ଲଣ୍ଡନ: ୟୁକେକୁ ଦ୍ବିତୀୟ ପର୍ଯ୍ୟାୟରେ ପ୍ରତ୍ୟାବର୍ତ୍ତନ କରୁଛି କୋରୋନା ସଂକ୍ରମଣ । ଏନେଇ ଶୁକ୍ରବାର ସୂଚନା ଦେଇଛନ୍ତି ପ୍ରଧାନମନ୍ତ୍ରୀ ବୋରିସ ଜନଶନ । ବର୍ତ୍ତମାନର ପରିସ୍ଥିତିକୁ ଏଡାଇ ଦିଆଯାଇ ନପାରେ ବୋଲି ବୋରିସ ସ୍ପଷ୍ଟ ସୂଚନା ଦେଇଛନ୍ତି । ଏନେଇ ସେ ସୂଚନା ଦେଇ କହିଛନ୍ତି କି ଦେଶରେ ଆରମ୍ଭ ହେବାକୁ ଯାଉଥିବା ଏପରି ପରିସ୍ଥିତିକୁ ନଜରରେ ରଖି ସରକାର ଆବଶ୍ୟକୀୟ ସମସ୍ତ ପଦକ୍ଷେପ ନେବା ପାଇଁ ସମୀକ୍ଷା ପ୍ରକ୍ରିୟା ଆରମ୍ଭ କରିଛନ୍ତି । ଖୁବଶୀଘ୍ର ଏନେଇ ଘୋଷଣା କରାଯିବ ।
ଶୁକ୍ରବାର ଅକ୍ସଫୋର୍ଡ ନିକଟସ୍ଥ ଭ୍ୟାକ୍ସିନ ମ୍ୟାନୁଫ୍ୟାକ୍ଚରିଂ ଇନୋଭେସନ ସେଣ୍ଟର କନଷ୍ଟ୍ରକ୍ସନ ସାଇଟ ବୁଲିବାକୁ ଯାଇ ଗଣମାଧ୍ୟମକୁ ବୋଲିସ କହିଛନ୍ତି କି ସ୍ଥିତି ଉପରେ କଡା ନଜର ରଖାଯାଇଛି । ଏହା ଆଜି କି କାଲି ନୁହେଁ ବରଂ ଗତ କିଛି ସପ୍ତାହ ହେବ ସ୍ପଷ୍ଟ ହୋଇଛି କି ଦେଶରେ କୋରୋନାର ଦ୍ବିତୀୟ ଲହରୀ କୌଣସି କ୍ଷଣରେ ଆରମ୍ଭ ହୋଇପାରେ । ତେଣୁ ନାଗରିକଙ୍କୁ ସଚେତନ ଓ ସତର୍କ ରହିବାର ଆବଶ୍ୟକତା ରହିଛି । ସେପଟେ ଲକଡାଉନ ନେଇ ପ୍ରଶ୍ନ କରାଯିବାରୁ ବୋରିସ କହିଛନ୍ତି କି ବର୍ତ୍ତମାନ ପୁଣି ଥରେ ସ୍କୁଲ ବନ୍ଦ କରିବା ପାଇଁ ସରକାର ଇଚ୍ଛୁକ ନାହାଁନ୍ତି । ତେଣୁ ଏହାର ବିକଳ୍ପ ଚିନ୍ତା ଜାରି ରହିଛି ।
ଦେଶରେ ପୁଣି ଲକଡାଉନ କରିବାକୁ ଇଚ୍ଛା ନଥିଲେ ବି ପରିସ୍ଥିତି ଉପରେ ସବୁ କିଛି ନିର୍ଭର କରୁଛି ବୋଲି ବୋରିସ କହିଛନ୍ତି । ଏହିକ୍ରମରେ ଗତ 24 ଘଣ୍ଟାରେ ବ୍ରିଟେନରେ 4322 ନୂଆ ମାମଲା ସହ 27ଟି ମୃତ୍ୟୁ ରେକର୍ଡ କରାଯାଇଥିବା ଜଣାପଡିଛି । ଏଥିସହ ଦେଶରେ ମୋଟ ଆକ୍ରାନ୍ତ ସଂଖ୍ୟା 3,85,986ରେ ପହଞ୍ଚିଥିବାବେଳେ ମୃତ୍ୟୁ ସଂଖ୍ୟା 41,732ରେ ପହଞ୍ଚିଛି ।
@IANS
