ୱାଶିଂଟନ: ଏଣିକି ଇସ୍ରାଏଲ ଓ ବାହାରିନ ମଧ୍ୟରେ ସ୍ଥାପନ ହେବ କୂଟନୈତିକ ସମ୍ପର୍କ । ଏନେଇ ଶୁକ୍ରବାର ମିଳିତ ଭାବେ ପ୍ରକାଶ କରିଛନ୍ତି ଆମେରିକା, ଇସ୍ରାଏଲ ଓ ବାହାରିନ । ଏହାକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜ ଟ୍ବିଟର ହ୍ୟାଣ୍ଡେଲରେ ପ୍ରକାଶ କରି କହିଥିଲେ କି ଶୁକ୍ରବାର ସକାଳେ ଆମେରିକା, ଇସ୍ରାଏଲ ଓ ବାହାରିନର ମୁଖ୍ୟ ଏନେଇ ଟେଲିଫୋନ ଯୋଗେ ଆଲୋଚନା କରିଥିଲେ । ଆଲୋଚନା ପରେ ସଭିଙ୍କ ସହମତିରେ ଇସ୍ରାଏଲ ଓ ବାହାରିନ ମଧ୍ୟରେ କୂଟନୈତିକ ସମ୍ପର୍କ ସ୍ଥାପନ ନେଇ ସ୍ଥିରୀକୃତ ହୋଇଛି ।
ଟ୍ରମ୍ପ ଏହା ମଧ୍ୟ କହିଛନ୍ତି କି ଉଭୟଙ୍କ ମଧ୍ୟରେ ସମ୍ପର୍କ ସ୍ଥାପନ ହେଲେ ଏହା ନା ଯେ କେବଳ ଉଭୟ ରାଷ୍ଟ୍ରଙ୍କ ବିକାଶରେ ସହାୟକ ହେବ ବରଂ ଏହା ସମଗ୍ର ମଧ୍ୟପୂର୍ବ ମହାଦେଶ ପାଇଁ ମଧ୍ୟ ସହାୟକ ହେବ । ଏହା ଦ୍ବାରା ମଧ୍ୟପୂର୍ବ ମହାଦେଶର ବିକାଶରେ ସ୍ଥିରତା, ସୁରକ୍ଷା ଓ ସମୃଦ୍ଧି ଆଦି ଅଧିକ ପ୍ରଗତିଶୀଳ ହେବ । ତେବେ ଗତ ମାସ ଅର୍ଥାତ୍ ଅଗଷ୍ଟ 13ରେ ସମାନ ଭାବେ ଇସ୍ରାଏଲ ଓ ୟୁଏଇ ମଧ୍ୟରେ ସମ୍ପର୍କ ସ୍ଥାପନ ପାଇଁ ଚୁକ୍ତି ସ୍ବାକ୍ଷରିତ ହୋଇସାରିଥିବା ଟ୍ରମ୍ପ ସୂଚନା ଦେଇଛନ୍ତି । ଏଥିସହ ଚତୁର୍ଥ ଆରବ ରାଷ୍ଟ୍ର ଭାବେ ଇଜିପ୍ଟ, ଜୋର୍ଡାନ ଓ ୟୁଏଇ ପରେ ବାହାରିନ ଇସ୍ରାଏଲ ସହ କୂଟନୈତିକ ସମ୍ପର୍କ ସ୍ଥାପନ ପାଇଁ ଗୋଟିଏ ପାଦ ଆଗକୁ ବଢାଇଛି ।
