ହାଇଦ୍ରାବାଦ : ବର୍ଡର ଗାଭାସ୍କର ଟ୍ରଫିରେ ଯୁବ ଷ୍ଟାର ବ୍ୟାଟର ଋଷଭ ପନ୍ତଙ୍କୁ ଟିମ ଇଣ୍ଡିଆ ମିସ୍ କରିବ । ଏହି ସିରଜ ଆରମ୍ଭ ହେବା ପୂର୍ବରୁ ଏଭଳି କହିଛନ୍ତି ଅଷ୍ଟ୍ରେଲିଆର ପୂର୍ବତନ କ୍ରିକେଟର ଇଆନ ଚାପେଲ । କାର ଦୁର୍ଘଟଣାରେ ଶିକାର ହୋଇ ପନ୍ତ ଏବେ ଚିକିତ୍ସିତ ହେଉଛନ୍ତି । ଆସନ୍ତା ୯ ତାରିଖରୁ ଆରମ୍ଭ ହେବ ବର୍ଡର ଗାଭାସ୍କର ଟ୍ରଫି । ଏଥିରେ ଭାରତ ଅଷ୍ଟ୍ରେଲିଆ ବିପକ୍ଷରେ ଚାରି ଟିକିଆ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବ । ଦୁର୍ଘଟଣା କାରଣରୁ ପନ୍ତ ଏହି ଗୁରୁତ୍ବପୂର୍ଣ୍ଣ ଟୁର୍ଣ୍ଣାମେଣ୍ଟରୁ ବାଦ ପଡିଛନ୍ତି । ତାଙ୍କର ଅନୁପସ୍ଥିତି ଟିମ୍ ଇଣ୍ଡିଆକୁ ଏକ ବଡ ଝଟକା ଦେଇଛି । ଏ ବାବଦରେ ଇଆନ ଚାପେଲ କହିଛନ୍ତି ଯେ, ଆୟୋଜକ ଭାରତ ଏହି ଟ୍ରଫିରେ ଜଣେ ଖେଳାଳିର ଅନୁପସ୍ଥିତିକୁ ଅନୁଭବ କରିବ । ଯିଏ ବିପକ୍ଷ ଦଳର ଅଧିନାୟକଙ୍କ ନିଦ ହଜାଇ ଦେଇଥାନ୍ତେ । ଏବେ ଦଳରେ ପନ୍ତଙ୍କ ଅନୁପସ୍ଥିତି ଟିମ ଇଣ୍ଡିଆ ପାଇଁ ଏକ ବଡ ଝଟକା ସଦୃଶ ।
ଯୁବ ବ୍ୟାଟର ଋଷଭ ପନ୍ତଙ୍କ ପ୍ରଦର୍ଶନକୁ ଭୂୟସୀ ପ୍ରଶଂସା କରିଛନ୍ତି ଅଷ୍ଟ୍ରେଲିଆର ପୂର୍ବତନ ଅଧିନାୟକ ଇଆନ ଚାପେଲ । ଏବଂ ବର୍ଡର ଗାଭାସ୍କର ଟ୍ରଫିରେ ତାଙ୍କର ପ୍ରଦର୍ଶନକୁ ମନେ ପକାଇଛନ୍ତି । ଚାପେଲ କହିଥିଲେ "ଋଷଭ ପନ୍ତଙ୍କ ଅନୁପସ୍ଥିତି ଟିମ୍ ଇଣ୍ଡିଆକୁ ନିଶ୍ଚିତ ଭାବରେ ଭାରି ପଡିବ । ଟିମ୍ ଇଣ୍ଡିଆ ପନ୍ତଙ୍କୁ ମିସ୍ କରିବ । କିନ୍ତୁ ଏହା ଭ୍ରମଣକାରୀ ଦଳ ଅଷ୍ଟ୍ରେଲିଆ ପାଇଁ ଭଲ ଖବର । କାରଣ ପନ୍ତ ମୈଦାନରେ ସର୍ବଦା କାଉଣ୍ଟର ଆଟାକ କରିଥାନ୍ତି । ଯାହା ଅଷ୍ଟ୍ରେଲିଆକୁ ଅଡୁଆରେ ପକାଇଥାଏ । ତେବେ ତାଙ୍କର ଅନୁପସ୍ଥିତି ଅତିଥି ଦଳକୁ ଫାଇଦା ଦେବ ।"
