ପୁରୀ: ମହାପ୍ରଭୁ ଶ୍ରୀଜଗନ୍ନାଥ ଆଜି ବଡ ଭାଇ ଶ୍ରୀବଳଭଦ୍ର, ଭଉଣୀ ଦେବୀ ସୁଭଦ୍ରାଙ୍କ ସହ ଆଡପ ମଣ୍ଡପ ବିଜେ କରିଛନ୍ତି । ଦଇତାପତି ସେବକମାନେ ଗୋଟି ପହଣ୍ଡିରେ ଚତୁର୍ଦ୍ଧାମୂର୍ତ୍ତିକୁ ଆଡପ ମଣ୍ଡପ ବିଜେ କରାଇଛନ୍ତି ।
ତେବେ ମହାପ୍ରଭୁଙ୍କ ଦର୍ଶନ ପାଇଁ ଆଜି(ଶୁକ୍ରବାର) ଶରଧା ବାଲିରେ ହଜାର ହଜାର ଶ୍ରଦ୍ଧାଳୁ ଏକାଠି ହୋଇଥିଲେ । ଶାନ୍ତି ଶୃଙ୍ଖଳା ପାଇଁ ପୋଲିସ ପକ୍ଷରୁ କଡା ନିରାପତ୍ତା ବ୍ୟବସ୍ଥା ଗ୍ରହଣ କରାଯାଇଥିଲା । ଆଜି(ଶୁକ୍ରବାର) ସନ୍ଧ୍ୟା ଧୂପ ପରେ ଆଡପ ମଣ୍ଡପ ବିଜେ ନୀତି ଆରମ୍ଭ ହୋଇଥିଲା ।
ଘଣ୍ଟ, ମୃଦଙ୍ଗ, ଜୟ ଜଗନ୍ନାଥ ଧ୍ୱନୀରେ ଶରଧା ବାଲି ପ୍ରକମ୍ପିତ ହୋଇଥିଲା । ମହାପ୍ରଭୁଙ୍କ ଦର୍ଶନ ପାଇବା ପରେ ଶ୍ରଦ୍ଧାଳୁ ମାନେ ନିଜକୁ ଧନ୍ୟ ମଣିଥିଲେ । ସନ୍ଧ୍ୟା 7 ଟାରୁ ଗୋଟି ପହଣ୍ଡି ହୋଇ ରାତି 9 ଟାରେ ଶେଷ ହୋଇଥିଲା ।
ତେବେ ଆସନ୍ତାକାଲି ଆଡପ ମଣ୍ଡପରେ ସକାଳୁ ମହାପ୍ରଭୁଙ୍କ ନୀତିକାନ୍ତି ବଢିବା ପରେ ପ୍ରଥମ ଅବଢା ତଥା ଆଡପ ଅବଢା ବାହାରିବ । ଯାହାକୁକି ଭକ୍ତମାନେ ଉତ୍କଣ୍ଠାର ସହ ଚାହିଁ ବସିଛନ୍ତି । ସେହିପରି ଭକ୍ତଙ୍କ ପାଇଁ ସକାଳୁ ଦର୍ଶନ ବ୍ୟବସ୍ଥା ରହିଛି । ବିଶ୍ଵାସ ରହିଛି ଆଡପ ମଣ୍ଡପରେ ମହାପ୍ରଭୁଙ୍କୁ ଦର୍ଶନ କଲେ କୋଟି ପୁଣ୍ୟ ମିଳିଥାଏ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
