ସମ୍ବଲପୁର: ପାଣି ପାଇଁ ତାତିଲେ ଲୋକେ । ରାସ୍ତାରେ ବସିଲେ ଶତାଧିକ ପୁରୁଷଙ୍କ ସହ ମହିଳା । ପିଇବା ପାଣି ନ ମିଳିବାରୁ ସମ୍ବଲପୁର ମହାନଗର ରାମଜୀ ମନ୍ଦିର ପଡା ଲୋକେ ଆଜି(ରବିବାର) ରାସ୍ତାରୋକ କରିଛନ୍ତି ।
ସମ୍ବଲପୁର ମହାନଗରରେ ଥିବା ରାମଜୀ ମନ୍ଦିରପଡା ଅଞ୍ଚଳରେ ଦେଖାଦେଇଛି ଉତ୍କଟ ପାନୀୟ ଜଳ ସମସ୍ୟା । ଦୀର୍ଘ ଦିନ ଧରି ପାନୀୟ ଜଳ ଯୋଗାଣ ସମସ୍ୟା ଯୋଗୁଁ ଲୋକେ ନାହିଁ ନ ଥିବା ସମସ୍ୟାର ସମ୍ମୁଖିନ ହେଉଛନ୍ତି । ଏନେଇ ଆଜି ରାସ୍ତା ଅବରୋଧ କରିଥିଲେ ସ୍ଥାନୀୟ ଅଞ୍ଚଳର ଶତାଧିକ ମହିଳା ଓ ପୁରୁଷ । ସମ୍ବଲପୁର ରିଙ୍ଗ ରୋଡ ଅବରୋଧ କରି ରାସ୍ତା ରୋକ କରି ଆନ୍ଦୋଳନ କରିଛନ୍ତି ।
ପିଏଚଡି ପାଇପ ସଂଯୋଗ ଥିଲେ ମଧ୍ୟ ଦୀର୍ଘ ୩ ମାସ ହେବ ପଡାକୁ ପିଇବା ପାଣି ଯୋଗାଣ ବନ୍ଦ ରହିଥିବା ଅଭିଯୋଗ ହୋଇଛି । ଆଉ ବର୍ତ୍ତମାନ ସମ୍ବଲପୁରରେ ତାପମାତ୍ରା 40 ଡିଗ୍ରୀ ଉପରେ ରହୁଥିବା ବେଳେ ସ୍ଥାନୀୟ ପଡାବାସୀ ପିଇବା ପାଣି ପାଇଁ ହଇରାଣ ହେଉଛନ୍ତି । ଏହି ସମସ୍ୟା ନେଇ ବାରମ୍ବାର ଜନସ୍ବାସ୍ଥ୍ୟ ବିଭାଗର ଦ୍ବାରସ୍ତ ହୋଇ ମଧ୍ୟ ନିରାଶ ହୋଇ ସ୍ଥାନୀୟ ଲୋକ ଆଜି ଏହି ପଦକ୍ଷେପ ନେଇଥିବା କହିଛନ୍ତି । ଜନସ୍ବାସ୍ଥ୍ୟ ବିଭାଗର ଅଧିକାରୀ ଆନ୍ଦୋଳନସ୍ଥଳକୁ ନ ଆସିବା ଯାଏ ଆନ୍ଦୋଳନ ଜାରି ରହିବ ବୋଲି ପଡାବାସୀ କହିଛନ୍ତି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
