଲିଛି ।
