ଭୁବନେଶ୍ବର: ସଙ୍ଗୀତ ନିର୍ଦ୍ଦେଶକ ଡକ୍ଟର ଶାନ୍ତନୁ ମହାପାତ୍ରଙ୍କ ସ୍ମୃତିରେ ଶାନ୍ତନୁ ଜୟନ୍ତୀ ସମାରୋହ ୨୦୨୧ ପାଳିତ ହୋଇଯାଇଛି । ଶାନ୍ତନୁ ମହାପାତ୍ର ଫାଉଣ୍ଡେସନ ଓ MGMRL ଫାଉଣ୍ଡେସନ ମିଳିତି ଆନୁକୂଲ୍ୟରେ ସହଯୋଗରେ ଏହି ସମାରୋହ ଆୟୋଜିତ ହୋଇଛି । ଏହି ରଙ୍ଗାରଙ୍ଗ ସନ୍ଧ୍ୟାକୁ ପ୍ରତିଷ୍ଠିତ ଅଭିନେତା ତଥା ନିର୍ଦ୍ଦେଶକ ପ୍ରଶାନ୍ତ ନନ୍ଦ ଉଦଘାଟନ କରିଥିଲେ । ଏହି ଅବସରରେ ସୁନାମଧନ୍ୟ କଣ୍ଠଶିଳ୍ପୀ ପ୍ରଣବ ପଟ୍ଟନାୟକଙ୍କୁ ଶାନ୍ତନୁ ସମ୍ମାନ ୨୦୨୧ରେ ସମ୍ମାନିତ କରାଯାଇଛି ।
ଏହାସହ MGMRL ଫାଉଣ୍ଡେସନ ପକ୍ଷରୁ ଲୋକପ୍ରିୟ ଅଭିନେତା ସବ୍ୟସାଚୀ ମିଶ୍ରଙ୍କୁ ପ୍ରଥମ ଉତ୍କର୍ଷ ସମ୍ମାନରେ ସମ୍ମାନିତ କରାଯାଇଛି । ଶାନ୍ତନୁ ଜୟନ୍ତୀ ସମାରୋହରେ ଅନେକ ଜଣାଶୁଣା ତାରକା ଯୋଗ ଦେଇ ସମାରୋହରେ ଚାରଚାନ୍ଦ ଲଗାଇଥିଲେ । ଏହି କାର୍ଯ୍ୟକ୍ରମରେ ଶାନ୍ତନୁ ମହାପାତ୍ରଙ୍କ ଦ୍ବାରା ନିର୍ଦ୍ଦେଶିତ ଲୋକପ୍ରିୟ ଗୀତ ପରିବେଷଣ ହୋଇଥିଲା ।
ଆଗୋ ଚନ୍ଦ୍ରିକା, ମୟୂରୀ ଗୋ, ତୁମକୁ ପାରୁନି ତ ଭୁଲି, ଆଜି ମୁଁ ଶ୍ରାବଣୀ, ଉଆଁସୀ ରାତି , ଯା ଯା ରେ ଭାସି ଯା, ଭଳି ଅଭୁଲା ଗୀତ ଗୁଡିକକୁ କାର୍ଯ୍ୟକ୍ରମରେ କଣ୍ଠଶିଳ୍ପୀମାନେ ନିଜ କଣ୍ଠରେ ସଜାଇଥିଲେ । ବିଶିଷ୍ଟ କଣ୍ଠଶିଳ୍ପୀ ଲକ୍ଷ୍ମୀକାନ୍ତ ପାଲିତ, ଦେବାଶିଷ ମହାପାତ୍ର, ବନ୍ଦୀସ ପାଲିତ, ଅଭିଜିତ ମିଶ୍ର, ଶୋହିନୀ ମିଶ୍ର, ନାଜିଆ ଆଲାମ ପ୍ରମୁଖ ଉପସ୍ଥିତ ରହି ଏହି ସାଂସ୍କୃତିକ କାର୍ଯ୍ୟକ୍ରମ ପରିଚାଳନା କରିଥିଲେ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
