କଟକ: ରାଜ୍ୟ ଉଚ୍ଚ ନ୍ୟାୟାଳୟରେ ରୁଜୁ ହୋଇଛି ଏକ ଜନସ୍ବାର୍ଥ ମାମଲା । ଗଜପତି ଜିଲ୍ଲା ମହିଳା ସାବିତ୍ରୀ ବାଇ ଫୁଲେ ସ୍ବୟଂ ସହାୟିକା ଗୋଷ୍ଠୀ ଏହି ଜନସ୍ବାର୍ଥ ମାମଲା ରୁଜୁ କରିଛି । ମାଇକ୍ରୋ ଫାଇନାନ୍ସ କମ୍ପାନୀ ଋଣ ଯୋଗାଇ ଦେବାକୁ କହି ସେଥିରେ ହେରଫେର୍ କରିଥିବା ଅଭିଯୋଗରେ ଜନସ୍ବାର୍ଥ ମାମଲା ରୁଜୁ ହୋଇଛି ।
ସୂଚନା ଅମୁଯାୟୀ ଗଜପତି ଜିଲ୍ଲା ମୋହନା ଅଞ୍ଚଳର ସାବିତ୍ରୀ ବାଇ ଫୁଲେ ସ୍ବୟଂ ସହାୟିକା ଗୋଷ୍ଠୀର ଆଦିବାସୀ ମହିଳାମାନଙ୍କୁ ଋଣ ଯୋଗାଇ ଦେବାକୁ କହି ମାଇକ୍ରୋ ଫାଇନାନ୍ସ କମ୍ପାନୀ ଲୁଟି ଚାଲିଥିବା ଅଭିଯୋଗ ଆସିଛି । ସ୍ୱୟଂ ସହାୟିକା ଗୋଷ୍ଠୀଙ୍କୁ ଅଳ୍ପ ସୁଧରେ ଋଣ ପ୍ରଦାନ କରିବାର ଲୋଭ ଦେଖାଇ ଏହି କମ୍ପାନୀଗୁଡିକ କୋରୋନା ମହାମାରୀ ସମୟରେ ଜୋର ଜବରଦସ୍ତ ସୁଧ ଆଦାୟ କରୁଛନ୍ତି । ଏନେଇ ପୋଲିସ ଓ ଜିଲ୍ଲା ପ୍ରଶାସନ ନିକଟରେ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିନାହିଁ ।
ତେଣୁ ଏଭଳି ମାଇକ୍ରୋଫାଇନାନ୍ସ କମ୍ପାନୀ ବ୍ୟବସାୟ ଉପରେ ସମ୍ପୂର୍ଣ୍ଣ ରୋକ ଲଗାଇବାକୁ ହାଇକୋର୍ଟରେ ଆବେଦନ କରିଛନ୍ତି ଏଚଏସଜି ଗ୍ରୁପର ମହିଳାମାନେ । ଏଥିସହ ସ୍ୱୟଂ ସହାୟକ ଗୋଷ୍ଠୀକୁ କୌଣସି ଜାତୀୟକରଣ ବ୍ୟାଙ୍କ କିମ୍ବା ସରକାରଙ୍କ ମିଶନ ଶକ୍ତି ଜରିଆରେ ସ୍ୱଳ୍ପ ସୁଧରେ ଋଣ ଯୋଗାଇ ଦେବାକୁ ନିବେଦନ କରାଯାଇଛି। ତେବେ ମାମଲାରେ ରାଜ୍ୟ ସରକାର, ଗଜପତି ଜିଲ୍ଲାପାଳ, ସମ୍ପୃକ୍ତ ମାଇକ୍ରୋଫାଇନାନ୍ସ କମ୍ପାନୀକୁ ପକ୍ଷଭୁକ୍ତ କରାଯାଇଛି ।
କଟକରୁ ନାରାୟଣ ସାହୁ, ଇଟିଭି ଭାରତ
