ଭୁବନେଶ୍ବର: ମାଷ୍ଟର୍ସ ଗେମ୍ସ ଫୁଟବଲରେ ଚମ୍ପିଆନ ହୋଇଛି ଓଡିଶା ମହିଳା ଦଳ । ସୋମବାର ଓଡିଶା ଫେରିବା ଅବସରରେ ସ୍ଥାନୀୟ ବିମାନବନ୍ଦରରେ ବିପୁଳ ସ୍ୱାଗତ ସମ୍ବର୍ଦ୍ଧନା ଜ୍ଞାପନ କରାଯାଇଛି । ଯେଉଁଥିରେ ଖେଳାଳିମାନେ ଅଭିଭୂତ ହୋଇଥିବା ପ୍ରକାଶ କରିଛନ୍ତି ।
ସୂଚନାଯୋଗ୍ୟ କି ଚଳିତ ମାସ 5ରୁ 9 ତାରିଖ ପର୍ଯ୍ୟନ୍ତ ଗୁଜୁରାଟର ବରୋଦାଠାରେ ତୃତୀୟ ଜାତୀୟ ମାଷ୍ଟର ଗେମ୍ସ ଆୟୋଜିତ ହୋଇଥିଲା । ବିଭିନ୍ନ କାଟାଗୋରୀରେ ଏହି ପ୍ରତିଯୋଗିତା ଅନୁଷ୍ଠିତ ହେଉଥିବାବେଳେ ଏଥିରେ 40 ବର୍ଷରୁ ଉର୍ଦ୍ଧ କ୍ରୀଡ଼ାବିତମାନେ ଭାଗ ନେଇ ସେମାନଙ୍କ କ୍ରୀଡା ନୈପୁଣ୍ୟ ପ୍ରଦର୍ଶନ କରିଛନ୍ତି । ତେବେ ଏହି ପ୍ରତିଯୋଗିତାରେ ଓଡିଶାର ମହିଳା ଫୁଟବଲରଙ୍କୁ ନେଇ ପ୍ରଥମ କରି ଯାଇଥିବା ଟିମ ଏଥିରେ ସୁନ୍ଦର ପ୍ରଦର୍ଶନ କରିବା ସହିତ ମହିଳା ଫୁଟବଲରେ ସ୍ବର୍ଣ୍ଣ ପଦକ ଲାଭ କରି ଫେରିଛନ୍ତି । ଆଉ ଯାହାର ନେତୃତ୍ଵ ନେଇଥିଲେ ଓଡିଶାରେ ମହିଳା ଫୁଟବଲର ଆରମ୍ଭ କରିଥିବା ତଥା ଜାତୀୟ ଦଳ ପାଇଁ ଖେଳିଥିବା ଫୁଟବଲର ଗୀତାଞ୍ଜଳି ସାମନ୍ତରାୟ । ଖୁବ କମ ଦିନର ସମୟ ମଧ୍ୟରେ ଦଳ ଅଭ୍ୟାସ କରିବା ସହ ଏପରି ବିଜୟ ହାସଲ କରିଥିବାରୁ ସେ ଖୁସିବ୍ୟକ୍ତ କରିଛନ୍ତି । ଆଗାମୀ ଦିନରେ ଏହି କ୍ରୀଡ଼ାବିତମାନେ ଖେଳ ସହିତ ଜଡିତ ରହି ଆଗାମୀ ଭବିଷ୍ୟତ କ୍ରୀଡ଼ାବିତ ଗଠନରେ ସହାୟକ ହେବ ବୋଲି ସେ କହିଛନ୍ତି ।
ସେହିଭଳି ଓଡିଶା ମାଷ୍ଟର୍ସ ଆସୋସିଏସନର ସାଧାରଣ ସମ୍ପାଦକ ଏହି ଟିମରୁ କେତେକ କ୍ରୀଡ଼ାବିତ ଆଗାମୀ 2021 ଟୋକିଓ ୱାର୍ଲଡ଼ ମାଷ୍ଟର୍ସ ଗେମ ପାଇଁ ସିଲେକ୍ସନ ହୋଇଥିବା କହିଛନ୍ତି । ତେବେ ସରକାର ରାଜ୍ୟରେ ଥିବା ମାଷ୍ଟର୍ସ କ୍ରୀଡ଼ାବିତମାନଙ୍କ ପ୍ରୋତ୍ସାହନ ପାଇଁ କାର୍ଯ୍ୟକ୍ରମ ହାତକୁ ନେଲେ ସେମାନେ ଭବିଷ୍ୟତ ପ୍ରସ୍ତୁତି ପାଇଁ ଅନେକ ସହାୟକ ହୋଇ ପାରିବେ ବୋଲି ସେ କହିଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
