ପୁରୀ: ରଥ ନିର୍ମାଣ ନେଇ ରଥଖଳା ଓ କମାରଶାଳ ଚଳଚଞ୍ଚଳ । ମହାପ୍ରଭୁଙ୍କ ଘୋଷଯାତ୍ରା ନିମନ୍ତେ ତିନିରଥ କାର୍ଯ୍ୟ ଜୋରସୋର ନିର୍ମାଣ ଚାଲିଛି । ରଥଖଳାରେ ତିନିରଥର ଚକ ନିମନ୍ତେ ତୁମ୍ଭ କାର୍ଯ୍ୟ ଶେଷ ପର୍ଯ୍ୟାୟରେ । ସେହିପରି ରୂପକାର ସେବାୟତମାନେ ଗୁଜ କାର୍ଯ୍ୟ କରୁଛନ୍ତି । ଅନ୍ୟପଟେ ଦୋଳବେଦୀ କୋଣରେ ଥିବା କମାରଶାଳ ବି ଚଳଚଞ୍ଚଳ । କମାର ସେବକମାନେ ରଥ ନିର୍ମାଣ ପାଇଁ ଆବଶ୍ୟକ କଣ୍ଟା ଓ ଲୁହା ସାମଗ୍ରୀ ପ୍ରସ୍ତୁତି କରି ଯୋଗାଇ ଦେଉଛନ୍ତି ।
ରଥ ନିର୍ମାଣରେ ବିଶ୍ବକର୍ମା ମହାରଣାଙ୍କ ଯେତିକି ଭୂମିକା କମାର ସେବକଙ୍କ ଭୂମିକା ମଧ୍ୟ ବେଶ ଗୁରୁତ୍ବପୂର୍ଣ୍ଣ । ତିନିରଥ ପାଇଁ ଅରକଣ୍ଟା ସମେତ ବାଡ଼ିଆ କଣ୍ଟା, ବଳା, ଜଂଘା, ନାରାଦ ଆଦି ପାଖାପାଖି 120 ପ୍ରକାର କଣ୍ଟା ତିନି ରଥ ପାଇଁ ତିଆରି କରିଥାନ୍ତି ଏହି କମାର ସେବକମାନେ । ତେବେ ମହାପ୍ରଭୁଙ୍କ କାର୍ଯ୍ୟ ଲାଗିବା ବେଶ ଭାଗ୍ୟର କଥା ବୋଲି କୁହନ୍ତି ଏହି କମାର ସେବକମାନେ ।
ଅନ୍ୟପଟେ ଆଜି କୋଭିଡ ଗାଇଡ଼ଲାଇନ ଅନୁଯାୟୀ ରଥନିର୍ମାଣରେ ଲାଗିଥିବା ସମସ୍ତ ବିଶ୍ବକର୍ମା ମହାରଣା, କରତି ସେବକ, ରୂପକାର ସେବକ, ଭୋଇ ସେବକ ଓ କମାର ସେବକଙ୍କ ସ୍କ୍ରିନିଂ ରଥଖଳାରେ ସ୍ବତନ୍ତ୍ର ମେଡ଼ିକାଲ ଟିମ ଦ୍ବାରା କରାଯାଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
