ଭୁବନେଶ୍ବର: ସବୁ କଳ୍ପନା ଜଳ୍ପନାର ଅନ୍ତ ଘଟି ଓଡିଶା ବିଜେପିର ନେତୃତ୍ବ ନେବାରେ ସଫଳ ହୋଇଛନ୍ତି ଉପକୂଳ ନେତା। ବସନ୍ତ ପଣ୍ଡାଙ୍କ ପରେ ସମୀର ମହାନ୍ତି ହେଲେ ବିଜେପିର ନୂଆ ରାଜ୍ୟ ସଭାପତି। ଦଳ ପକ୍ଷରୁ ଆଜି ରାଜ୍ୟ ସଭାପତି ପଦ ପାଇଁ ଆରମ୍ଭ ହୋଇଥିଲା ନିର୍ବାଚନ ପ୍ରକ୍ରିୟା। ଅପରାହ୍ନ 3ଟାରେ ନାମାଙ୍କନ ପତ୍ର ଦାଖଲ ହୋଇଥିଲା ବେଳେ ଦଳର ଏକମାତ୍ର ପ୍ରାର୍ଥୀ ଭାବେ ନାମାଙ୍କନ ଭରିଥିଲେ ସମୀର।
ପରେ ନୂଆ ସଭାପତି ଭାବେ ସମୀରଙ୍କ ନାମ ଘୋଷଣା ହୋଇଥିଲା ଏହାକୁ ସ୍ବାଗତ କରିଛନ୍ତି ଦଳୀୟ ନେତୃବୃନ୍ଦ। ଆସନ୍ତାକାଲି ବିଧିବଦ୍ଧ ଭାବରେ ନୂତନ ସଭାପତି ଦାୟିତ୍ବ ଗ୍ରହଣ କରିବେ । ସମୀରଙ୍କୁ ଦିନ 10ଟାରେ ଦାୟିତ୍ବ ହସ୍ତାନ୍ତର କରାଯିବ ପରେ ଦଳୀୟ କାର୍ଯ୍ୟାଳୟରେ ତାଙ୍କୁ ସମ୍ଭର୍ଦ୍ଧନା ଦିଆଯିବ ବୋଲି ସୂଚନା ଦେଇଛନ୍ତି ପର୍ଯ୍ୟବେକ୍ଷକ ନରେନ୍ଦ୍ର ସିଂହ ତୋମାର ।
ବିଦାୟୀ ସଭାପତି ବସନ୍ତ ପଣ୍ଡା କହିଛନ୍ତି ସମୀରଙ୍କ ନେତୃତ୍ବରେ ଦଳ ଅଧିକ ସଂଗଠିତ ହେବ। ପୂର୍ବତନ ସଭାପତି ମନମୋହନ ସାମଲ କହିଛନ୍ତି ଯିଏ ବି ସଭାପତି ହୁଅନ୍ତୁ ଦଳକୁ ଆଗକୁ ନେବା ହେବ ପ୍ରଥମ ଦାୟିତ୍ବ। ସେହିପରି ପୋଡା ଟ୍ରାନ୍ସଫରମର ସରକାରକୁ ଓପାଡି ଫୋପାଡ଼ି ଦେବା ହେବ ନୂଆ ସଭାପତିଙ୍କ ପ୍ରାଥମିକତା ହେବ ବୋଲି କହିଛନ୍ତି ଦଳର ବରିଷ୍ଠ ନେତା ଜୟ ନାରାୟଣ ମିଶ୍ର କହିଛନ୍ତି ।
ସେହିପରି ସଭାପତି ରେସରେ ଥିବା ପୃଥ୍ବୀରାଜ ହରିଚନ୍ଦନ ଓ ଦଳର ଅନ୍ୟ ନେତୃତ୍ବ ସମୀର ମହାନ୍ତିଙ୍କ ନେତୃତ୍ବ ଦଳକୁ ଆଗେଇ ନେବ ବୋଲି କହିଛନ୍ତି । ଦଳୀୟ ନିର୍ବାଚନ ଲାଗି ଛଅ ସେଟ ନାମାଙ୍କନ ହୋଇଥିଲା ବେଳେ ସମୀର ମହାନ୍ତିଙ୍କ ନାମ ପ୍ରଥମ ସେଟରେ ରହିଥିଲା । ସେପଟେ ଅନ୍ୟ କୌଣସି ନେତା ପ୍ରାର୍ଥୀ ପତ୍ର ଭରି ନଥିବାରୁ ନିର୍ଦ୍ବନ୍ଦରେ ନୂଆ ସଭାପତିଙ୍କ ନିର୍ବାଚିତ ହୋଇଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
