ବାଲେଶ୍ବର: ବାତ୍ୟା ୟସ ମୁକାବିଲା ପାଇଁ ବାଲେଶ୍ଵର ଜିଲ୍ଲା ପ୍ରଶାସନ ପ୍ରସ୍ତୁତ ଥିବା ବେଳେ ସାଧାରଣ ଲୋକଙ୍କ ସୁରକ୍ଷା ଦିଗରେ ଦୃଷ୍ଟି ଦିଆଯାଇଛି। ପରିଦର୍ଶନ କରିଛନ୍ତି ସଦର ବିଧାୟକ ସ୍ବରୂପ ଦାସ ।
ବାତ୍ୟା ୟସର ମୁକାବିଲାକୁ ନେଇ ବାଲେଶ୍ବର ତଳି ଅଞ୍ଚଳରେ ଥିବା କଚ୍ଚା ଘର ଲୋକମାନଙ୍କୁ ବହୁମୁଖୀ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର ପାଇଁ ପ୍ରଶାସନ ପରାମର୍ଶ ଦେଇଛି। ସମୁଦାୟ 1 ଲକ୍ଷ 20 ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ ଜିଲ୍ଲା ପ୍ରଶାସନ ଲକ୍ଷ୍ୟ ରଖିଛି। ଆଜି ଦ୍ବିପ୍ରହର ଠାରୁ ବର୍ଷା ପବନ ଆରମ୍ଭ ହୋଇଥିବା ବେଳେ ଲୋକଙ୍କୁ ଆଶ୍ରୟସ୍ଥଳୀକୁ ସ୍ଥାନାନ୍ତର କରିବା ପାଇଁ ଚେଷ୍ଟା କରାଯାଇଛି। ସେହିପରି ବାଲେଶ୍ଵର ସଦର ବିଧାୟକ ସ୍ବରୂପ ଦାସ ବିଭିନ୍ନ ବାତ୍ୟା ଆଶ୍ରୟସ୍ଥଳୀ ପରିଦର୍ଶନ କରି ସେଠାକାର ସ୍ଥିତି ପରଖିଛନ୍ତି। ପ୍ରଶାସନ ପକ୍ଷରୁ ଲୋକଙ୍କୁ ସ୍ଥାନାନ୍ତର ପାଇଁ ନିବେଦନ କରାଯାଇଥିଲେ ମଧ୍ୟ ଲୋକମାନେ ଆଗ୍ରହ ପ୍ରକାଶ କରି ନଥିବା ଜଣାପଡିଛି। ତେବେ ଆସନ୍ତାକାଲି ସ୍ଥାନାନ୍ତରିତ ପ୍ରକ୍ରିୟା ଜୋରଦାର କରାଯିବ ବୋଲି ସୂଚନା ମିଳିଛି।
ବାଲେଶ୍ବରରୁ ଜୀବନଜ୍ୟୋତି ନାୟକ,ଇଟିଭି ଭାରତ
