ଭୁବନେଶ୍ବର: ବରିଷ୍ଠ ନାଗରିକଙ୍କୁ ପୋଲିସ କରୁଛି ହଇରାଣ । ଏକଥା ଆମେ କହୁନୁ ୫ କି.ମି ଅତିକ୍ରାନ୍ତ କରି ପୋଲିସ ସେବା ଭବନକୁ ଆସିଥିବା ୬୯ ବର୍ଷିୟ ଜଣେ ବ୍ୟକ୍ତି କରିଛନ୍ତି ଅଭିଯୋଗ, ଯିଏ କି ସିପିଙ୍କୁ ଦେଖା କରିବାକୁ ସାଇକେଲ ଧାଇଁ ଆସିଛନ୍ତି ।
ଲକଡାଉନ ଯୋଗୁଁ ବାଟରେ ଅଟକାଇଥିଲେ ମଧ୍ୟ ଡାକ୍ତରଖାନା ବାହାନାରେ ଆସିଥିଲେ ଲକ୍ଷ୍ମୀସାଗର ଷ୍ଟେଜ ୨ ରେ ରହୁଥିବା କୃଷ୍ଣଚନ୍ଦ୍ର ମହାପାତ୍ର । ତାଙ୍କ ଅଭିଯୋଗ ଅନୁସାରେ ତାଙ୍କ ପୁଅ ଦୟାନିଧି ମହାପାତ୍ରକୁ ସେହି ଅଞ୍ଚଳର ବାପି ନାମକ ଯୁବକ ମରଣାନ୍ତକ ଆକ୍ରମଣ କରି ଲୁହଲୁହାଣ କରିଥିଲା । ଯାହାକୁ ନେଇ ଥାନାରେ ଏତଲା ଦେଇଥିଲେ । ହେଲେ ଲକ୍ଷ୍ମୀସାଗର ଥାନା ପୋଲିସ ଅଭିଯୁକ୍ତକୁ ଗିରଫ କରିବା ପରିବର୍ତ୍ତେ ଏକ କାଉଣ୍ଟର କେସରେ ଓଲଟ ତାଙ୍କୁ ଥାନାକୁ ଆସିବାକୁ ବାଧ୍ୟ କରୁଛନ୍ତି ।
ଏପରିକି ପୁଅ ବେଡ଼ରୁ ଉଠିପାରୁନଥିବା ବେଳେ, ପତ୍ନୀ ପୁଅର ଏପରି ସ୍ଥିତି ଦେଖି ବିଚଳିତ ହୋଇ ତାଙ୍କ ବିପି ବଢିଯାଇଛି । ଯାହାକୁ ନେଇ ବୃଦ୍ଧ ଜଣକ ପୋଲିସର ଏପରି ଅତ୍ୟାଚାର ବିରୋଧରେ ଜଣାଇବାକୁ ବରିଷ୍ଠ ନାଗରିକ ପୋଲିସର ସହାୟତା ଖବର ଶୁଣିବା ପରେ ଏଫଆଇଆର କପି ସହ ମେଡ଼ିକାଲ ପ୍ରମାଣପତ୍ର ନେଇ ପୋଲିସ ସେବା ଭବନକୁ ୫ କି.ମି ଅତିକ୍ରାନ୍ତ କରି ଦଉଡି ଆସିଛନ୍ତି ।ତେବେ ଏନେଇ ବୃଦ୍ଧଙ୍କୁ କିପରି ନ୍ୟାୟ ଦେଉଛି ପୋଲିସ ତାହା ଦେଖିବାକୁ ବାକି ରହିଲା ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
