ଚେନ୍ନାଇ: କ୍ୟାରିୟରର ପଞ୍ଚମ ଟେଷ୍ଟ ଶତକ ହାସଲ କରିବା ସହ ରବିଚନ୍ଦ୍ରନ ଅଶ୍ବିନ ଭାରତକୁ ଦ୍ବିତୀୟ ଇଂନିସରେ ସମ୍ମାନଜନକ ସ୍କୋରରେ ପହଞ୍ଚାଇଛନ୍ତି । ଦ୍ବିତୀୟ ଟେଷ୍ଟର ପ୍ରଥମ ଇଂନିସରେ ପ୍ରଥମେ ବଲ୍ ରେ କମାଲ କରିବା ପରେ ଦ୍ବିତୀୟ ଇଂନିସରେ ବ୍ୟାଟରେ କରିସ୍ମା ଦେଖାଇଛନ୍ତି ଅଭିଜ୍ଞ ଅଶ୍ବିନ ।
ସ୍ପିନ ଅନୂକୂଳ ପିଚ୍ରେ ଷ୍ଟାର ବ୍ୟାଟ୍ସମ୍ୟାନ ତିଷ୍ଠିବାକୁ ସଂଘର୍ଷ କରୁଥିବା ବେଳେ ଅଶ୍ବିନଙ୍କ ଶତକୀୟ ଇଂନିସକୁ ସବୁମହଲରେ ପ୍ରଶଂସା କରାଯାଉଛି । ମାରାଥନ ଇଂନିସ ଖେଳିଥିବା ଅଶ୍ବିନ ବ୍ୟାଟିଂର ଶ୍ରେୟ ବ୍ୟାଟିଂ କୋଚ ବିକ୍ରମ ରାଠୋରଙ୍କୁ ଦେଇଛନ୍ତି ।
ଇଂଲଣ୍ଡ ବିପକ୍ଷ ଦ୍ବିତୀୟ ଟେଷ୍ଟର ତୃତୀୟ ଦିନରେ ଅଶ୍ବିନ ଘରୋଇ ଦର୍ଶକଙ୍କ ସାମ୍ନାରେ ଚମତ୍କାର ପ୍ରଦର୍ଶନ କରିଥିଲେ । ଏକାକି ଇଂଲିସ ବୋଲରଙ୍କ ଉଚିତ ମୁକାବିଲା କରିବା ସହ ଆକ୍ରଣଣତ୍ମାକ ରଣନୀତି ଆପଣାଇ ଶତକ ହାସଲ କରିଥିଲେ ।
ଫଳରେ ଭାରତ ଭ୍ରମଣକାରୀ ଦଳ ସାମ୍ନାରେ 482 ରନର ବିଜୟ ଲକ୍ଷ୍ୟ ରଖିଛି । ତେବେ ତୃତୀୟ ଦିନ ଖେଳ ଶେଷ ସୁଦ୍ଧା 53 ରନରେ 3 ୱିକେଟ ହରାଇ ସଂଘର୍ଷ କରୁଛି ଜୋ ରୁଟ୍ଙ୍କ ଦଳ । ଭାରତ ବିଜୟ ଠାରୁ ମାତ୍ର 7 ୱିକେଟ ଦୂରରେ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
