କଟକ: ପୋଲିସ ହ୍ୟାଣ୍ଡକପରେ ପେଷାଦାର ଗୁଣ୍ଡା ଲୋକେନ୍ ଗୁରୁ । ଡକାୟତି ଉଦ୍ୟମ ବେଳେ ଧରିଲା ପୋଲିସ। ଏହାସହ ତାର ଦୁଇ ଜଣ ସାଥିଙ୍କୁ ମଧ୍ୟ ଗିରଫ କରି କୋର୍ଟ ଚାଲାଣ କରିଛି କମିଶନରେଟ ପୋଲିସ ।
ସୂଚନା ଥାଉକି, କଟକର ଜଣେ ପେଷାଦାର ଅପରାଧି ଲୋକେନ ଗୁରୁ ଏବଂ ଅନ୍ୟ ଦୁଇଜଣ ସାଥି ବାରବୋଡିଆ ଲକ୍ ନିକଟରେ ଥିବା କେନାଲ ବନ୍ଧରେ ଏକତ୍ରିତ ହୋଇ ଲୋକଙ୍କ ଠାରୁ ଲୁଟ କରିବା ପାଇଁ ଯୋଜନା କରୁଥିବା ଜଗତପୁର ଥାନା ବିଶେଷ ସୁତ୍ରରୁ ଖବର ପାଇଥିଲା ।
ଖବର ଆଧାରରେ ଥାନାର ଏକ ଟିମ୍ ତଥ୍ୟର ସତ୍ୟତା ଯାଞ୍ଚ କରିବାକୁ ପହଞ୍ଚିଥିଲେ । ବାରବୋଡିଆ ଲକ୍ ଠାରୁ ଅଳ୍ପ ଦୂରରେ କେନ୍ଦ୍ରାପଡା କେନାଲର ବନ୍ଧରେ ତିନିଜଣ ବ୍ୟକ୍ତି ଠିଆ ହୋଇଥିବା ଟିମ୍ ଦେଖିବାକୁ ପାଇଥିଲେ । ତେବେ ପୋଲିସକୁ ଦେଖି ସେମାନେ ଖସିଯିବାକୁ ଉଦ୍ୟମ କରି ବିଫଳ ହୋଇଥଲେ ।
ଏହାପରେ ସେମାନଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ଗୋଟିଏ ବନ୍ଧୁକ, ଦୁଇଟି ମ୍ୟାଗଜିନ୍ ଓ ୪ଟି ଜୀବନ୍ତ ଗୁଳି ମଧ୍ୟ ଜବତ କରାଯାଇଛି। ପୋଲିସ ପକ୍ଷରୁ ଏମାନଙ୍କୁ ଗିରଫ କରିବା ପରେ କୋର୍ଟ ଚାଲାଣ କରାଯାଇଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
