ଦୁବାଇ: କ୍ରମାଗତ 3ଟି ବିଜୟ ସହ ଚଳିତ ଇଣ୍ଡିଆନ ପ୍ରିମିୟର ଲିଗରେ ପ୍ଲେ-ଅଫ ଆଶା ବଜାୟ ରଖିଛି କିଙ୍ଗ୍ସ ଇଲେଭେନ ପଞ୍ଜାବ । ଶନିବାର ଟୁର୍ଣ୍ଣାମେଣ୍ଟର 43ତମ ମୁକାବିଲାରେ ସନରାଇଜର୍ସ ହାଇଦ୍ରାବାଦ ସହ କିଙ୍ଗ୍ସ ଇଲେଭେନ ପଞ୍ଜାବର ମୁକାବିଲା ରହିଛି ।
ଉଭୟ ପଞ୍ଜାବ ଓ ହାଇଦ୍ରାବାଦ ଟିମ 8 ପଏଣ୍ଟ ରହିଛି । ତେବେ ରନ ରେଟ୍ ଆଧାରରେ ଡେଭିଡ ୱାର୍ଣ୍ଣରଙ୍କ ହାଇଦ୍ରାବାଦ, ପଏଣ୍ଟ ଟେବୁଲରେ ପଞ୍ଜାବ ଉପରେ ରହିଛି । ତେବେ ଟୁର୍ଣ୍ଣାମେଣ୍ଟର ପରବର୍ତ୍ତୀ ପର୍ଯ୍ୟାୟକୁ ଉନ୍ନୀତ ହେବାକୁ ହେଲେ, ଉଭୟ ଟିମକୁ ଅବଶିଷ୍ଟ ସମସ୍ତ ମ୍ୟାଚରେ ବିଜୟ ହାସଲ କରିବାକୁ ହେବ ।
କ୍ୟାପଟେନ କେଏଲ ରାହୁଲ, ଓପନିଂ ପାର୍ଟନର ମୟଙ୍କ ଅଗ୍ରୱାଲ ଓ କ୍ରିସ ଗେଲଙ୍କୁ ନେଇ ପଞ୍ଜାବର ବ୍ୟାଟିଂ ଅର୍ଡର ଶକ୍ତିଶାଳୀ ରହିଛି । ମଧ୍ୟକ୍ରମରେ ନିକୋଲାସ ପୁରୋନ ଓ ଗ୍ଳେନ ମାକ୍ସୱେଲ ଧୁଆଁଧାର ବ୍ୟାଟିଂ କରିବାରେ ମାହିର ।
ବୋଲିଂ ବିଭାଗରେ ମହମ୍ମଦ ସାମି, ଓ କିୱି ଅଲରାଉଣ୍ଡର ଜେମ୍ସ ନିସାମ ମଧ୍ୟ ରହିଛନ୍ତି ।
ଅନ୍ୟପଟେ ସନରାଇଜର୍ସ ହାଇଦ୍ରାବାଦ ପାଖରେ ମଧ୍ୟ କ୍ୟାପଟେନ ଡେଭିଡ ୱାର୍ଣ୍ଣର ଓ ଜନ୍ନି ବେୟାରଷ୍ଟୋଙ୍କ ରୂପରେ ଦକ୍ଷ ଓପନର ରହିଛନ୍ତି । ମନିଷ ପାଣ୍ଡେ, ବିଜୟ ଶଙ୍କର ମଧ୍ୟ କ୍ରମରେ ରହିଛନ୍ତି ।
ବୋଲିଂ ବିଭାଗରେ ଜେସନ ହୋଲ୍ଡର, ସ୍ପିନର ରସିଦ ଖାନ ଓ ସାହାବଜ ନଦୀମ ରହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
