ଇସଲାମାବାଦ: ପାକିସ୍ତାନର ପିଛା ଛାଡୁନି ବିବାଦ । ପାକିସ୍ତାନ ଅନ୍ତର୍ଜାତୀୟ ଏୟାରଲାଇନ୍ସ ଲଗାତାର ବିବାଦ ଘେରରୁ ଟାଣି ହୋଇଚାଲିଥିବା ବେଳେ ରବିବାର ପୁଣି ମୁଣ୍ଡ ଟେକିଛି ଆଉ ଏକ ଘଟଣା । କିଛି ଦିନ ତଳେ ପିଆଏରେ ପାଇଲଟଙ୍କ ଜାଲ ଲାଇସେନ୍ସ ଥିବା ଘଟଣା ସାମ୍ନାକୁ ଆସିଥିବା ବେଳେ ରବିବାର ଆଉ 30 ଜଣ ପାଇଲଟଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି । ଏନେଇ ସୂଚନା ଦେଇଛନ୍ତି ପାକିସ୍ତାନ ବିମାନ ଚଳାଚଳ ମନ୍ତ୍ରୀ ଗୁଲାମ ସରୱାର ଖାନ ।
ରାୱଲପିଣ୍ଡିରେ ସେକ୍ରେଟାରିଏଟରେ ସମ୍ବୋଧନ ଦେବା ସମୟରେ ଗୁଲାମ କହିଥିଲେ କି ଯେଉଁ ପାଇଲଟଙ୍କ ଲାଇସେନ୍ସରେ ସନ୍ଦେହ ପ୍ରକାଶ ପାଇଛି ସେମାନଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି । ଏହାପରେ ସେମାନଙ୍କୁ କୋର୍ଟରେ ହାଜର କରାଯିବ । କୋର୍ଟର ଶୁଣାଣୀ ଆଧାରରେ ସରକାର ସେମାନଙ୍କ ଭାଗ୍ୟ ନିର୍ଦ୍ଧାରଣ କରିବା ନେଇ ସେ ସ୍ପଷ୍ଟ କରିଛନ୍ତି । ଏନେଇ ଏକ ତଦନ୍ତକାରୀ କମିଟି ମଧ୍ୟ ଗଠନ କରାଯାଇ ତଦନ୍ତ ଆରମ୍ଭ ହୋଇଥିବା ସେ ପ୍ରକାଶ କରିଛନ୍ତି ।
ବର୍ତ୍ତମାନ ସୁଦ୍ଧା ହୋଇଥିବା ତଦନ୍ତ ଆଧାରରେ 850 ଜଣ ପାଇଲଟଙ୍କ ପାଖରେ ଥିବା ଲାଇସେନ୍ସ ଉପରେ ସନ୍ଦେହ ପ୍ରକାଶ କରାଯାଇଛି । ଯେଉଁଥିରୁ 262ଜଣଙ୍କ ପାଖରେ ଜାଲ ଲାଇସେନ୍ସ ରହିଥିବା ଜଣାପଡିଛି । ତେବେ ତଦନ୍ତକାରୀ କମିଟି ନିଜ ତଦନ୍ତ ରିପୋର୍ଟ ସିଧା ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପାଖରେ ଜମା କରିଛନ୍ତି । ଯାହା ଆଧାରରେ 30 ଜଣଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି ।
@IANS
