ନୂଆଦିଲ୍ଲୀ: ପୁଲୱାମା ଆକ୍ରମଣରେ ଭାରତର 40ରୁ ଅଧିକ ଯବାନ ଶହୀଦ ହେବା ପରେ ସାରା ଦେଶରେ ଜଳୁଛି ପ୍ରତିଶୋଧର ନିଆଁ । ପାକିସ୍ତାନକୁ ଏକଘରକିଆ କରିବା ପାଇଁ ସାଧାରଣ ଜନତା ଦାବି କରୁଥିବାବେଳେ ସରକାର ଆରମ୍ଭ କରିଛନ୍ତି ପ୍ରୟାସ । କୂଟନୀତିଠାରୁ ଆରମ୍ଭ କରି ସିନେମା ପର୍ଯ୍ୟନ୍ତ ସମସ୍ତ କ୍ଷେତ୍ରରେ ପାକିସ୍ତାନ ସହ ସମ୍ପର୍କ ଛିନ୍ନ କରିଛନ୍ତି ଭାରତ ସରକାର । ଏହିକ୍ରମରେ ପାକ୍ ସହ କ୍ରିକେଟ ନ ଖେଳିବା ପାଇଁ ସବୁ ମହଲରେ ଦାବି ଉଠୁଛି ।
ରିପୋର୍ଟ ଅନୁସାରେ ଆସନ୍ତା ଜୁନରେ ଇଂଲଣ୍ଡରେ ଦିନିକିଆ ବିଶ୍ୱକପ ଖେଳାଯିବ । ଏଥିରେ ଜୁନ 16ରେ ଭାରତ-ପାକିସ୍ତାନ ମ୍ୟାଚ ଖେଳାଯିବା ନେଇ ନିର୍ଦ୍ଧାରିତ ହୋଇଛି । ତେବେ ପାକିସ୍ତାନ ବିପକ୍ଷରେ ଏହି ମ୍ୟାଚ ନ ଖେଳିବା ପାଇଁ ଭାରତରେ ଦାବି ହୋଇଛି । ରାଜନେତାଠାରୁ ସାଧାରଣ ଜନତା ପର୍ଯ୍ୟନ୍ତ ସମସ୍ତେ ଏହି ଦାବି କରିଛନ୍ତି । ଏହାସହ ଏଥିରେ ମଧ୍ୟ ପୂର୍ବତନ ଭାରତୀୟ ଖେଳାଳି ସାମିଲ ହୋଇଛନ୍ତି । ତେବେ ପାକିସ୍ତାନ ସହ ମ୍ୟାଚ ଖେଳିବା ନେଇ ଭାରତୀୟ କ୍ରିକେଟ ସମୁଦାୟ ଦୁଇ ଭାଗ ହୋଇଛନ୍ତି । ଆସନ୍ତୁ ନଜର ପକାଇବା ଏହି ପ୍ରସଙ୍ଗ ଉପରେ କିଏ କଣ ମତ ଦେଇଛନ୍ତି ।
ପୂର୍ବତନ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ସେକ୍ରେଟାରୀ ସଞ୍ଜୟ ପାଟିଲ ପାକିସ୍ତାନ ସହ ମ୍ୟାଚ ବାତିଲ ପାଇଁ ଦାବି କରିଛନ୍ତି । ସେ କହିଛନ୍ତି ଯେ ଆମେ ଆମ ଯବାନ ଭାଇଙ୍କୁ ହରାଇଛୁ । ଏପରି କାପୁରୁଷ କାର୍ଯ୍ୟକୁ ଆମେ ବିରୋଧ କରିବା ସହ ଆଗାମୀ ବିଶ୍ୱକପରେ ପାକ୍ ବିପକ୍ଷ ମ୍ୟାଚକୁ ବାତିଲ ପାଇଁ ଦାବି କରୁଛୁ । ପୂର୍ବତନ ଭାରତୀୟ ଅଲରାଉଣ୍ଡର ତଥା ଉତ୍ତର ପ୍ରଦେଶ ମନ୍ତ୍ରୀ ଚେତନ ଚୌହାନ କହିଛନ୍ତି ଯେ ପାକିସ୍ତାନ ସହ ମ୍ୟାଚ ବାତିଲ କରିବା ଏତେ ସହଜ ନୁହେଁ । କ୍ରିକେଟରେ ଥିବା ନିୟମ ଅନୁସାରେ ହୁଏତ ଭାରତକୁ ଏଥିପାଇଁ ଫାଇନ ଦେବାକୁ ପଡିପାରେ ଅଥବା ବିଶ୍ୱକପରୁ ବ୍ୟାନ ହୋଇପାରେ ବୋଲି ସେ ସତର୍କ କରାଇଛନ୍ତି ।
ଆଇପିଏଲ ଚେୟାରମ୍ୟାନ ରାଜୀବ ଶୁକ୍ଳା ମଧ୍ୟ କହିଛନ୍ତି ଯେ ଭାରତ ସରକାରଙ୍କ ନିଷ୍ପତ୍ତି ବିନା ମ୍ୟାଚ ବାତିଲ କରିବା ଅସମ୍ଭବ । ତେବେ ଭାରତୀୟ ଅଫସ୍ପିନର ହରଭଜନ ସିଂହ କହିଛନ୍ତି ଯେ କ୍ରିକେଟ ଆଗରୁ ଆମ ପାଇଁ ଦେଶ ପ୍ରଥମ । ତେଣୁ ଟୁର୍ଣ୍ଣାମେଣ୍ଟରେ 2 ପଏଣ୍ଟ ନ ମିଳୁ ପଛେ କିନ୍ତୁ ପାକିସ୍ତାନ ସହ ମ୍ୟାଚ ଖେଳିବା ଉଚିତ ନୁହେଁ । ଭଜିଙ୍କ ସହ ସ୍ୱର ମିଳାଇଛନ୍ତି ପୂର୍ବତନ ଖେଳାଳି ଭିଭିଏସ ଲକ୍ଷ୍ମଣ । ଆତଙ୍କବାଦୀକୁ ପ୍ରୋତ୍ସାହନ ଦେଉଥିବା ପାକିସ୍ତାନ ସହ ମ୍ୟାଚ ବର୍ଜନ କରିବା ଉଚିତ ବୋଲି ସେ ମତ ଦେଇଛନ୍ତି ।
ତେବେ ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ଏହା ଉପରେ ଆଉ ପାଦେ ଆଗେଇ ଯାଇ ପାକିସ୍ତାନ ସହ ସବୁ ପ୍ରକାର ସମ୍ପର୍କ ଛିନ୍ନ କରିବାକୁ କହିଛନ୍ତି । କେବଳ କ୍ରିକେଟ ନୁହେଁ ସେ କହିଛନ୍ତି ଯେ ପାକ୍ ସହ ସମସ୍ତ କ୍ରୀଡା ସମ୍ପର୍କ ବନ୍ଦ କରିଦେବା ଉଚିତ । ତେବେ ଏ ସମ୍ପର୍କରେ ଅଲଗା ମତ ପୋଷଣ କରିଛନ୍ତି ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକର । ଖେଳ ବାତିଲ ନକରି ପାକିସ୍ତାନକୁ ଶୋଚନୀୟ ଭାବେ ହରାଇବା ପାଇଁ ସେ କହିଛନ୍ତି । ଟୁର୍ଣ୍ଣାମେଣ୍ଟରେ ପାକ୍କୁ 2 ପଏଣ୍ଟ ଦେବା ବଦଳରେ ତାହାକୁ ହରାଇ ପ୍ରତିଶୋଧ ନେବାକୁ ସେ ମତ ଦେଇଛନ୍ତି ।
ହେଲେ ସେ ଏହାମଧ୍ୟ କହିଛନ୍ତି ଯେ ତାଙ୍କ ପାଇଁ ଦେଶ ପ୍ରଥମ ଏବଂ ଦେଶବାସୀ ଯାହା କହିବେ ସେ ତାହାକୁ ସମର୍ଥନ କରିବେ । ଏପରି କିଛି ସମାନ ମତ ଦେଇଛନ୍ତି ଭାରତୀୟ ଦଳର ଅଧିନାୟକ ଓ ମୁଖ୍ୟ କୋଚ । କ୍ୟାପ୍ଟେନ କୋହଲି କହିଛନ୍ତି ଯେ ଦେଶବାସୀଙ୍କୁ ସେ ସମର୍ଥନ କରନ୍ତି । ତାଙ୍କ ପାଇଁ ଦେଶ ଆଗ । ତେବେ ପାକ୍ ସହ ମ୍ୟାଚ ଖେଳିବା ନେଇ ବିସିସିଆଇ ଓ ସରକାର ଯାହା ନିଷ୍ପତ୍ତି ନେବେ ତାହା ସପକ୍ଷରେ ସେ ଯିବେ । ରବି ଶାସ୍ତ୍ରୀ ମଧ୍ୟ କହିଛନ୍ତି ଯେ ଭାରତ ସରକାରଙ୍କ ନିଷ୍ପତ୍ତିକୁ ସେ ସମ୍ମାନ ଦିଅନ୍ତି । ତେଣୁ ସରକାର ଯାହା ନିଷ୍ପତ୍ତି ନେବେ ଭାରତୀୟ ଦଳ ତାହା ହିଁ କରିବ ।
ତେବେ ଏହା ଉପରେ ଅନ୍ତର୍ଜାତୀୟ କ୍ରିକେଟ ପରିଷଦ(ଆଇସିସି)ରୁ ଭିନ୍ନ ମତ ମିଳିଛି । ମାଞ୍ଚେଷ୍ଟରର ଓଲ୍ଡ ଟ୍ରାଫୋର୍ଡରେ ଖେଳାଯିବାକୁ ଥିବା ଏହି ମ୍ୟାଚର ସିଡ୍ୟୁଲରେ କୌଣସି ପରିବର୍ତ୍ତନ ନ କରିବାକୁ ଆଇସିସି ସିଇଓ ଡେଭ ରିଚାର୍ଡସନ ପରାମର୍ଶ ଦେଇଛନ୍ତି । କ୍ରିକେଟ ରାଷ୍ଟ୍ର ଓ ସମୁଦାୟକୁ ଏକାଠି କରିଥାଏ । ତେଣୁ ମ୍ୟାଚ ବାତିଲ କରିବା ଉଚିତ ନୁହେଁ ବୋଲି ସେ କହିଛନ୍ତି । ଫେବୃୟାରୀ 27ରେ ଦୁବାଇରେ ହେବାକୁ ଥିବା ଆଇସିସି ବୈଠକରେ ଏହା ଉପରେ ଆଲୋଚନା ହେବ ବୋଲି ସେ ସୂଚନା ଦେଇଛନ୍ତି ।
ଏହି ପ୍ରସଙ୍ଗ ଉପରେ ବିସିସିଆଇ, ଆଇସିସିକୁ ଚିଠି ଲେଖିବ ବୋଲି ପୂର୍ବରୁ ଆଶା କରାଯାଉଥିଲା । ଏଥିରେ ପାକିସ୍ତାନକୁ ସମ୍ପୂର୍ଣ୍ଣ ରୂପେ ବାଦ ଦେବା ପାଇଁ ଲେଖାଯିବ ବୋଲି ଅନୁମାନ କରାଯାଇଥିଲା । କିନ୍ତୁ ଏପରି କିଛି ହୋଇନଥିବାବେଳେ ବିଶ୍ୱକପରେ ଭାରତୀୟ ଖେଳାଳିଙ୍କ ସୁରକ୍ଷା ମାଗି ପ୍ରସଙ୍ଗକୁ ବଦଳାଇ ଦେଇଥିଲା ବିସିସିଆଇ । ଏବେ ଦେଖିବାକୁ ବାକି ରହିଲା ଏହା ଉପରେ ବିସିସିଆଇ ଓ ଆଇସିସିର ଆଗାମୀ ଆଭିମୁଖ୍ୟ କଣ ରହିବ ।
