କେପ କାନାଭେରାଲ: ମହାକାଶରେ ଦେଖିବାକୁ ମିଳିଛି ଦ୍ବିତୀୟ ସୌରମଣ୍ଡଳର ଚିତ୍ର । ଠିକ୍ ଆମ ସୌରମଣ୍ଡଳ ପରି ଏହି ନୂଆ ସୌରମଣ୍ଡଳରେ ରହିଛି ଏକ ଉଜ୍ବଳମୟ ତାରକା । ଯାହାକୁ ବୈଜ୍ଞାନିକ ଭାଷାରେ ଶିଶୁ ସୂର୍ଯ୍ୟ ବୋଲି ମଧ୍ୟ କୁହାଯାଉଛି । ତେବେ ପ୍ରଥମ ଥର ପାଇଁ ଏହି ନୂଆ ସୌରମଣ୍ଡଳର ଏକ ଚିତ୍ର ଉତ୍ତୋଳନ କରିବାରେ ସକ୍ଷମ ହୋଇଛି ଟେଲିସ୍କୋପ । ଏହି ଚିତ୍ରରେ ଦେଖାଯାଇଛି କି ଶିଶୁ ସୂର୍ଯ୍ୟର ଚତୁଃପାର୍ଶ୍ବରେ ଦୁଇଟି ଗ୍ରହ ପରିକ୍ରମା କରୁଛନ୍ତି ।
ଆମ ସୌରମଣ୍ଡଳଠାରୁ ଏହି ସୌରମଣ୍ଡଳଟି ପ୍ରାୟ 300 ଆଲୋକବର୍ଷ ଦୂରରେ ରହିଥିବା ଜଣା ପଡିଛି । ସେପଟେ ଏହି ଚିତ୍ରଟି ବୁଧବାର ସାମ୍ନାକୁ ଆସିଛି । ଯାହାକୁ କଏଦ କରିଛି ଚିଲିର ଆଟାକାମା ମରୁଭୂମିରୁ ମହାକାଶ ଉପରେ ତୀକ୍ଷ୍ମ ନଜର ରଖିଥିବା ୟୁରୋପିଆନ ସଦର୍ଣ୍ଣ ଅବଜରଭେଟୋରୀର ବୃହତ୍ତମ ଟେଲିସ୍କୋପ । ତେବେ ଏହି ଚିତ୍ରର ସବୁଠାରୁ ଆକର୍ଷଣୀୟ ଅଶଂ ହେଉଛି ଏଥିରେ ଦୃଶ୍ୟମାନ ହେଉଥିବା ଶିଶୁ ସୂର୍ଯ୍ୟ । ଏନେଇ ସୂଚନା ଦେଇଛନ୍ତି ଅଧ୍ୟୟନର ନେତୃତ୍ବ ନେଉଥିବା ନେଦରଲ୍ୟାଣ୍ଡର ଲୈଡେନ ୟୁନିଭର୍ସିଟିର ଆଲେକ୍ସାଣ୍ଡର ବୋନ ।
ଏହି ଆବିଷ୍କାର ନେଇ ବୋନ ଅତି ଖୁସିଥିବା ବେଳେ ଏହି ଚିତ୍ର ଆଗକୁ ମହାକାଶ ଓ ସୌରମଣ୍ଡଳକୁ ଅଧିକ ଭଲ ଭାବେ ବୁଝିବାରେ ସାହାଯ୍ୟ କରିବ ବୋଲି ସେ ଆଶା କରିଛନ୍ତି । ଏହା ବୈଜ୍ଞାନିକମାନଙ୍କୁ ସୌରମଣ୍ଡଳରେ ପରିବର୍ତ୍ତନକୁ ଅନୁସନ୍ଧାନ କରିବାରେ ମଧ୍ୟ ସାହାଯ୍ୟ କରିବା ନେଇ ସେ ଏକ ଇମେଲ ଜରିଆରେ ପ୍ରକାଶ କରିଛନ୍ତି । ପୂର୍ବରୁ ଏହିପରି ଭାବେ ଆକାଶଗଙ୍ଗାରେ ଥିବା ଅନେକ ଗ୍ରହକୁ ଖୋଜାଯାଇପାରିଛି ।
ଏକ ଟେଲିସ୍କୋପ ଦ୍ବାରା ମହାକାଶରେ ଏପରି ତଥ୍ୟ ହାସଲ କରିବା କଷ୍ଟକର । ସେଥିରେ ପୁଣି ଏକ ଶିଶୁ ସୂର୍ଯ୍ୟ ଚାରି ପାଖେ ପରିକ୍ରମା କରୁଥିବା ଦୁଇ ନୂଆ ଗ୍ରହକୁ ଖୋଜିପାରିବା ଆହୁରି କଷ୍ଟକର । କିନ୍ତୁ ଏହି ଟେଲିସ୍କୋପ ଚମତ୍କାର ଭାବେ ଏପରି କଷ୍ଟକର ତଥ୍ୟା ହାସଲ କରିପାରିଛି । ଯାହା ବର୍ତ୍ତମାନ ସମୟରେ ଏକ ବହୁତ ବଡ ଉପଲବ୍ଧି । ତେବେ ଆଜି ପର୍ଯ୍ୟନ୍ତ ମହାକାଶରେ ଆମ ସୌରମଣ୍ଡଳ ବାହାରେ 4183ଟି ଗ୍ରହର ସନ୍ଧାନ ହୋଇପାରିଛି । ଯେଉଁଥିରୁ ମାତ୍ର 48ଟିକୁ ସିଧାସଳଖ ଫଟୋ ଜରିଆରେ ସନ୍ଧାନ କରାଯାଇପାରିଛି । ଯାହାକୁ ସମୁଦାୟ ମାତ୍ରାର 1 ପ୍ରତିଶତ ବୋଲି ନାସା ମତ ଦେଇଛି ।
ତେବେ ଏପରି ସିଧାସଳଖ ଫଟୋ ଦ୍ବାରା ମିଳୁଥିବା ଗ୍ରହ ସନ୍ଧାନ ଦ୍ବାରା ସୌରମଣ୍ଡଳ ବାହାରେ ଜୀବନ ସତ୍ତାର ସମ୍ଭାବନା ଅଛି କି ନାହିଁ ଜାଣିବା ପାଇଁ ଏକ ନୂଆ ନୂଆ ସୁଯୋଗ ମିଳିପାରୁଛି । କେବଳ ସେତିକି ନୁହେଁ ଏହି ଗ୍ରହଗୁଡିକର ବାୟୁମଣ୍ଡଳରେ ଥିବା ଅଣୁ, ପରମାଣୁ ଓ ଅନ୍ୟ କଣିକା ଗୁଡିକୁ ମଧ୍ୟ ଅନୁଧ୍ୟାନ ସହ ସୌରମଣ୍ଡଳର ବିବର୍ତ୍ତନକୁ ବୁଝିବାରେ ମଧ୍ୟ ସାହାଯ୍ୟ କରିପାରେ । ଯାହା ଜୀବନ ସତ୍ତାର ସମ୍ଭାବନାକୁ ସ୍ପଷ୍ଟ କରିବାରେ ସାହାଯ୍ୟ କରିବ ।
ଟେଲିସ୍କୋପ ଦ୍ବାରା ମିଳିଥିବା ଏହି ଫଟୋ ସମ୍ବନ୍ଧରେ ବୁଧବାର ଆଷ୍ଟ୍ରୋଫିଜିକାଲ ଜର୍ଣ୍ଣାଲରେ ଏକ ରିପୋର୍ଟ ପ୍ରକାଶିତ ହୋଇଥିଲା । ଏଥିରେ ପ୍ରକାଶିତ ଫଟୋରେ ସେଠାକାର ସୌରମଣ୍ଡଳ ସହ ଆମର ସୌରମଣ୍ଡଳର ଅନେକ ସାମଞ୍ଜସ୍ୟ ରହିଥିବା ଦେଖାଯାଇଛି । ସେପଟେ ଶିଶୁ ସୂର୍ଯ୍ୟ କୁହାଯାଉଥିବା ତାରକାର ନାମ TYC 8998-760-1 ରହିଥିବା ବେଳେ ଏହା ପ୍ରାୟ 17 ମିଲିୟନ ବର୍ଷ ପୁରୁଣା ବୋଲି ଆକଳନ କରାଯାଇଛି । ଏହି ତାରକାଟି ମୁସ୍କା ନକ୍ଷତ୍ରରେ ରହିଥିବା ଜଣାପଡିଛି । ତେବେ ଆମ ସୂର୍ଯ୍ୟର ବୟସ ପ୍ରାୟ 4.5 ବିଲିୟନ ବର୍ଷ ହୋଇଥିବା କୁହାଯାଇଛି ।
ସେପଟେ ସଦ୍ୟ ଚିହ୍ନଟ ବାଷ୍ପୀୟ ଗ୍ରହଦ୍ବୟ ଶିଶୁ ସୂର୍ଯ୍ୟ ଚାରିପାଖେ ବହୁ ଦୂରରେ ଥାଇ ପରିକ୍ରମା କରୁଥିବା ଦେଖାଯାଇଛି । ଯେବେ କି ଆମ ସୌରମଣ୍ଡଳରେ ସୂର୍ଯ୍ୟଠାରୁ ବୃହସ୍ପତି ଓ ଶନି ଗ୍ରହ ଅପେକ୍ଷାକୃତ ନିକତର ରହିଛନ୍ତି । ଏହା ମଧ୍ୟ କୁହାଯାଉଛି କି ହୁଏତ ଏହି ଗ୍ରହ ଗୁଡିକ ଶିଶୁ ସୂର୍ଯ୍ୟର ନିକଟତର ହେବା ପାଇଁ ଆଉ କିଛି ବର୍ଷ ବା କିଛି ବିବର୍ତ୍ତନର ଆବଶ୍ୟକତା ରହିଛି । ତେବେ ଏହି ଗ୍ରହ ଦ୍ବୟ ଆମ ସୌରମଣ୍ଡଳର ଗ୍ରହ ତୁଳନାରେ ଅଧିକ ଭାରି ଥିବା ମଧ୍ୟ କୁହାଯାଉଛି ।
ଏସମ୍ପର୍କରେ ଅଧିକ ଅଧ୍ୟୟନ ପାଇଁ ଗବେଷକମାନେ ଏକାଧିକ ଫଟୋ ଉତ୍ତୋଳନ କରିଛନ୍ତି । ତେବେ ଏହି ଫଟୋ ଉତ୍ତୋଳନ ସମୟରେ ଟେଲିସ୍କୋପରେ ଥିବା କୋରୋନାଗ୍ରାଫ ନାମକ ଡିସ୍କ ତାରକାର ଆଲୋକକୁ ଅବଚ୍ଛେଦ କରି ଗ୍ରହ ଦ୍ବୟକୁ ଦୃଶ୍ୟମାନ କରାଇବାରେ ସଫଳ ହୋଇଛି । ସେପଟେ ଏହି ଶିଶୁ ସୂର୍ଯ୍ୟ ଚାରିପଟେ ଅନ୍ୟ କୌଣସି ଗ୍ରହ ଥିବା ନେଇ ବର୍ତ୍ତମାନ ସୁଦ୍ଧା କୌଣସି ପ୍ରମାଣ ନଥିବା ବୋନ ସ୍ପଷ୍ଟ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
