ଓଟ୍ଟାୱା: ବର୍ଣ୍ଣବୈଷମ୍ୟକୁ ନେଇ ସାରା ବିଶ୍ବରେ ଜାରି ରହିଛି ତର୍କ ବିତର୍କ । ଏମିତିରେ ନିଜ ବିଭାଗରେ ପ୍ରଣାଳୀଗତ ବର୍ଣ୍ଣ ବୈଷମ୍ୟତା ରହିଥିବାର ବୟାନ ଦେଇଛନ୍ତି ରୟାଲ କାନାଡିଆନ ମାଉଣ୍ଟେଡ ପୋଲିସ (ଆରସିଏମପି) ବିଭାଗର କମିଶନର ବ୍ରେଣ୍ଡା ଲୁକି । ଏହି ବିଷୟକୁ ନେଇ ତାଙ୍କୁ ପଚରା ଯିବାରୁ ସଠିକ୍ ଭାବେ କିଛି କହିନପାରି ଶେଷରେ ତାଙ୍କ ବିଭାଗରେ ପ୍ରଣାଳୀଗତ ଭାବେ ଏହି ବିଭେଦତା ରହିଥିବା ବ୍ରେଣ୍ଡା ପ୍ରକାଶ କରିଥିଲେ ।
ଗଣମାଧ୍ୟମକୁ ଏନେଇ ସୂଚନା ଦେଇ ବ୍ରେଣ୍ଡା କହିଛନ୍ତି କି ଅନ୍ୟଙ୍କ ପରି ତାଙ୍କ ବିଭାଗରେ ମଧ୍ୟ ଏହି ବୈଷମ୍ୟତା ଥିବାକୁ ସେ ସ୍ବୀକାର କରୁଛନ୍ତି । ଅନେକଙ୍କ କହିବା ଅନୁଯାୟୀ ସେ ଏହି କଥାକୁ ବିଶ୍ବାସ କରନ୍ତି କି ସମସ୍ତ ଅନୁଷ୍ଠାନର ଏହା ଏକ ଅଂଶ । ଏହି କ୍ରମରେ ଇତିହାସଠାରୁ ନେଇ ଆଜି ପର୍ଯ୍ୟନ୍ତ ସମସ୍ତଙ୍କୁ ସବୁ ସ୍ଥାନରେ ସମାନ ଅବସର ମିଳୁନଥିବା ମଧ୍ୟ କାହାକୁ ଅଛପା ନୁହେଁ । କିନ୍ତୁ ବିଭାଗର ଜଣେ ବରିଷ୍ଠ ଅଧିକାରୀ ଭାବେ ଏହା ତାଙ୍କ ଦାୟିତ୍ବ ରହିଛି କି ବିଭାଗକୁ ବୈଷମ୍ୟତା ଓ ଭେଦଭାବ ମୁକ୍ତ କରିବା ।
ଆମେରିକାରେ ଆରମ୍ଭ ହୋଇଥିବା ବର୍ଣ୍ଣବୈଷମ୍ୟତା ବିରୋଧୀ ବିକ୍ଷୋଭକୁ ନେଇ ଗତ କିଛି ସପ୍ତାହ ହେବ ଆରସିଏମପି ଅନେକ ପ୍ରଶ୍ନର ସମ୍ମୁଖୀନ ହେଉଥିବା ବ୍ରେଣ୍ଡା ପ୍ରକାଶ କରିଛନ୍ତି । କିନ୍ତୁ ଏ ପ୍ରସଙ୍ଗରେ କୌଣସି ଉତ୍ତର ରଖିବା ପୂର୍ବରୁ ଏହି ଦିଗରେ ଉନ୍ନତିମୂଳକ କାର୍ଯ୍ୟ କରିବାର ଆବଶ୍ୟକତା ରହିଛି ବୋଲି ସେ ମତ ଦେଇ ପ୍ରଶ୍ନକୁ ଏଡାଇଛନ୍ତି ।
@IANS
