ମୁମ୍ବାଇ: ସୁଶାନ୍ତ ସିଂ ରାଜପୁତ ମୃତ୍ୟୁ ମାମଲା ସହ ଜଡିତ ଥିବା ଡ୍ରଗ୍ସ ଡିଲିଂ କେସରେ ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ ଦ୍ବାରା ମଙ୍ଗଳବାର ଗିରଫ ହୋଇଛନ୍ତି ତାଙ୍କ ଗାର୍ଲଫ୍ରେଣ୍ଡ ରିଆ ଚକ୍ରବର୍ତ୍ତୀ । ପୂର୍ବରୁ ଏନସିବି ଦ୍ବାରା ଗିରଫ ହୋଇଥିଲେ ତାଙ୍କ ଭାଇ ସୌଭିକ ଚକ୍ରବର୍ତ୍ତୀ ଓ ସୁଶାନ୍ତଙ୍କ ମ୍ୟାନେଜର ସାମୁଏଲ ମିରାଣ୍ଡା, ରୋଷେୟା ନୀରଜ । ତାଙ୍କ ଗିରଫ ଉପରେ ବର୍ତ୍ତମାନ ଓକିଲ ସତୀଶ ମାନସିନ୍ଦେଙ୍କ ପ୍ରତିକ୍ରିୟା ସାମ୍ନାକୁ ଆସିଛି ।
ସତୀଶ କହିଛନ୍ତି, ନ୍ୟାୟ ନାଁରେ ଚାଲିଛି ଉପହାସ । ତିନୋଟି ଏଜେନ୍ସି ମିଶି ଜଣେ ମହିଳାର ଯାଞ୍ଚ କରୁଥିଲେ । କାରଣ ସେ ସ୍ବର୍ଗତ ଅଭିନନେତା ଆଉ ଡ୍ରଗ୍ସ ଅଭ୍ୟସ୍ତ ସୁଶାନ୍ତ ସିଂ ରାଜପୁତଙ୍କ ସହ ରିଲେସନଶିପରେ ଥିଲେ । ଯିଏ ଡିପ୍ରେସନର ଶିକାର ହୋଇ ମୁମ୍ବାଇର 5 ଜଣ ବଡ ମାନସିକ ରୋଗ ବିଶେଷଜ୍ଞଙ୍କ ପାଖରେ ନିଜର ଚିକିତ୍ସା କରାଉଥିଲେ । ଆଉ ବେଆଇନ ଭାବେ ବ୍ୟବହୃତ ମେଡିସିନ ସେବନ କରିବା ସହ ଡ୍ରଗ୍ସ ବ୍ୟବହାର କରି ଆତ୍ମହତ୍ୟା କରିଥିଲେ ।’
ପ୍ରକାଶ ଥାଉକି ରିଆଙ୍କୁ ଖୁବ ଶୀଘ୍ର ଡାକ୍ତରୀ ପରୀକ୍ଷା ପାଇଁ ନିଆଯିବ ଏବଂ ଆସନ୍ତାକାଲି କୋର୍ଟରେ ହାଜର କରାଯିବ ବୋଲି ଶୁଣିବାକୁ ମିଳୁଛି । ଗତ ତିନି ଦିନ ଧରି ଏନସିବି ପଚରାଉଚରା ପରେ ‘ଜଲେବୀ’ ଅଭିନେତ୍ରୀଙ୍କୁ ଗିରଫ କରାଯାଇଛି ।
