ତେହେରାନ: କୋରୋନା ସଂକ୍ରମଣକୁ ନଜରରେ ରଖି ମାର୍ଚ୍ଚ ମାସ ମଧ୍ୟ ଭାଗରୁ ବନ୍ଦ ହୋଇଥିବା ଇରାନ ସୋମବାର ଏବେ ପୁଣି ସ୍ବାଭାବିକ ସ୍ଥିତିକୁ ଫେରିବାକୁ ଯାଉଛି । ରବିବାର ଏନେଇ ସରକାରୀ ଭାବେ ଘୋଷଣା କରାଯାଇଛି । ସୋମବାର ଦେଶର ବିଭିନ୍ନ ସ୍ଥାନରେ ମସଜିଦ ଖୋଲିବା ନେଇ ନିଷ୍ପତ୍ତି ନିଆଯାଇଛି । ପବିତ୍ର ରମଜାନ ମାସ ପାଇଁ ଏହି ନିଷ୍ପତ୍ତି ନିଆଯାଇଥିବା ପ୍ରକାଶ କରାଯାଇଛି ।
ରବିବାର ରାଷ୍ଟ୍ରପତି ହସନ ରୌହାନୀ ଘୋଷଣା କରି କହିଛନ୍ତି କି 132 ହ୍ବାଇଟ ସିଟି ବା ବିପଦ ସଙ୍କେତ ବାହାରେ ଥିବା ସହରରେ ସୋମବାର ମସଜିଦ ଖୋଲାଯିବ । ଏଥିସହ ଏହି ସହରଗୁଡିକରେ ବିଭିନ୍ନ ଛୋଟ ବଡ ବ୍ୟବସାୟ ସୋମବାରଠାରୁ ଆରମ୍ଭ କରିବା ପାଇଁ ଅନୁମତି ଦିଆଯାଇଛି । ଏହି ସହରଗୁଡିକରେ ଶୁକ୍ରବାର ପ୍ରାର୍ଥନା ପୂର୍ବ ବିଧି ମୁତାବକ ହେବା ନେଇ କୁହାଯାଇଛି ।
ଅନ୍ୟପଟେ ସମ୍ପୃକ୍ତ ସହରଗୁଡିକରେ ସୁରକ୍ଷା ଦୃଷ୍ଟିରୁ ମାସ୍କର ବ୍ୟବହାର ଓ ସାମାଜିକ ଦୂରତା ବଜାୟ ରଖିବା ପାଇଁ ମଧ୍ୟ କଡା ନିର୍ଦ୍ଦେଶ ଦିଆଯାଇଛି । ସେହିପରି ମେ 16ରୁ ଦେଶର ସମସ୍ତ ସ୍କୁଲ ଖୋଲିବା ନେଇ ରାଷ୍ଟ୍ରପତି ଘୋଷଣା କରିଛନ୍ତି । ସୂଚନା ମୁତାବକ ଇରାନରେ 96,448ଜଣ ଆକ୍ରାନ୍ତ ରହିଥିବା ବେଳେ ମୃତ୍ୟୁ ସଂଖ୍ୟା 6156 ରହିଛି ।
