ଭୁବନେଶ୍ବର: ବଢିଲା ଯୁକ୍ତ ତିନି ପ୍ରଥମ ପର୍ଯ୍ୟାୟ ନାମଲେଖା ପ୍ରକ୍ରିୟା ଅବଧି । ରାଜ୍ୟରେ ଲଗାଣ ବର୍ଷା ଯୋଗୁଁ ନାମଲେଖା ସମୟ ଆହୁରି ଦୁଇ ଦିନ ବୃଦ୍ଧି ହୋଇଛି । ପୂର୍ବରୁ 13 ତାରିଖରୁ 16 ତାରିଖ ପର୍ଯ୍ୟନ୍ତ ପ୍ରଥମ ପର୍ଯ୍ୟାୟ ନାମଲେଖା ନେଇ ଘୋଷଣା ହୋଇଥିଲା । ବର୍ତ୍ତମାନ ଏହାକୁ ଘୁଞ୍ଚାଯାଇ 18 ତାରିଖ ପର୍ଯ୍ୟନ୍ତ କରାଯାଇଛି । ଉଚ୍ଚଶିକ୍ଷା ବିଭାଗ ଏ ସମ୍ପର୍କରେ ସୂଚନା ଦେଇଛି ।
ଆଜି ଯୁକ୍ତ ତିନି ଆଡମିଶନ ଶେଷ ହେବାର ଥିଲା । ଏହାକୁ ଆସନ୍ତା 18 ତାରିଖ ଯାଏଁ ବୃଦ୍ଧି କରାଯାଇଛି । ତେବେ ଦ୍ବିତୀୟ ମେଧା ତାଲିକା 21 ବଦଳରେ 23 ତାରିଖରେ ପ୍ରକାଶ ପାଇବ । କୋଭିଡ କଟକଣା ମଧ୍ୟରେ ଆଡମିଶନ କରାଯିବ । ଛାତ୍ରଛାତ୍ରୀ ମାସ୍କ, ସାନିଟାଇଜର ଏବଂ ସାମାଜିକ ଦୂରତା ରକ୍ଷା କରି ଆଡମିଶନ କରିବେ ।
ଚଳିତ ବର୍ଷ ନାମଲେଖା ପାଇଁ 2 ଲକ୍ଷ 44 ହଜାର 252 ଜଣ ଛାତ୍ରଛାତ୍ରୀ ଆବେଦନ କରିଥିଲେ । ସେମାନଙ୍କ ମଧ୍ୟରୁ 1 ଲକ୍ଷ 68 ହଜାର 537 ଜଣ ଛାତ୍ରଛାତ୍ରୀ ନାମଲେଖା ଲାଗି ପ୍ରଥମ ପର୍ଯ୍ୟାୟରେ ଯୋଗ୍ୟ ବିବେଚିତ ହୋଇଛନ୍ତି । କଳାରେ 1 ଲକ୍ଷ 2 ହଜାର 292 ଜଣ, ଫିଜିକାଲ ସାଇନ୍ସରେ 25 ହଜାର 350, ବାୟୋଲୋଜିକାଲ ସାଇନ୍ସରେ 18 ହଜାର 338 ଏବଂ ବାଣିଜ୍ୟ 17 ହଜାର 634 ଜଣ ପ୍ରଥମ ପର୍ଯ୍ୟାୟ ଆଡମିଶନ ପାଇଁ ଯୋଗ୍ୟ ହୋଇଛନ୍ତି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
