ମୁମ୍ବାଇ: ଦୀପିକା ପାଦୁକୋନ ନିକଟରେ ଜେଏନୟୁ ଛାତ୍ରଛାତ୍ରୀଙ୍କ ବିରୋଧ ପ୍ରଦର୍ଶନରେ ସାମିଲ ହୋଇ ଚର୍ଚ୍ଚାରେ ଆସିଥିଲେ । ତାଙ୍କର ଏପରି ବ୍ୟବହାରରେ ଅନେକ ଲୋକ କ୍ରୋଧିତ ହୋଇ ତାଙ୍କ ଅଭିନୀତ ଫିଲ୍ମ ‘ଛପାକ’ର ବଏକଟ ସୋସିଆଲ ମିଡିଆରେ କରିଥିଲେ । ହେଲେ ଗତ ଶୁକ୍ରବାର ରିଲିଜ ହୋଇଯାଇଛି ‘ଛପାକ’ । ତାଙ୍କ ଜେଏନୟୁ ଯିବା ମାମଲାରେ ଅନେକ ସେଲିବ୍ରିଟି ପ୍ରତିକ୍ରିୟା ଦେଇସାରିଛନ୍ତି । ଆଉ ଏବେ ଏହି ମାମଲାରେ ବୟାନ ଦେଇଛନ୍ତି ବି-ଟାଉନର କୁଇନ କଙ୍ଗନା ରଣାୱତ ।
ଏକ ସାକ୍ଷାତକାରରେ କଙ୍ଗନାଙ୍କୁ ଯେବେ ଦୀପିକାଙ୍କ ଜେଏନୟୁ ମାମଲା ବିଷୟରେ ପ୍ରଶ୍ନ କରାଯାଇଥିଲା । ସେ ନିଜ ବୟାନରେ କହିଥିଲେ, ‘ଦୀପିକା ଜାଣିଛନ୍ତି ସେ କଣ କରୁଛନ୍ତି । ସବୁ ଜିନିଷକୁ ନେଇ ଦୀପିକାଙ୍କର ମଧ୍ୟ ଗଣତାନ୍ତ୍ରିକ ଅଧିକାର ଅଛି । ଯାହାର ବ୍ୟବହାର ସେ କରିଥିଲେ । ଦୀପିକା ଯେଉଁ ଷ୍ଟାଣ୍ଡ ନେଇଛନ୍ତି, ମୁଁ ତାହା ଉପରେ କିଛି କହିବାକୁ ଚାହୁଁନାହିଁ । କାରଣ ଅନ୍ୟଙ୍କ ଷ୍ଟାଣ୍ଡ ଉପରେ ମୋର କହିବାର କୌଣସି ଅଧିକାର ନାହିଁ । ସେ ଏହା କରିଥିଲେ ଭଲ ହୋଇଥାଆନ୍ତା ତାହା କରିଥିଲେ ଭଲ ହୋଇଥାଆନ୍ତା ଏମିତି କହିବାର ମୋର ଅଧିକାର ନାହିଁ ।’
ତାଙ୍କ ରାୟ ଉପରେ ପଚରାଯିବାକୁ ସେ କହିଥିଲେ ଯେ ଯଦି ତାଙ୍କ ଉପରକୁ କଥା ଆସେ ତେବେ ସେ ଏପରି କରିନଥାଆନ୍ତେ । ସେ କେବେ ମଧ୍ୟ ଟୁକଡା ଟୁକଡା ଗ୍ୟାଙ୍ଗ ପଛରେ ଠିଆ ହେବେ ନାହିଁ । କିଛି ବି ହୋଇଯାଉ ସେ ଦେଶକୁ ବିଭାଜିତ କରୁଥିବା କୌଣସି ସଂଗଠନର ସମର୍ଥନ କରିବେ ନାହିଁ ।
