ମୁମ୍ବାଇ: ଗତ 26 ରାତି ପ୍ରାୟ 9ଟାରେ ମୁମ୍ବାଇର ଭର୍ସୋଭା ପୋଲିସ ଷ୍ଟେସନ ଅଞ୍ଚଳରେ ଯୋଗେଶ କୁମାର ମହିପାଲ ସିଂ ନାମକ ଜଣେ ଯୁବକ ଅଭିନେତ୍ରୀ ମାଲଭି ମଲହୋତ୍ରା ଉପରେ ଛୁରୀ ଦ୍ବାରା ଆକ୍ରମଣ କରିଥିଲେ। ଏହି ଆକ୍ରମଣରେ ସେ ଆହତ ହୋଇଥିବାରୁ ତାଙ୍କୁ କୋକିଲାବେନ ଅମ୍ବାନୀ ହସ୍ପିଟାଲରେ ଭର୍ତ୍ତି କରାଯାଇଥିଲା । ଏବେ ତାଙ୍କ ଚିକିତ୍ସା ଚାଲିଛି। ଇତିମଧ୍ୟରେ ଶୁଣିବାକୁ ମିଳୁଛି ଯେ ଘଟଣା ସ୍ଥଳରୁ ଫେରାର ହୋଇଯାଇଥିବା ତାଙ୍କ ପୁରୁଷ ବନ୍ଧୁ ଯୋଗେଶ ପୋଲିସ ହାତରେ ଧରାପଡିଛି ।
ଅଭିଯୁକ୍ତକୁ ଭର୍ସୋଭା ପୋଲିସ ଗିରଫ କରିଛି। ପୋଲିସ ଯାଞ୍ଚ ସମୟରେ ଯୋଗେଶଙ୍କ ଗାଡି ଦୁର୍ଘଟଣାର ସମ୍ମୁଖୀନ ହୋଇଥିଲା । ଯାହାପରେ ତାଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିଲା । ଯୋଗେଶଙ୍କୁ ହସ୍ପିଟାଲରୁ ଡିସଚାର୍ଜ କରାଯିବା ପରେ ଗିରଫ କରାଯାଇଛି । ସେହିପରି ତାଙ୍କୁ କୋର୍ଟରେ ହାଜର କରାଯାଇ ନଭେମ୍ବର 2 ପର୍ଯ୍ୟନ୍ତ ପୋଲିସ ହେପାଜତରେ ରଖାଯିବ । ଆକ୍ରମଣରେ ସେ ବ୍ୟବହାର କରିଥିବା ଛୁରୀକୁ ମଧ୍ୟ ପୋଲିସ ଜବତ କରିଛି । ସେପଟେ ଅଭିନେତ୍ରୀ କଙ୍ଗନା ରଣାୱତଙ୍କ ମାଲଭିଙ୍କ ପାଇଁ ଏକ ଟ୍ବିଟ କରି ସୁସ୍ଥ ହେବାର କାମନା କରିଛନ୍ତି ।
ପ୍ରକାଶ ଥାଉକି ଏହି ମାମଲାଟି ପ୍ରେମରେ ଧୋକାକୁ ନେଇ କୁହାଯାଉଛି । କାରଣ ମାଲଭି ଗତ ବର୍ଷ ଯୋଗେଶଙ୍କ ସହ ବନ୍ଧୁତା ସ୍ଥାପନ କରିଥିଲେ । ଦୁହେଁ ତିନିରୁ ଚାରିଥର ସାକ୍ଷାତ ମଧ୍ୟ କରିଥିଲେ । ହେଲେ ଯୋଗେଶ କ୍ରମାଗତ ଭାବରେ ମାଲଭିଙ୍କୁ ତାଙ୍କ ସହ ପ୍ରେମ ସମ୍ପର୍କ ରଖିବାକୁ ବାଧ୍ୟ କରିଥିଲେ। ଆଉ ବିବାହ କରିବାକୁ ସବୁବେଳେ କହିଥିବାବେଳେ ଯୋଗେଶଙ୍କ ପ୍ରେମ ସ୍ବୀକାର କରିନଥିଲେ ମାଲଭି । ଯାହାପରେ ମାଲଭିଙ୍କୁ ଫୋନ୍ କରି ଖୁବ୍ ହଇରାଣ ମଧ୍ୟ କରୁଥିଲେ ସେ।
ବ୍ୟୁରୋ ରିପୋର୍ଟ, ଇଟିଭି ଭାରତ
