କୋଲକାତା: ଚଳିତ ଆଇସିସି କ୍ରିକେଟ ବିଶ୍ବକପରେ ଭାରତ ଏଯାବତ ଏକମାତ୍ର ଦଳ ଭାବେ ଅପରାଜେୟ ସାବ୍ୟସ୍ତ ହୋଇଛି । ମୋଟ 5ଟି ଯାକ ମ୍ୟାଚ୍ ଖେଳି ବିଜୟ ହାସଲ କରି 10 ପଏଣ୍ଟ ସହ ଟେବୁଲର ଦ୍ବିତୀୟ ସ୍ଥାନରେ ରହିଛି ରୋହିତ ସେନା । ଆଜି ଇଂଲଣ୍ଡ ବିପକ୍ଷରେ ବିଶ୍ବକପର ଷଷ୍ଠ ମ୍ୟାଚ୍ ଖେଳିବ ଭାରତ । ଏହା ପୂର୍ବରୁ ଭାରତର ପୂର୍ବତନ ଅଧିନାୟକ ତଥା ବିସିସିଆଇ ପୂର୍ବତନ ସଭାପତି ସୌରଭ ଗାଙ୍ଗୁଲି କହିଛନ୍ତି, ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ଭାରତ ପାଇଁ ବଡ ଚ୍ୟାଲେଞ୍ଜ ହେବେ । ଇଡେନ ଗାର୍ଡେନରେ ବାଂଲେଦଶ ଓ ନେଦରଲାଣ୍ଡ ମ୍ୟାଚ୍ ଦେଖିବାକୁ ଆସିଥିବାବେଳେ ଏହି ପ୍ରତିକ୍ରିୟା ଦେଇଛନ୍ତି ସୌରଭ ଗାଙ୍ଗୁଲି ।
ସୌରଭ ଗାଙ୍ଗୁଲି କହିଛନ୍ତି, "ନକ୍ ଆଉଟ ଯାଏଁ ଭାରତ ପାଇଁ ବଡ ଚ୍ୟାଲେଞ୍ଜ ହେବେ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା । ଦୁଇ ଦଳ ପ୍ରତ୍ୟାବର୍ତ୍ତନ ସହ ଭଲ ପ୍ରଦର୍ଶନ ଜାରି ରଖିଛନ୍ତି । ଅଷ୍ଟ୍ରେଲିଆ ପ୍ରଥମ 2ଟି ମ୍ୟାଚ୍ ହାରିବା ପରେ ବାକି 4ଟି ମ୍ୟାଚ୍ ଜିତିଛି । ସେହିପରି ନେଦରଲାଣ୍ଡ ବିପକ୍ଷ ମ୍ୟାଚକୁ ଛାଡ଼ି ଦେଲେ ଅନ୍ୟ ମ୍ୟାଚ୍ରେ ଦକ୍ଷିଣ ଆଫ୍ରିକା ଭଲ ପ୍ରଦର୍ଶନ କରିଛି । ଉଭୟ ଦଳ ଭାରତ ପଥରେ ବାଧକ ସାଜି ପାରନ୍ତି । ଘରୋଇ ଦଳର ପ୍ରଦର୍ଶନ ଭଲ ରହିଛି । ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଆହତ ସମସ୍ୟା ଥିଲେ ବି ସନ୍ତୁଳିତ ଦଳ ରହିଛି । ଦଳରେ ହାର୍ଦ୍ଦିକ ପାଣ୍ଡ୍ୟା ଜଣେ ଗୁରୁତ୍ୱପୂର୍ଣ୍ଣ ଖେଳାଳି ତଥାପି ଭଲ ଭାରତୀୟ ଦଳ ରହିଛି । ପାଣ୍ଡ୍ୟାଙ୍କ ଅନୁପସ୍ଥିତିରେ କିଛି ସମସ୍ୟା ନାହିଁ ।"
ଏହା ବି ପଢନ୍ତୁ...Cricket World Cup 2023: ୬ଷ୍ଠ ବୋଲିଂ ଅପସନ୍ ହୋଇପାରିବେ କୋହଲି-ରୋହିତ
ଅନେକ ଭାବୁଛନ୍ତି ଟିମ ଇଣ୍ଡିଆ ସହଜରେ ଫାଇନାଲରେ ପ୍ରବେଶ କରିବ । ମାତ୍ର ସୌରଭ ଗାଙ୍ଗୁଲି ଏଥିରେ ସହମତ ନାହାନ୍ତି । ସେ କହିଛନ୍ତି ପ୍ରଥମେ ଆମକୁ ସେମିଫାଇନାଲ ଷ୍ଟେଜ୍ ପାରି କରିବାକୁ ହେବ । ଅଷ୍ଟେଲିଆ ଓ ଦକ୍ଷିଣ ଆଫ୍ରିକା ଭାରତ ପାଇଁ ବଡ଼ ଚ୍ୟାଲେଞ୍ଜ ହେବେ ।
ପ୍ରକାଶ ଥାଉ କି, ICC କ୍ରିକେଟ୍ ବିଶ୍ବକପରେ 13 ତମ ସଂସ୍କରଣରେ ଭାରତ 5ଥର ଚମ୍ପିଆନ ଅଷ୍ଟ୍ରେଲିଆକୁ ପରାସ୍ତ କରି ବିଜୟରୁ ଅଭିଯାନ ଆରମ୍ଭ କରିଥିଲା ଟିମ୍ ଇଣ୍ଡିଆ । ଏହାପରେ ଆଫଗାନିସ୍ତାନ, ପରେ ପାରମ୍ପରିକ ପ୍ରତିନ୍ଦ୍ବନ୍ଦୀ ପାକିସ୍ତାନକୁ ପରବର୍ତ୍ତୀ ମ୍ୟାଚ୍ରେ ବାଂଲାଦେଶ ଓ ପଞ୍ଚମ ମୁକାବିଲାରେ ନ୍ୟୁଜିଲାଣ୍ଡକୁ ହରାଇ ଲାଗାତାର ପଞ୍ଚମ ବିଜୟ ହାସଲ କରିଥିଲା । ଏଯାବତ ଭାରତ ଅପରାଜେୟ ରହିଛି । ଆଜି(ରବିବାର) ଇଂଲଣ୍ଡ ବିପକ୍ଷରେ ଖେଳିବ । ଏହି ମ୍ୟାଚ୍ ଜିତିଲେ ଭାରତ ଟେବୁଲ ଟପ୍କୁ ଉଠିବ । ଶୀର୍ଷରେ ଥିବା ଦକ୍ଷିଣ ଆଫ୍ରିକା ବିପକ୍ଷରେ କୋଲକାତାରେ ନଭେମ୍ବର 5 ତାରିଖରେ ମ୍ୟାଚ୍ ରହିଛି ।
