ପୁରୀ: ଆଜି ପବିତ୍ର କାର୍ତ୍ତିକ ପୂର୍ଣ୍ଣିମା ଓ ବୋଇତ ବନ୍ଦାଣ ଉତ୍ସବ। ଏନେଇ ପାହାନ୍ତିଆରୁ ବିଭିନ୍ନ ପୁଷ୍କରିଣୀ, ନଦୀ ଓ ସମୁଦ୍ରରେ ଡଙ୍ଗା ଭସାଇବା ପାଇଁ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁଙ୍କ ସମାଗମ ହୋଇଛି । ଶ୍ରଦ୍ଧାଳୁମାନେ ବୁଡ଼ ପକାଇବା ସହ କଦଳୀ ପାଟୁଆ ଓ ସୋଲ ଡଙ୍ଗା ଭସାଇଛନ୍ତି।
ଏହି ପବିତ୍ର ଦିନରେ ଡଙ୍ଗା ଭସାଇ ନୌବାଣିଜ୍ୟକୁ ମନେ ପକାଇଛନ୍ତି ଲୋକେ। ଅତୀତରେ ଓଡିଶାର ସାଧବ ପୁଅ ମାନେ ବିଭିନ୍ନ ବ୍ୟବସାୟ କରିବା ନେଇ ଜାଭା , ସୁମାତ୍ରା ଆଦି ଯାଉଥିଲେ। ଏହି ସମୟରେ ସେମାନେ ଯାତ୍ରା ଆରମ୍ଭ କରୁଥିଲେ। ଏଣୁ କାର୍ତ୍ତିକ ପୂର୍ଣ୍ଣିମାରେ ସେହି ସ୍ମୃତିକୁ ଉଜ୍ଜିବିତ କରିବା ପାଇଁ ଏହି ଡଙ୍ଗା ଭସା ପରମ୍ପରା ରହିଛି।
ଖାଲି ସେତିକି ନୁହେଁ, ଏହାର ମଧ୍ୟ ଆଧ୍ୟାତ୍ମିକ ଦିଗ ରହିଛି। ମାସ ସାରା କାର୍ତ୍ତିକ ବ୍ରତ ପାଳନ କରି ମାସ ଶେଷ ଦିନରେ ଡଙ୍ଗା ଭସାଯାଏ । ଏ ଡଙ୍ଗା ହେଉଛି ଧର୍ମ ଡଙ୍ଗା। ସେଥିପାଇଁ ଡଙ୍ଗା ଭସାଇବା ବେଳେ ଆମେ କହିଥାଉ ଆ କା ମା ଵୈ ପାନ ଗୁଆ ଥୋଇ ପାନ ଗୁଆ ତୋହର, ମାସକ ଧର୍ମ ମୋହର।
ଅର୍ଥାତ କାର୍ତ୍ତିକ ମାସରେ ଆମେ ଯେଉଁ ପୁଣ୍ୟ ଅର୍ଜନ କଲୁ ଆଜି ସେହି ପୁଣ୍ୟକୁ ନୌକା ଆଧାରରେ ବିସର୍ଜିତ କରୁଛୁ। ହେ କାର୍ତ୍ତିକ ମାସ ଆସିଥିଲ,ଆମକୁ ଧର୍ମ ପ୍ରଦାନ କଲ ଏବଂ ଆମେ ଧର୍ମ ଅର୍ଜନ କଲୁ। ଆଜି କାର୍ତ୍ତକ ମାସକୁ ଆମେ ବିଦାୟ ଦେଉଛୁ। ବିଦାୟ ବେଳରେ ପାନ ଗୁଆ ଥୋଇ କି ଆପଣଙ୍କ ବିଦାୟ ଦେଉଛୁ। ଏବଂ ହେ କାର୍ତ୍ତିକ ମାସ ଆମକୁ ପୁଣ୍ୟ ଦେଇ ଯାଆନ୍ତୁ। ଏଣୁ ଧର୍ମ ଟିକେ ପାଇବା ପାଇଁ କାର୍ତ୍ତିକ ମାସ ପାଖରେ ପ୍ରାର୍ଥନା କରାଯାଇ ଥାଏ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
