ଭୁବନେଶ୍ବର : ସୋଲାରି ଓ ବାଲୁଗାଁ ଷ୍ଟେସନ ମଧ୍ୟରେ ପଣ୍ୟବାହୀ ଟ୍ରେନ ଲାଇନଚ୍ୟୁତ ହୋଇଛି । ସୋଲାରି ଏବଂ ବାଲୁଗାଁ ଷ୍ଟେସନ୍ ମଧ୍ୟରେ ପଣ୍ୟବାହୀ ଟ୍ରେନ ଲାଇନଚ୍ୟୁତ ଯୋଗୁଁ ଦୁଇଟି ଟ୍ରେନକୁ ମାର୍ଗରେ ସାମୟିକ ଭାବେ ନିୟନ୍ତ୍ରିତ କରାଯାଇଛି। ଲାଇନଚ୍ୟୁତ ଯୋଗୁଁ ଖୋର୍ଦ୍ଧା ରୋଡ଼-ବ୍ରହ୍ମପୁର ରେଳ ସେକ୍ସନରେ ଟ୍ରେନ ଚଳାଚଳ ସାମାନ୍ୟ ପ୍ରଭାବିତ ହୋଇଛି।
କେନ୍ଦୁଝର ନିକଟବର୍ତ୍ତୀ ନୟାଗଡ଼ ଠାରୁ ଲୁହାପଥର ବୋଝେଇ କରି କର୍ଣ୍ଣାଟକର ହୁଵାଲୀକୁ ଯାତ୍ରାକରୁଥିବା ଏକ ପଣ୍ୟବାହୀ ଟ୍ରେନ ଖୋର୍ଦ୍ଧା ରୋଡ଼ ରେଳ ମଣ୍ଡଳ ଅନ୍ତର୍ଗତ ସୋଲାରି - ବାଲୁଗାଁ ଷ୍ଟେସନ ଷ୍ଟେସନ ମଧ୍ୟରେ (ହାଓଡ଼ା-ଚେନ୍ନାଇ ମୁଖ୍ୟ ରେଳ ମାର୍ଗରେ) ଗୋଟିଏ ୱାଗନ ଆଜି(ବୁଧବାର) ଅପରାହ୍ନ ୪ଟା ୩୫ମିନିଟ ସମୟରେ ଲାଇନ୍ଚ୍ୟୁତ ହୋଇଯାଇଥିଲା । ଏହାଯୋଗୁଁ ଖୋର୍ଦ୍ଧା ରୋଡ଼-ବ୍ରହ୍ମପୁର ରେଳ ସେକ୍ସନରେ ଟ୍ରେନ ଚଳାଚଳ ସାମାନ୍ୟ ପ୍ରଭାବିତ ହୋଇଛି। ଯାହାଫଳରେ ଆଜି ଭୁବନେଶ୍ୱରରୁ ଛାଡିଥିବା 11020 ଭୁବନେଶ୍ୱର-ମୁମ୍ବାଇ ସିଏସଏମଟି କୋଣାର୍କ ଏକ୍ସପ୍ରେସକୁ ଗଙ୍ଗାଧରପୁର ରେଳ ଷ୍ଟେସନରେ ଅପରାହ୍ନ ୪ଟା ୪୨ମିନିଟ ଠାରୁ ଅଟକା ଯାଇଥିଲା ।
ଏହାବି ପଢନ୍ତୁ : କୋଟିଆରେ ନିର୍ବାଚନ ଭଣ୍ଡୁର ପାଇଁ ଆନ୍ଧ୍ରର ପ୍ଲାନ, ଗାଁରେ ଉତ୍ପାତ କରୁଛନ୍ତି ଏଜେଣ୍ଟ
12703 ହାଓଡ଼ା-ସିକନ୍ଦରାବାଦ ଫଲକନୁମା ଏକ୍ସପ୍ରେସ କାଳୁପଡାଘାଟ ଷ୍ଟେସନ ଠାରେ ଅପରାହ୍ନ ୫ ଘଟିକାରୁ ନିୟନ୍ତ୍ରିତ କରାଯାଇଥିଲା । ଖୋର୍ଦ୍ଧା ରୋଡ ରେଳ ମଣ୍ଡଳର ମଣ୍ଡଳ ରେଳବାଇ ପ୍ରବନ୍ଧକ ଏବଂ ତାଙ୍କ ଅଧିକାରୀ ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ତଦାରଖ କରୁଛନ୍ତି । ଯାତ୍ରୀବାହୀ ଟ୍ରେନ ଶୀଘ୍ର ଚଳାଚଳ ପାଇଁ ପଦକ୍ଷେପ ନିଆଯାଉଛି ।
ପ୍ରଭାବିତ ୱାଗନକୁ ଠିକ କରିବା ପାଇଁ ରିଲିଫ ଟ୍ରେନ ଘଟଣାସ୍ଥଳରେ ପହଞ୍ଚି ସାରିଛି । ଯାତ୍ରୀବାହୀ ଟ୍ରେନକୁ ସତର୍କତାର ସହିତ ଡାଉନ ଲାଇନରେ ଚଳାଚଳ ପାଇଁ ଅନୁମତି ଦିଆଯିବ । ଯାହା ଫଳରେ ଟ୍ରେନ ଚଳାଚଳ ସାମାନ୍ୟ ବିଳମ୍ବିତ ହୋଇପାରେ । ଏହି ଉଦ୍ଧାର ଓ ରକ୍ଷଣାବେକ୍ଷଣ କାର୍ଯ୍ୟ ସମ୍ପାଦନ ପାଇଁ ରେଳବାଇକୁ ସହଯୋଗ କରିବା ପାଇଁ ପୂର୍ବତଟ ରେଳପଥ ନିବେଦନ କରିଛି । ରେଳବାଇ ଯୁଦ୍ଧକାଳୀନ ଭିତ୍ତିରେ ଶୀଘ୍ର ପୁନଃ ଟ୍ରେନ ଚଳାଚଳ କରିବାକୁ କାର୍ଯ୍ୟ କରୁଛି।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
