ଭୁବନେଶ୍ବର: ସରକାରୀ ଉଦ୍ୟୋଗରେ ଅନିୟମିତତା । ରାଜ୍ୟରେ ଥିବା 36ଟି ସରକାରୀ ଉଦ୍ୟୋଗ ମଧ୍ୟରୁ 24ଟି ରେ 172 ଜଣ ଅଧିକାରୀଙ୍କ ବିରୋଧରେ ଏହି ଅନିୟମିତତା ଅଭିଯୋଗ ହୋଇଛି । ଶନିବାର ବିଧାନସଭାର ପ୍ରଶ୍ନକାଳ ବେଳେ ବିଜେଡି ବିଧାୟକ ସୁଶାନ୍ତ କୁମାର ବେହେରାଙ୍କ ପ୍ରଶ୍ନରେ ଉତ୍ତର ରଖିଥିଲେ ସରକାରୀ ଉଦ୍ୟୋଗ ମନ୍ତ୍ରୀ ଅଶୋକ ପଣ୍ଡା ।
ବିଜେଡି ବିଧାୟକ ସୁଶାନ୍ତ ବେହେରା ପ୍ରଶ୍ନ କରିଥିଲେ ଯେ, ରାଜ୍ୟର କେଉଁ ସାଧାରଣ ଉଦ୍ୟୋଗର କେଉଁ ଅଧିକାରୀଙ୍କ ବିରୁଦ୍ଧରେ ଅନିୟମିତତା ଓ କାର୍ଯ୍ୟାନୁଷ୍ଠାନ ବିଚାରଧିନ ଅଛି । ଏହାସହ ସେଗୁଡିକର ଆଶୁ ଫଇସଲା ପାଇଁ କି ପଦକ୍ଷେପ ଗ୍ରହଣ କରାଯାଇଛି । ଯାହାର ଉତ୍ତରରେ ମନ୍ତ୍ରୀ ଅଶୋକ ପଣ୍ଡା କହିଥିଲେ କି ଯୋଗାଣ ନିଗମରେ ସର୍ବାଧିକ 34 ଜଣଙ୍କ ବିରୋଧରେ ଅନିୟମିତତା ଅଭିଯୋଗ ରହିଛି ।
ସେହିପରି ଉଠା ଜଳସେଚନ ନିଗମରେ 26, ଶକ୍ତି ସଂଚାରଣ ନିଗମରେ 24, ବନ ଉନ୍ନୟନ ନିଗମରେ 17, କୃଷି ଶିଳ୍ପ ନିଗମରେ 12, ଗ୍ରାମ୍ୟ ଗୃହ ନିର୍ମାଣ ଏବଂ ଉନ୍ନୟନ ନିଗମରେ 10 ଜଣ ଅଧିକାରୀଙ୍କ ବିରୋଧରେ ଆସିଛି ଅନିୟମିତତା ଅଭିଯୋଗ । କିଛି ମାମଲାରେ ବିଭାଗୀୟ କାର୍ଯ୍ୟାନୁଷ୍ଠାନ ହୋଇଛି ତ କିଛି ମାମଲାରେ ତଦନ୍ତ ଚାଲିଛି । ଆଉ କିଛି ମାମଲା ହାଇକୋର୍ଟ ଓ ଭିଜିଲାନ୍ସ କୋର୍ଟରେ ବିଚରାଧୀନ ଅଛି ବୋଲି ମନ୍ତ୍ରୀ କହିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
