ବେଜିଂ: ଗବେଷକମାନେ ଏକକ-କୋଷିକା ଅନୁଧ୍ୟାନର ବ୍ୟବହାରରେ କୋଭିଡ-19 ଆକ୍ରାନ୍ତଙ୍କ ଶରୀରରେ ଅନେକ ଆଣ୍ଟିବଡିର ସନ୍ଧାନ ପାଇଛନ୍ତି । ଏହି ଆଣ୍ଟିବଡି ମହାମାରୀ ସାଜିଥିବା କୋରୋନା ଭୂତାଣୁକୁ ପ୍ରଭାବଶୂନ୍ୟ ବା ନ୍ୟୁଟ୍ରାଲ କରିବାରେ ସହାୟକ । ଏହା କୋରୋନା ସଂକ୍ରମଣର ନିରାକରଣ ଦିଗରେ ଏକ ବଡ ଉପଲବ୍ଧି ବୋଲି ଗବେଷକମାନେ ମତ ରଖିଛନ୍ତି ।
ଏହି ଗବେଷକଙ୍କ ମଧ୍ୟରେ ପେକିଂ ୟୁନିଭର୍ସିଟିର ବେଜିଂ ଆଡଭାନ୍ସଡ ଇନୋଭେସନ ସେଣ୍ଟର ଫର ଜିନୋମିକ୍ସର ନିର୍ଦ୍ଦେଶକ ସନ୍ନି ସି କହିଛନ୍ତି କି ଆଣ୍ଟିବଡି ଦ୍ବାରା ଇବୋଲା, ଏଡସ ଓ ମର୍ସ ପରି ଭୂତାଣୁର ଚିକିତ୍ସା କରାଯାଇପାରେ । ତେବେ ନିକଟରେ ଜର୍ଣ୍ଣାଲ ସେଲରେ ପ୍ରକାଶିତ ତଥ୍ୟ ମୁତାବକ ଗବେଷକମାନେ ‘ଥ୍ରୋପୁଟ ସିଙ୍ଗଲ-ସେଲ ଜିନୋମ ସିକ୍ବେନ୍ସିଂ ’ ପ୍ରକ୍ରିୟାର ବ୍ୟବହାର କରି ଜଣେ ଆକ୍ରାନ୍ତର ରକ୍ତ କଣିକାରେ ଥିବା ସୁସ୍ଥ ପ୍ଲାଜମାରୁ ଆଣ୍ଟିବଡିର ସନ୍ଧାନ କରିଥିଲେ ।
ଗବେଷକମାନେ ଏହା ମଧ୍ୟ କହିଛନ୍ତି କି, ପୂର୍ବରୁ ହୋଇଥିବା ପରୀକ୍ଷାରୁ ଜଣାପଡିଛି କି କୋରୋନା ନିରାକରଣ ପାଇଁ ଆଣ୍ଟିବଡି ବ୍ୟବହୃତ ହୋଇପାରେ । ଏହା ମଧ୍ୟ କୁହାଯାଇଛି କି ଜଣେ ସୁସ୍ଥ ହୋଇଥିବା ଆକ୍ରାନ୍ତର ଶରୀରରେ ପ୍ଲାଜମାରେ ନିରପେକ୍ଷ ଆଣ୍ଟିବଡିର ସ୍ଥିତି ଦେଖିବାକୁ ମିଳିଛି । ଏହା ଶରୀରର ରୋଗ ପ୍ରତିରୋଧକ ଶକ୍ତି ଦ୍ବାରା ପ୍ରସ୍ତୁତ ହୋଇଥାଏ । ଏହାଦ୍ବାରା ସାମାନ୍ୟ ଅସୁସ୍ଥ ଓ ଗୁରୁତର ଆକ୍ରାନ୍ତଙ୍କ ଶରୀର ସୁସ୍ଥ ହୋଇଥିବା ଦେଖାଯାଇଛି ।
ସେପଟେ ବୈଜ୍ଞାନିକମାନେ କହିଛନ୍ତି କି ପୋଟେଣ୍ଟ ନ୍ୟୁଟ୍ରାଲାଇଜିଂ ମୋଲିକ୍ୟୁଲ ବା ମୋନୋକ୍ଲୋନାଲ ଆଣ୍ଟିବଡିଗୁଡିକ ଇମ୍ୟୁନ ସିଷ୍ଟମର ବି ସେଲରେ ପ୍ରସ୍ତୁତି ହେବାର ପ୍ରକ୍ରିୟା ଅତି ଧିର ଓ ଜଟିଳ । ସେମାନେ ଏହା ବି କହିଛନ୍ତି କି ବର୍ତ୍ତମାନ ପରିସ୍ଥିତିକୁ ମୁକାବିଲା କରିବା ପାଇଁ ଏହି ପ୍ରକ୍ରିୟା ଅତି ମନ୍ଥର । ତେବେ କେବଳ ବି ସେଲରେ ହିଁ ଏହି ନିରପେକ୍ଷ ଆଣ୍ଟିବଡି ପ୍ରସ୍ତୁତିର କ୍ଷମତା ଥିବାରୁ ଶରୀରରେ ଏହାର ସ୍ଥିତି ଓ ଆଣ୍ଟିବଡି ପ୍ରସ୍ତୁତିର କ୍ଷମତା ପ୍ରଥମେ ଯାଞ୍ଚ କରିବାର ଆବଶ୍ୟକତା ରହିଛି ।
ଏହାର ବିକଳ୍ପ ସ୍ବରୂପ ଗବେଷକମାନେ ଏକ ତୀବ୍ର ଓ ପ୍ରଭାବଶାଳୀ ଏକକ-କୋଷିକା ଜିନୋମ ସିକ୍ବେନ୍ସିଂ ପ୍ରକ୍ରିୟାର ଉପସ୍ଥାପନ କରି ଦେଖିଥିଲେ କି ଏହା ମଧ୍ୟ ବି ସେଲ ଭଳି SARS-CoV-2କୁ ସ୍ଥାଣୁ କରିବା ଭଳି ଆଣ୍ଟିବଡି ପ୍ରସ୍ତୁତ କରିବାରେ ସକ୍ଷମ । ଏହି ପ୍ରକ୍ରିୟା ବର୍ତ୍ତମାନ ସମୟରେ କୋରୋନା ସଂକ୍ରମଣ ନିରାକରଣ ଦିଗରେ ଅତି ସହାୟକ ହେବ ବୋଲି ଗବେଷକମାନେ ମତ ପ୍ରକାଶ କରିଛନ୍ତି ।
ତେବେ ଏହି ଆଣ୍ଟିବଡି କେତେ ସକ୍ଷମ ତାହା ଦେଖିବା ପାଇଁ ଗବେଷକମାନେ ଏହାକୁ ଏକ ମୂଷା ଦେହରେ ପରୀକ୍ଷା କରିଥିଲେ । ଏହି ଯାନ୍ତ୍ରିକ ମୂଷା ଯାହା ମଣିଷ ପରି ଆକ୍ସେପ୍ଟର ACE2 ଦ୍ବାରା କୋରୋନା ଭୂତାଣୁକୁ ଶରୀରରେ ପ୍ରବେଶ କରିବାକୁ ଅନୁମତି ଦେଇଥିଲା । ତେବେ ଏହି ପରୀକ୍ଷାରେ ଶେଷରେ ଗବେଷକମାନେ ଦେଖିଥିଲେ କି ଏହା କୋରୋନା ସଂକ୍ରମଣକୁ ମାତ ଦେବାରେ ସଫଳ ହୋଇଛି । ତେଣୁ ଏହି ସନ୍ଧାନ ଆଗକୁ କୋରୋନା ମୁକାବିଲାରେ ସଫଳତା ଆଣିବ ବୋଲି ଗବେଷକମାନେ ମତ ଦେଇଛନ୍ତି । ଏଥିସହ ଏହି ସନ୍ଧାନକୁ ନେଇ ପରୀକ୍ଷା ନିରୀକ୍ଷା ଜାରି ରହିଛି ବୋଲି ମଧ୍ୟ ସେମାନେ ସ୍ପଷ୍ଟ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
