ବ୍ୟାଙ୍କକ୍: ଉତ୍ତରପୂର୍ବ ଥାଇଲାଣ୍ଡ୍ରେ ଅମାନବୀୟ କାଣ୍ଡ । ଏକ ପ୍ରିସ୍କୁଲ୍ କେୟାର ସେଣ୍ଟର ଉପରେ ଆଖିବୁଜା ଗୁଳିଚାଳନା କରିଛନ୍ତି ଜଣେ ପୂର୍ବତନ ପୋଲିସ ଅଧିକାରୀ (Attack on Thailand daycare center) । ଫଳରେ ପ୍ରାୟ ୩୪ ଜଣଙ୍କ ମୃତ୍ୟୁ ହୋଇଛି । ମୃତକଙ୍କ ମଧ୍ୟରେ 22 ଜଣ ଶିଶୁ ରହିଛନ୍ତି । ଗୁଳିକାଣ୍ଡ ପରେ ପୋଲିସ ଅଧିକାରୀ ଜଣକ ନିଜେ ନିଜକୁ ଗୁଳି କରି ଆତ୍ମହତ୍ୟା କରିଛନ୍ତି ।
ପ୍ରାଥମିକ ସୂଚନା ମୁତାବକ ମୃତକଙ୍କ ମଧ୍ୟରେ ୨୨ ଜଣ କିଶୋର ଓ ଶିଶୁ ରହିଛନ୍ତି । ଏହି ଗୁଳିକାଣ୍ଡ ଉତ୍ତରପୂର୍ବ ଥାଇଲାଣ୍ଡ୍ର ନା କ୍ଲାଙ୍ଗ୍ ଜିଲ୍ଲାରେ ଘଟିଛି । ଗତ ୨୦୨୧ରେ ସମ୍ପୃକ୍ତ ଆକ୍ରମଣକାରୀକୁ ଡ୍ରଗ୍ସ୍ ନେଉଥିବା ଅଭିଯୋଗରେ ଚାକିରରୁ ବରଖାସ୍ତ କରାଯାଇଥିଲା ।
ଗୁଳିକାଣ୍ଡ ଘଟାଇବା ପରେ ସେଠାରୁ ଫେରାର ହୋଇଯାଇଥିଲା ଅଭିଯୁକ୍ତ । ଏତିକି ମନ ଶାନ୍ତି ହୋଇନଥିଲା । ଏହାପରେ ସେ ନିଜ ପତ୍ନୀ ଓ ଛୁଆଙ୍କୁ ମଧ୍ୟ ହତ୍ୟା କରିଥିଲା । ଏହାପରେ ଆତ୍ମହତ୍ୟା କରିଥିଲା । ସ୍ଥାନୀୟ ମିଡିଆ ରିପୋର୍ଟ ମୁତାବକ ପ୍ରିସ୍କୁଲ୍ ସେଣ୍ଟର ଭିତରକୁ ପ୍ରବେଶ କରିବା ପରେ ଅଭିଯୁକ୍ତ ପ୍ରଥମେ ସ୍କୁଲ୍ର ୪ରୁ ୫ଜଣ କର୍ମଚାରୀଙ୍କୁ ହତ୍ୟା କରିଥିଲା । ସେମାନଙ୍କ ମଧ୍ୟରେ ଜଣେ ୮ ମାସର ଗର୍ଭବତୀ ମଧ୍ୟ ସାମିଲ ରହିଛନ୍ତି ।
ଏହି ନାରକୀୟ କାଣ୍ଡ ଘଟାଇବା ବେଳେ ଅଭିଯୁକ୍ତ ଜଣ ଭିଡିଓ ମଧ୍ୟ ରେକର୍ଡିଂ କରୁଥିଲା । ଏହି ସବୁ ଭିଡିଓକୁ ସୋସିଆଲ ମିଡିଆରେ ସେୟାର କରୁଥିଲା । ପ୍ରଥମେ ସ୍ଥାନୀୟ ଲୋକେ ଭାବିଥିଲେ ଏଠାରେ କୌଣସି ଆତସବାଜୀ ହେଉଛି । କିନ୍ତୁ ସୋସିଆଲ ମିଡିଆରେ ଭିଡିଓ ସେୟାର ହେବାପରେ ପ୍ରତ୍ୟେକଙ୍କ ହୋସ୍ ଉଡ଼ିଯାଇଥିଲା । ଭିଡିଓ ରକ୍ତରେ ଜୁଡ଼ୁବୁଡ଼ୁ ଶିଶୁ ନିଃଶ୍ବ ହୋଇ ପଡ଼ି ରହିଥିବା ଦେଖାଯାଇଥିଲା ।
ଥାଇଲାଣ୍ଡରେ ମାନ୍ୟତାପ୍ରାପ୍ତ ବନ୍ଧୁକଧାରୀଙ୍କ ସଂଖ୍ୟା ଖୁବ୍ କମ୍ ରହିଛି । ତେବେ ବେଆଇନ ବନ୍ଧୁକଧାରୀଙ୍କୁ ନେଇ କୌଣସି ନିର୍ଦ୍ଦିଷ୍ଟ ତଥ୍ୟ ନାହିଁ । ଗତ ୨୦୨୦ରେ ମଧ୍ୟରେ ଜଣେ କ୍ରୋଧାନ୍ବିତ ଯବାନ ଥାଇଲାଣ୍ଡର ୪ଟି ସ୍ଥାନରେ ଗୁଳିକାଣ୍ଡ ଘଟାଇଥିଲେ । ଏଥିରେ ୫୭ ଜଣଙ୍କ ପ୍ରାଣହାନୀ ହୋଇଥିଲା ।
