ଦୁବାଇ: 19 ବର୍ଷରୁ କମ ବିଶ୍ବକପ ଫାଇନାଲରେ ଖେଳାଳିଙ୍କ ଅଶୋଭନୀୟ ଆଚରଣରେ କ୍ଷୁବ୍ଧ ଅନ୍ତର୍ଜାତୀୟ କ୍ରିକେଟ ପରିଷଦ(ଆଇସିସି)। ଭାରତ-ବାଂଲାଦେଶ ମଧ୍ୟରେ ଖେଳାଯାଇଥିଲା ହାଇଭୋଲଟେଜ ଫାଇନାଲ ମ୍ୟାଚ। ବିଜୟୀ ହେବାପରେ ବାଂଲାଦେଶ ଖେଳାଳି ପଡିଆ ମଧ୍ୟରୁ ଚାଲିଆସିଥିଲେ। ଏହାପରେ ଭାରତୀୟ ଖେଳାଳିଙ୍କା ସାମ୍ନାରେ ଆକ୍ରମଣାତ୍ମକ ଭଙ୍ଗିରେ ଖୁସି ମନାଇଥିଲେ। ଏମିତିକି କିଛି ବାଂଲାଦେଶ ଖେଳାଳି ଭାରତୀୟ ଖେଳାଳିଙ୍କ ରାସ୍ତା ରୋକିଥିଲେ । ଫଳରେ ଉଭୟଙ୍କ ମଧ୍ୟରେ କିଛି ସମୟ ପାଇଁ ଉତ୍ତେଜନା ଦେଖାଯାଇଥିଲା।
ଏହି ଘଟଣାରେ ଆଇିସିସି ଉଭୟ ଟିମର 5ଜଣ ଖେଳାଳିଙ୍କୁ ଦୋଷୀ ଭାବେ ବିବେଚନା କରିଛି। ବାଂଲାଦେଶ ଟିମର ତୋହ୍ବିଦ ହ୍ରିଦୟ, ସାମିମ ହୁସେନ ଓ ରକିବୁଲ ହୁସେନ ଆଇିସିସିର କୋଡ ଅଫ କଣ୍ଡକ୍ଟର ଧାରା 2.21କୁ ଉଲ୍ଲଂଘନ କରିଛନ୍ତି। ଭାରତୀୟ ଖେଳାଳି ଆକାଶ ସିଂହ ଓ ରବି ବିଷ୍ଣୋଇ ଆଇସିସି କୋଡ ଅପ କଣ୍ଡକ୍ଟର ଧାରା 2.5କୁ ଉଲ୍ଲଂଘନ କରିଥିବା ଜଣାପଡିଛି।
ଫାଇନାଲ ମ୍ୟାଚରେ ଦୁଇ ଫିଲ୍ଡ ଅମ୍ପାୟାର ସାମ ନାଗଜଶୋକି, ଆଦ୍ରିଆନ ହୋଲ୍ଡଷ୍ଟକ ଓ 3ୟ ଅମ୍ପାୟାର ରବିନ୍ଦ୍ର ୱିମାଲାଶିରି ଓ 4ର୍ଥ ଅମ୍ପାୟାର ପାଟ୍ରିକ ବୋନଙ୍ଗିନି ଜେଲେ ଏନେଇ ରିପୋର୍ଟ ଦାଖଲ କରିଥିଲେ। ଆଇସିସି 19 ବର୍ଷରୁ କମ କ୍ରିକେଟ ବିଶ୍ବକପ ମ୍ୟାଚ ରେଫରି ଗ୍ରେମ ଲାବରୟ 5 ଖେଳାଳିଙ୍କୁ ଦଣ୍ଡ ଶୁଣାଇଛନ୍ତି।
ତୋହ୍ବିଦ ହ୍ରିଦୟଙ୍କୁ 10ଟି ନିଲମ୍ବିତ ପଏଣ୍ଟ ଓ 6ଡିମେରିଟ ପଏଣ୍ଟ ମିଳିଛି । ହୁସେନ ଓ ଆକାଶ 8ଟି ନିଲମ୍ବିତ ପଏଣ୍ଟ ସହ 6 ଡିମେରିଟ ପଏଣ୍ଟ ପାଇଛନ୍ତି। ରକିବୁଲ ହୁସେନଙ୍କୁ 4ଟି ନିଲମ୍ବିତ ପଏଣ୍ଟ ସହ 5ଟି ଡିମେରିଟ ପଏଣ୍ଟ ମିଳିଛି। ଭାରତୀୟ ବୋଲର ରବି ବିଷ୍ଣୋଇଙ୍କୁ 7ଟି ଡିମେରିଟ ପଏଣ୍ଟ ମିଳିଛି । ଏହି ଡିମେରିଟ ପଏଣ୍ଟ 2ବର୍ଷ ପାଇଁ ଲାଗୁ ହେବ।ମ୍ୟାଚ ପରେ ବାଂଲାଦେଶ କ୍ୟାପଟେନ ଆକବର ଅଲ୍ଲୀ ନିଜ ଟିମର ଖେଳାଳିଙ୍କ ବ୍ୟବହାରକୁ ଦୁର୍ଭାଗ୍ୟଜନକ କହିବା ସହ କ୍ଷମା ପ୍ରାର୍ଥନା କରିଥିଲେ ।
