ଭୁବନେଶ୍ବର: ଛାତ୍ରୀଙ୍କ ଆନ୍ଦୋଳନ ପରେ ଘୁଞ୍ଚିଲା ପରୀକ୍ଷା ତାରିଖ । ରମାଦେବୀ ବିଶ୍ବବିଦ୍ୟାଳୟର ଛାତ୍ରଛାତ୍ରୀଙ୍କ ଆନ୍ଦୋଳନ ପରେ ନରମିଛନ୍ତି ସରକାର । ଛାତ୍ରୀମାନଙ୍କ ଆନ୍ଦୋଳନ ପରେ ଷଷ୍ଠ ସେମିଷ୍ଟାର ପରୀକ୍ଷା ଦୁଇ ସପ୍ତାହ ପର୍ଯ୍ୟନ୍ତ ଘୁଞ୍ଚିଥିବା ଜଣାପଡିଛି । କୋରୋନା ଗାଇଡ଼ଲାଇନ ମଧ୍ୟରେ ରାଜ୍ୟ ସରକାରଙ୍କ ପକ୍ଷରୁ ପରୀକ୍ଷା ହେବାକୁ ଘୋଷଣା କରାଯାଇଥିଲା । କିନ୍ତୁ ସୋମବାର ରମାଦେବୀ ବିଶ୍ବବିଦ୍ୟାଳୟର ଛାତ୍ରୀମାନେ ଏହି ନିଷ୍ପତ୍ତିକୁ ବିରୋଧ କରି ପରୀକ୍ଷାକୁ ବାତିଲ କରିବା ପାଇଁ ଧାରଣାରେ ବସିଥିଲେ ।
କୋରୋନା ମହାମାରୀ ସମୟରେ ସ୍ବାସ୍ଥ୍ୟଗତ ସୁରକ୍ଷା ଏକ ବଡ ପ୍ରଶ୍ନ ବୋଲି ଧାରଣାରେ ବସିଥିବା ଛାତ୍ରୀମାନେ ଅଭିଯୋଗ କରିଥିଲେ । ସେପଟେ ଦୃଷ୍ଟିବାଧିତ ଛାତ୍ରୀମାନଙ୍କୁ ଗାଇଡ଼ କିପରି ସହାୟତା କରିବେ, ସେଠାରେ ସମାଜିକ ସୁରକ୍ଷା ଏକ ବଡ ପ୍ରଶ୍ନ ଓ ଘରୋଇ ହଷ୍ଟେଲର ଛାତ୍ରୀ କିପରି ରହିବେ ବୋଲି ବିଭିନ୍ନ ପ୍ରଶ୍ନ ଛାତ୍ରୀମାନେ ସରକାରଙ୍କୁ କରିଥିଲେ । ତେଣୁ କୋରୋନା ମହାମାରୀ ସମୟରେ ପରୀକ୍ଷା ନକରି ସାନି ପରୀକ୍ଷା ତାରିଖ ଧାର୍ଯ୍ୟ କରିବାକୁ ଦାବି କରୁଥିବା ଛାତ୍ରୀମାନେ ପ୍ରକାଶ କରିଥିଲେ ।
ଏନେଇ ସୋମବାର ଧାରଣାରେ ବସିଥିବା ଛାତ୍ରୀମାନେ ରମାଦେବୀ ବିଶ୍ଵବିଦ୍ୟାଳୟ କର୍ତ୍ତୃପକ୍ଷଙ୍କୁ ଏକ ଦାବିପତ୍ର ପ୍ରଦାନ କରିଥିଲେ । ଦାବିପତ୍ର ପାଇବା ପରେ ବିଶ୍ବବିଦ୍ୟାଳୟ କର୍ତ୍ତୃପକ୍ଷ ଦାବିଗୁଡିକ ବିଚାର କରିବା ପରେ ପରୀକ୍ଷା ଘୁଞ୍ଚାଇ ଦିଆଯାଇଛି । ସନ୍ଧ୍ୟାରେ ଏନେଇ ରମାଦେବୀ ବିଶ୍ବବିଦ୍ୟାଳୟ ପକ୍ଷରୁ ନିଷ୍ପତ୍ତି ନିଆଯାଇଥିଲା ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
